«Sälät-Samara» smenasınnan cılı xatirälär ← kire kaytirga

«Sälät-Samara» kışkı smenası tämamlandı. Alannıñ barlık neçkälekläre, üzençälekläre, yunäleşe turında smena äydamanı, «Sälät-Samara» klubı räise Sabir Galimullin söyläde.

- «Sälät-Samara» smenası başka alannardan närsä belän aerıla?

- Berençedän, bezneñ alan Samara şähärendä oeştırıla. Anıñ töp maksatlarınıñ berse – Samara ölkäse balaların aktiw räweştä cälep itü, alarnıñ icadi häm intellektual potentsialın açu, Sälätneñ törle proektlarında katnaştıru.

Ikençedän, smenabıznıñ töp tematikası galäm, galaktika häm planetalar belän bäyle. Planetalarnıñ berse – Samara. Maksatlarnıñ tagın berse – balalarnı galäm moxite belän tanıştıru, älege temada ostaz bulgan kunaklarnı çakıru, möhim mäglümat birü.

- Älege smena sineñ öçen üzençälekleme?

- Äye. Sälättä rolem üzgärde, smenada berençe tapkır äydaman wazıyfasın başkardım.

- Smenanıñ yunäleşe nindi?

- Yunäleşebez – intellektual-icadi. Belem birü häm küñel açu protsessları ber-bersenä komaçaulamıyça, parallel räweştä bardılar. Böten äyber dä sistemalaştırılgan ide. Şuña kürä, balalar ike törle yunäleştä dä üzlären bik aktiw kürsättelär, yaña yaktan açtılar.

Smenanıñ programması närsädän gıybarät? 

- Smenanıñ asılı tübändäge: härber 3 törkem üzenä birelgän rolne üti. Alar üzara ekspert, politsiya xezmätkärlärenä häm detektiwlarga bülendelär. Smena däwamında törle dälillär cıep, kwestlar ütep, axırda şifrlar yardämendä ser bulgan süzneñ närsä añlatkanına töşendelär. 

- Smenaga äzerlek nindi buldı? Barlık fikerläregezne tormışka aşıra aldıgızmı?

- Närsäneder äzerläü ul – härwakıtta da ciñel protsess tügel. Kübese belgänçä, älege protsess üzenä yakın kilüne, centekläp karaunı taläp itä. Kıska sroklarga karamastan, bez, komandabız belän şaktıy kızıklı häm zamança programma äzerli aldık. Minemçä, älege protsessta komanda – iñ töp element.

- Komanda eçendä eşçänlek nindi ide?

- Komandanıñ här katnaşuçısı da anıñ aldına kuygan burıçlarga bik citdi karadı, üz eşen näticäle başkarıp çıktı. Komandanıñ härber wäkilennän çıkkan törle fikerlär, axır çiktä, kuätle, kızıklı programmada üz urınnarın taptılar.

- «Sälät-Samara» alanınıñ kışkı smenasında küpme bala yal itte? Alarnıñ xis-kiçereşläre nindi?

- Smenada barlıgı 45 bala yal itte. Alarnıñ 4-se Tatarstan Respublikasınnan. Balalarnıñ barlık xis-kiçereşlären bez smena däwamında, ul tämamlangaç ta sotsial çeltärlärdä kürdek. Bu räxmät süzläre, törle uñay täesirlär, xislär, smenanıñ moxitenä tulısınça birelü, alannıñ tämamlanuına moñayu... Barısı da buldı.

Monıñ barısı da bik ixlas häm gadel ide. Biredä, här bala da üzen yaña rollärdä, obrazlarda sınap karıy aldı.

- Smenanı äzerläüdä, anı tormışka aşırganda iñ awırı närsä buldı?

- Awırlıklar berkayçan da kurkınıç bulırga tieş tügel, minemçä. Härber awırlık, sınau bezne barı tik köçleräk, täcribäleräk kenä yasıy! Biredä, iñ katlaulı protsesslarnıñ berse bulıp balalarnı oeştıru, cıyu buldı dip äytä alam. Çönki älege eşne buldırır öçen bik küp wakıt taläp itelä. Şäxsän min, bu etapnı katlaulı tügel, ä küp köç taläp itüçe diyar idem.

- Planıgızda ikençe elga da kışkı smenanı uzdıru fikere barmı?

- Plannarıbız zurdan! Belgänebezçä, Sälät – mömkinleklär moxite häm bez älege mömkinleklärne, eşrak häm kübräk täkdim itärgä tırışabız. Alla birsä, urtak tırışlıklarıbız belän başlangan eşebezne däwam itärgä uylıybız häm telibez.