«Bolgar-Tugan tel»neñ 1-nçe smenası katnaşuçılarınnan icadi fikerlär ← kire kaytirga

Sälätneñ berençe töbäkara cäyge smenası da axırına yakınlaştı. 7 kön däwamında böten Räsäydän cıelgan fän olimpiadaları ciñüçeläre, prizerları, yaşlär oeşmaları aktiwistları häm sälätle tatar yaşläre IV Töbäkara «Bolgar-Tugan tel» çatırlı alanında yal itte, belem tupladı, tatar moxitendä kaynadı.

Tatarstan Respublikasınıñ mägarif häm fän ministrlıgı häm «Sälät» Fondı oeştırgan älege smena katnaşuçılarına uku-ukıtu programmasın tulı spektrda kürsätä aldı. Balalar kurayda da uynarga öyrändelär, törle ceplär häm kadaklardan üz kulları belän törle eşlänmälär yasadılar, räsem kürgäzmäse oeştırdılar, biyu sängate serlärenä dä töşendelär. Ber süz belän äytkändä, smena ostaxanälärgä bay buldı.

«Mondıy däräcädäge lager, hiçşiksez, tatar xalkınıñ yörägendä kalaçak. Ägär millät üz telen belmäsä – ul yukka çıga. Millät, tel – bik zur baylık. Şuña da, balalar, monda törle töbäklärdän, rayonardan kilep, üzara añlaşıp, telne saklagız, nıgrak öyränegez. Uñışlar sezgä!» - dip citkerde Spass munitsipal rayon başlıgı Kamil Nugaew.

Däreslärdän tış sälkeşlär tanılgan şäxeslär belän dä aralaşa, üzlären kızıksındırgan sorauların birä aldı. Kompozitor, pianist Elmir Nizamow muzıkal däres birde. Alannıñ bar territoriyase tatar xalık moñnarına kümelde. Şagıyrä Yoldız Miñnullina belän berlektä şigriyat häm proza dönyasına çuma aldık. «Älbättä.ru» proektı citäkçese Ildar Äyupow isä dizaynerlık sängate xakında täfsilläp söyläde.

«Sezgä, berençe çiratta, tatar telebezne öyrätkän öçen äti-äniegezgä olı räxmätne belderäbez. Alga taba da zur unışlar, ukularıgızda gel aldıngı buluıgıznı telibez!» - dip izge teläklären citkerde Tatarstan Respublikası mägarif häm fän ministrlıgınıñ Töbäkara xezmättäşlek sektorı äydäp baruçı kiñäşçese Göliya Musina.

Mädäni-küñel açu programması üzeneñ törlelege belän tañ kaldırdı. «Aulak öy»dä cırlar cırladık, biyulär başkardık, KWN uynadık, «Quiz Time»  biremnären çiştek, kontsert ta kuydık.

«Barısı öçen dä räxmät siña, «Bolgar-Tugan tel»! Smena berençe könennän ük bik şäp başlanıp kitte. Küptänge xıyalımnı çınga aşırdım: berençe tapkır räsmi açılış tantanasında äläm kütärdem. KWNda da katnaştım, «Quiz Time» uenında komandabıznıñ kapitanı buldım, «Spell Batlle»da ciñdem. Ikençe elga da kiläm! Här smena küñeldä kabatlanmas xis-kiçereşlär kaldıra», - dip urtaklaştı Aksubay rayonınnan kilgän Aynaz Söläymanowa.

«Smenanıñ moxite bik oşadı. Hawa torışı salkın buluga karmastan, yöräklärdäge cılılık sünmäde. Ber minut wakıt ta buşka ütmäde. «Milli» studiyasennän floristika ostaxanäläre, jurnalistika, tatar tele däresläre  aeruça da faydalı, küñelle toeldı. Däreslärdäge tatar teatrı tarixı teması küñelemdä zur täesir kaldırdı. Teatrga yörergä bik yaratkangadır, küräseñ. Ikençe elga mine imtixannar kötsä dä, smenaga kilergä tırışaçakmın. Teläk bulsa barısın da başkarıp bula dilär bit!» - dip iskärtte Arça kızı Zölfiya Xäsänowa.

«Smena şäp! Tanılgan şäxeslär belän oçraşular ber sulışta ütte. Yoldız Miñnullina belän oçraşuda bez islamdagı poeziya häm proza xakında fiker alıştık. Oratorlık ostalıgı buença master-klassta üzem öçen kiräkle mäglümat aldım. Ikençe elga da kilergä ide, tik miña inde 18 tula häm min äydaman yaki wolonter sıyfatında da Bolgarga kire kayta alam», - dip belderde Ätnä rayonınnan Firüzä Hadiewa.

Smenada katnaşıp elmayuı, köläç yöze belän küñelebezne kütärgän här keşegä räxmät! Bik tizdän «Bolgar-Tugan tel» yaña katnaşuçıların karşı alaçak. 18-24-nçe iyun aralıgında Bolgar muzey-tıyulıgında «Bolgar-Tugan tel»neñ 2-nçe smenası uza. Küreşkängä kadär, duslar!

Ä älegä media-üzäk gazeta bitlärenä urnaştırgan katnaşuçılarnıñ icadi fikerläre belän tanışıyk: Gazeta

Alinä Sısoewa, Smenanıñ media-üzäge