Forumnıñ yaña smenası – yaña xis-kiçereşlär ← kire kaytirga
Bügen, 25-nçe iyul könne, Bilär muzey-tıyulıgı territoriyasendä VI Xalıkara yaşlär uku-ukıtu Sälät forumınıñ 2-nçe smenası start aldı. Forumda barlıgı 2 meñ keşe katnaşa: alarnıñ kübese fän olimpiadaları häm konferentsiyaläre ciñüçeläre. Forumnıñ geografiyase dä bik kiñ: Tatarstannıñ barlık rayonnarı, Räsäyneñ distälägän töbäge, yakın häm erak çit illärdän kilgän sälätle millättäşlärebez biredä. Bu yulı Forumda «Fänsar» fän häm mägarif üzägendä yal itüçe «Sälät-Sanak» kompyuter alanı sälkeşläre, «Zwezdnıy» bazasınnan kilgän «Sälät-Eşmäkär» smenası, Tatarstan, Başkortostan, Samarada urnaşkan Sälät klubları ägzaları katnaşa. Klublarnıñ wäkilläre 7 törkemgä bülende:
1. Atilla törkeme (Vgasır)
2. Bilge kagan törkeme (Kük türk kaganatı xanı, VII gasır)
3. Kubrat xan törkeme (Böek Bolgar xanı – Kodraknıñ ätise, VII gasır)
4. Asparux törkeme (Dunay bolgarları xanı, Kubratnıñ ulı, VII gasır)
5. Kodrak xan törkeme (Bilärne tözüçe xan, VII gasır)
6. Almuş xan törkeme. (X gasırda Islamnı kertüçe xan)
7. Ilham xan törkeme. (Bilärneñ soñgı xanı, XIII gasır).
Forumnıñ 2-nçe smenasınıñ töp teması – «IT: mäglümat, innowatsiyalär, intellekt».
«Berençe tapkır Sälät Forumı 2 smenada ütä. Bu, berençedän, oeştıru komitetı öçen dä yaña täcribä tuplau mömkinlege. Ikençedän, katnaşuçılar sanı 2 tapkır kübräk, dimäk cawaplılık ta kübräk. Sälät dönyası belän klublar aşa tanış bulgannarnı, fän olimpiadaları ciñüçelären dä cıydık. Şuña da biredä berençe tapkır gına Sälätkä ayak baskannar küp. Älege smena – komandañ belän kilep Sälät dönyasın öyränü mäydançıgı. Bu – 5 könlek seminar da, ilham çıganagı da, komandalı eşçänlek tä. Ber süz belän äytkändä, bez kabattan Bilärdä!» - dip Forumnıñ asılın «Sälät» Fondınıñ başkarma direktorı Timur Söläymanow añlatıp kitte.
Forumnıñ berençe köne ük aktiw, sälätle yaşlär cıelganın kürsätte. Irtädän ük palatkalı şähärçek territoriyasendä dustanä, küñelle, cılı atmosfera xökem sörde.
«Bu minem berençe Sälätle cäem. Barısı da «Bolgar-Tugan tel» alanınnan başlanıp kitte. Bu Forum da minem küñelemdä kabatlanmas xis-kiçereşlär kaldırır dip ışanam. Minem öçen iñ möhime – balalarım yözendä elmayu kürü», - di «Atilla» törkeme äydamanı Albert Däülätşin.
«Min Sälätkä berençe tapkır kildem. Barısı da bik äybät! Äydamannarıbız karşı aldı, uennar uynadık, tanıştık. Küñelsezlänep utırırga wakıt yuk. Forumga kilüemneñ maksatı – yaña duslar tabu, Sälät klubınıñ ni ikänen belü. Barlık duslarım da Sälätne maktap söyli, xäzer inde üzem dä süzläreneñ xaklıgına inandım», - di «Kubrat xan» törkeme katnaşuçısı Güzäl Mortazina.
El saen Forum territoriyasendä «Sälät-FM» radiosı eşli. Bıel ul «Tatar radiosı» belän berlektä çınga aşırıla, anı alıp baruçıları tawışı belän söyli.
«Forumga min yalgış kilep eläktem: 3 el äydaman bulıp eşlädem, şuña da Sälät minem öçen kaderle urın. Bıel kire kaytırga uyladım, zur gailäneñ ber öleşe bulasım kilde, yaña duslar taptım. 2005-nçe elda Arçada Sälättä buldım, annarı 2013-nçe elda gına Sälät KWN Ligasında oeştıruçı bularak katnaştım. Üzemne äydaman bularak ta sınap karadım. Forumga şuşı xis-kiçereşlärne kabatlar öçen kire kayttım», - di radio alıp baruçısı Ramil Şäräfiew.
«Berläşmädä min 2009-nçı eldan birle. Sälkeş tä, äydaman da buldım. Forumda oeştıruçı bularak berençe tapkır gına katnaşam, tik alay da här elnı biregä kilergä tırıştım. Minemçä, Sälätne yaktı kiläçäk kötä, ul üsäçäk, tagın da kamilläşäçäk!» - di Göliya Imamowa.
«2013-nçe elda berençe tapkır Sälät belän tanıştım. Berençe tapkır äydaman da, didjey da bularak katnaşkan idem. Berençe smenadan kaytkaç, ikençesenä barmaska uylagan idem. Tik xis-kiçereşlär östenlek aldı, barmıy buldıra almadım! #Bilärgäkaytu digän bik kızıklı xeşteg bar. Ike gadi süz, ä küpme mägnä!» - dip belderde Forum kunagı Ilnaz Nasretdinow.
Katnaşuçılar bügen Sälät moxite belän tanıştılar, irtägä bulaçak açılu tantanasına äzerlänälär. Uñışlar bezgä!