«Bez törle, ämma bezne urtak maksat berläşterä»: «Sälät» yaşlär uku-ukıtu forumınıñ yomgaklau smenası tämamlandı. ← kire kaytirga

Bilärdä XIV Xalıkara «Sälät» yaşlär uku-ukıtu forumınıñ yomgaklau smenası – Aldıngılar Bilär Forum tämamlandı. Ul «Aldıngılar xäräkäte» Rossiya balalar häm yaşlär xäräkäte belän belän berlektä uzdırıldı. Biredä Tatarstan rayonnarınnan 12-17 yaşlek 800gä yakın bala katnaştı.

Smenanıñ yabılu tantanasında «Aldıngılar xäräkäte» balalar häm yaşlär gomumrossiya ictimagıy-däülät xäräkäteneñ töbäk bülege sowetı citäkçese urınbasarı Läysän Zasıpkina häm «Sälät» yaşlär üzäge direktorı urınbasarı Ayaz Xanafin katnaştı. Alar smenada katnaşkan härkemgä räxmät süzläre citkerde.

– Iskitkeç programma, komanda, oeştıru komitetı, izge cirlek – bolar barısı da respublikanıñ iñ aldıngı balaları öçen! Inde niçä ellar «Aldıngılar xäräkäte» «Sälät» belän bergä näk şuşı izge Bilär cirendä oçraşıp, üz kuätlären, köçen tagın da nıgrak arttıralar. Äye, bezneñ isemnärebez, sörännärebez, simwollarıbız törle, ämma bezne urtak maksat berläşterä. Bez barıbızda respublikabıznıñ kiläçägen tözibez. Respublika citäkçelegenä zur räxmätebezne citkeräbez. Älbättä, citäkçelärebezgä Timur Cäüdät ulına häm Cäüdät Şäükät ulına, Ädip Älmirgä, şulay uk zur räxmät. Bilärgä kaytunı kiläse elga da däwam itärbez, – dide Ayaz Xanafin.

«Aldıngılar xäräkäte» töbäk bülege sowetı citäkçese urınbasarı Läysän Zasıpkina Aldıngılar Bilär Forum katnaşuçılarına möräcägat itte:

– Ber atnalık smena gına dip äytergä yaramıy. Döres moxittä bulsañ, ber atna eçendä yaña duslar tabıp, yaña belemnär tuplap, duslıknıñ asılına töşenep bula. Monda kabızgan utlar sezgä kiläçäktä dä yul kürsätep torsın. Bu äle tormışnıñ başı gına, alda sezne zur ürlär kötä. Keşeleklelek, berdämlek, yardämçellek – bu smenadan algan iñ kiräkle däresläregez. Härberegezgä uñışlar telim, – dide ul.

Şulay uk yomgaklau çarası kısalarında «Aldıngılar xäräkäte»nä masştablı bagışlau tantanası uzdı. 400dän artık bala häm ostaz berençe bulırga wägdä birep, tüştamgalar häm beläzeklär belän almaşıp, ilebezneñ iñ masştablı balalar berläşmäsenä kuşıldı.

Bıel smena ukuçılarnıñ üzidaräsen häm komanda künekmälären üsterügä yunälderelde. “Aldıngılar sägate” kısalarında 12 yunäleş buença ostaxanälär uzdı: mägarif, fän, xezmät häm hönärlär, mädäniyat, igeleklelek, patriotizm, sport, sälamlät yaşäü räweşe, media häm kommunikatsiyalär, diplomatiya, ekologiya häm turizm. Bıel katnaşuçılar forum kısalarında sotsial yaktan ähämiyatle proektlar buldırdı. Alarnı «Aldıngılar xäräkäte»neñ Tatarstan rayonnarı buença citäkçeläre tıñladı. Iñ aldıngı, kreatiw proektlar «Aldıngılar xäräkäte»neñ rayon bülekçälärendä gamälgä aşırılaçak.

Aldıngılar Bilär Forum XIV Xalıkara «Sälät» yaşlär uku-ukıtu forumın da yomgaklıy. Bıelgı cäyge sezonda 3 profille smena: Sälät Bilär Forum (Selet/Sälät), Hönärlär Bilär Forum (Remesla/Junior Skills) häm Aldıngılar Bilär Forum (Perwıe/Forward) uzdı. Barlıgı forumnarda 3 meñgä yakın bala katnaştı. Forum däwamında barlıgı 700dän artık belem birü sessiyase uzdı. Alarnı Rossiyaneñ törle poçmaklarınnan kilgän 300 ostaz uzdırdı.

Forumnarda «Canlı Sälät» (SeletLive) studiyasennän turıdan-turı efirlar ütkärelde. Anıñ kunakları arasında smenanıñ uku-ukıtu programması spikerları, Tatarstan Respublikası Räise yardämçese, «Aldıngılar xäräkäte» balalar häm yaşlär gomumrossiya ictimagıy-däülät xäräkäteneñ töbäk bülege sowetı citäkçese Timur Söläymanow häm «Sälät» yaşlär üzäge direktorı Aygöl Gabdraxmanowa häm berläşmäneñ yakın dusları buldı. Efirlarnı härkem «Sälät»neñ WKontakte häm RUTube räsmi akkauntlarında karıy aldı.

Forumnarda tatar tele häm tarixka bagışlangan yunäleş zur urın alıp tordı. Biredä balalar Bilär tarixı belän tanıştı, küp tarmaklı tel moxitenä çumdı. Böten mädäni, kiçke çaralar, şulay uk uku-ukıtu programmasınıñ ber öleşe tatar telendä uzdı. Forumda öç smena däwamında «Sälät dulkınında» radiosı eşläde, anıñ pleylistı «Sälät» xäräkäte häm tatar başkaruçıları cırlarınnan tözelde. Territoriyaneñ bizäleşe: çatırlardagı mäglümat stendları da tatar telendä äzerlände.

Bıel berençe tapkır Bilär Forum kısalarında Bilär cire, Böek Idel bue Bolgar däüläteneñ tarixına bagışlangan “Tamırlar” respublikaküläm olimpiadası uzdı. Anıñ kısalarında 15 ciñüçe bilgelände. Berençe urınnarga - welosiped, ikençe, öçençe, dürtençe, bişençe urınnarga - “Alisa” kolonkası birelde. Soraular här smenada üzgä ide. Tulaem 150 sorau äzerlände. Här forumda sälkeşlär ber sägat eçendä 50 sorauga cawap birde. Forum kısalarında olimpiadaga äzerlänü däresläre dä uzdı. Tarixi çıganaklarnı öyränüçe belgeçlär, arxeologlar sälkeşlär öçen maxsus ostaxanälär ütkärde.

Forumnıñ programması üzenä uku-ukıtu aktiwlıklarınıñ berniçä däräcäsen (şäxsi, törkem, gomumforum) ala. Här däräcä dä, üz çiratında, aktiw tormış pozitsiyase häm uñışka ireşü öçen motiwatsiya buldıruga, katnaşuçılarnıñ resurslı häm şäxsi üseşenä kiterä. Forumnıñ programması katnaşuçı öenä äylänep kaytkaç ta üz östendä eşlärgä cirlek kaldıra.

Şulay uk, öçençe smenanıñ yabılu tantanasında «Sälät» berläşmäse aktiwistların büläklädelär. Xezmätlärenä xörmät yözennän liderlarga şämäxä töstäge futbolkalar tapşırıldı. Monnan tış, aktiwistlar «Sälät» berläşmäsen nıgıtuga kertkän öleşe öçen II häm III däräcädäge Sälät bilgelärenä laek buldı.

Iskärtep uzabız, Xalıkara «Sälät» yaşlär uku-ukıtu forumı Rossiyaneñ balalar öçen oeştırıluçı iñ zur palatkalı lagere bulıp tora. «Sälät» yaşlär uku-ukıtu forumı – Tatarstan Respublikası Räise Röstäm Miñnexanow yardäme belän uzdırıluçı töbägebezneñ yöze bulgan proektlarnıñ berse, ul Tatarstan Respublikası Xökümäte, TR Yaşlär eşläre ministrlıgı häm TR Mägarif häm fän ministrlıgı yardäme belän uzdırıla.