Tatarstan, Başkortostan, Çuwaşiya Respublikalarında sälätle balalar häm yaşlärneñ Sälät berläşmäse cäyge profille smenalar uzdıra. Bu cäyne uzaçak 25 smenada 15 meñ sälätle bala katnaşaçak.

3-nçe iyul könne Tatarstan Respublikasınıñ Laeş rayonında urnaşkan «Zwezdnıy» yal häm sälamätländerü lagerendä «Sälät-Rauşan» smenası, Alekseewsk rayonındagı «Fänsar» fän häm mägarif üzägendä «Sälät-Bilär kalası», Yar Çallı şähärendä «Sälät-Ruxiyat» häm «Sälät-Yar Çallı», Başkortostan Respublikasında – «Sälät-Kandrakül» alanı start aldı. 

Bügen isä Bolgar muzey-tıyulıgına «Sälät-Bolgar» katnaşuçıları yul totsa, Izge Bilärgä «Izge çişmä»lelär aşıktı. Biredä VI Xalıkara yaşlär uku-ukıtu forumı öçen palatkalar şähärçege tözelgän inde. Ul bıel ike smenada 12-16-nçı häm 25-30-nçı iyul aralagında uzaçak. 

Sälät cäyge alannarınıñ katnaşuçıları – respublikaküläm, bötenräsäy häm xalıkara konkurs-festiwallär ciñüçeläre. Alar tatar telen öyränergä häm kamilläşterergä omtıla. Sälätle balalar törle yaklardan ber urınga cıela: Tatarstannıñ barlık rayonnarınnan, Räsäyneñ törle töbäklärennän, yakın häm erak çit illärdän. 

Zölfiya Xäsänowa, Tatarstan:
- «Rauşan» – şäp programma häm iskitkeç äydamannar belän tulı, cılı moxitle alan. Intellekt häm icatnıñ garmoniyale sintezı, Sälät Forumında el saen onıtılmaslık prezentatsiya kürsätü mine bitaraf kaldıra almadı. Şuşı alanga elägü turında xıyallanıp, nihayat, bu xıyalım çınga aştı. 

Räis Rafikow, Ispaniya:
- Sälät berläşmäseneñ alanına min berençe tapkır kildem. Kildem dä tañ kaldım! Miña barısı da bik oşıy, aeruça äydamannar şäp. Inde bik küp duslar tabıp ölgerdem, alar belän aralaşu miña tatar telen öyränergä yardäm itä. Ukıtuçılar da şäp. Räxmät!

Irina Sadıykowa, Finlyandiya:
- Monda räxät! Programma bik eçtälekle: başta däreslär, annarı ostaxanälär, kiçlären küñel açu häm mädäni çaralar. Monda tanışkan iptäşläremnän küp närsägä öyränep bula. 

Balasın Sälät alanına cibärgän äti-äni tınıç bula ala. Balalar belän eşlägändä kurkınıçsızlıknı täemin itü – bezneñ berençe maksatıbız.

Gölnaz Gıyläcewa, äni:
- Ulımnı «Sälät-Rauşan» alanına ikençe tapkır cibäräm. Üzeneñ dä barası kilde, min dä Sälätne bik yaratam. Balamnı Sälätkä cibärsäm, anıñ öçen min 100% tınıç. Biredä tärbiyale, maksatçan balalar, ber-berse öçen dä ürnäk bulıp toralar. Tatar telen, mädäniyaten dä öyränep üssennär, täcribä tuplasınnar, duslar tapsınnar. 

Sälät alannarında katnaşu öçen garizalar äle haman da kabul itelä. portfolio-selet.ru saytında IT-alan «Sälät-Sanak»ka, yaş eşmäkärlär smenası «Sälät-Eşmäkär»gä, osta kullar öçen «Iske Kazan»ga, Alekseewsk rayonınıñ sälätle balaları «Sälät-Imänkäy»gä gariza kaldıra ala.