Rinat Sadıykow: «Bezneñ bügenge töp burıçıbız – Sälätne yaklarga häm anı üsterergä!» ← kire kaytirga
Bügen Bäşir Rämiew isemendäge IT-parkta fewral ae kerü belän sälätlelär könnärne sanıy-sanıy, dulkınlanıp kötä, äzerlänä torgan grandioz çara – X «Sämrux» el premiyasen tapşıru tantanası bulıp uzdı. Biredä «Sälät» berläşmäseneñ 2024 nçe eldagı eşçänlegenä näticä yasaldı häm el däwamında «Sälät» xäräkätendä aktiw katnaşuçı talantlı balalar häm yaşlär, berläşmäneñ proektların gamälgä aşırırga yardäm itüçe partnerlar, sälätlelär häm uñışlı initsiatiwa awtorları büläklände.
2015 nçe eldan kürkäm gadätkä äwerelgän «Sämrux» el premiyasen belmägännär yuktır, mögaen. Tatarstan töbäk «Sälät» yaşlär fondı, Tatarstan Respublikası Xökümäte yardäme belän, aktiw balalarnı, yaşlärne, ostazlarnı, alannarnı, Sälät klubların «Sämrux» el premiyase belän büläkli. 10 el däwamında älege çarada 725 tän artık keşe katnaştı, 83 ciñüçe bilgelände. Bıel konkurska 100 gä yakın gariza kabul itelde. Şularnıñ 93 portfolio nigezendä kiläse etapka ütte.
«Bügenge kiçädä räxmät süzläre äle bik eş yañgırayaçak, çönki el däwamında Sälät proektlarında 20 meñnän artık keşe katnaşa, häm härber keşeneñ öleşe çiksez zur. Sälätne nıgıtuıgız, üsterüegez öçen barlık sälätlelärgä, alarnıñ äti-änilärenä, ostazlarga, partnerlarıbızga zur räxmät! Eşçänlegebezne xuplauçı, härwakıt yardäm itüçe Räisebez Röstäm Miñnexanowka, barlık ministrlıklarga, alannarıbız uzuçı munitsipalitetlarga aerım räxmätemne citkerergä telim», – dip iskärtte kotlau süzlärendä «Sälät» yaşlär üzäge direktorı Aygöl Gabdraxmanowa.
Premiyane tapşıru tantanasında şulay uk bixisap ministrlık, wedomstwo wäkilläre dä katnaştı. Ciñüçälärne berençelärdän bulıp kotlap, premiyane tapşıruçılar arasında Tatarstan Respublikası Däülät Sowetı deputatı, Tatarstan Respublikası Däülät Sowetınıñ Byudjet, salımnar häm finans komitetı räise urınbasarı Kamil Nogaew, Tatarstan Respublikası Fännär akademiyaseneñ witse-prezidentı Tatarstan Respublikası Fännär akademiyaseneñ möxbir ägzası Aynur Timerxanow, Tatarstan Respublikası Räise yardämçese, «Aldıngılar xäräkäte» oeşmasınıñ respublika bülege citäkçese Timur Söläymanow, Tatarstan Respublikası däülät idaräsen tsifrlı nigezdä üsterü, mäglümat texnologiyaläre häm elemtä ministrı urınbasarı Bulat Gabdraxmanow, Tatarstan Respublikası mägarif häm fän ministrı urınbasarı Minzäliya Zakirowa, Tatarstan Respublikisı Ministrlar Kabinetı Apparatınıñ sälamätlek saklau, sport häm sälamät yaşäü räweşen formalaştıru mäsäläläre buença idarä başlıgı Rauşan Zaripow, Tatarstan Respublikası yaşlär eşläre ministrı Rinat Sadıykow buldı.
Tatarstan Respublikası Däülät Sowetı deputatı Kamil Nogaew TR Räise karşındagı Tatar telen häm Tatarstan Respublikasında yaşäüçe xalıklar wäkilläreneñ tugan tellären saklau, üsterü mäsäläläre komissiyase räise Marat Äxmätownıñ kaynar sälamnären citkerde häm Sälät proektlarınıñ talantlı yaşlärne üsterüdä, tatar telen saklauda häm üsterüdä möhim rol uynawın assızıkladı.
«Bezneñ bügenge töp burıçıbız – Sälätne yaklarga häm anı üsterergä!» – dide üz çıgışında TR yaşlär eşläre ministrı Rinat Sadıykow.
Bıel «Sämrux» el premiyasenä tagın ber nominatsiya kertelde. Ciñüçelär isemlegenä «El alan ukıtuçısı» da östälä.
X «Sämrux» el premiyase ciñüçeläre:
«El sälkeşe» – Kamilä Gıybadullina
«El äydamanı» – Almaz Nigmätcanow
«El kuldaşları» – Söläyman Möxämmätcanow häm Raniya Gabitowa – «Şäxes» alanı
«El ölkän äydamanı» – Bulat Axunow
«El metodistı» – Ayzat Xidiyatullin
«El direktorı» – Alsu Wäliewa
«El alanı» – «Almaz» profille Sälät alanı
«El klubı» – «Sälät — Märcän» klubı
«Sälät cırlıy» – «Kanatlı cäy» - «Aznakay» alanı cırı
«Forum başcitäge» – Alsu Ibrahimowa
«Bez räxmätle» – Räzinä Safina, Ayrat Gatiyatullin, Rinat Gıylmullin, Läysän Wetrowa
«Ber dulkında» – «Älif» icat törkeme, Ilgiz Şäyxraziew, Islam Waleew
«Sälät stipendiyase» – Azaliya Şiriewa, Ayzat Xidiyatullin, Rezedä Abdullina, Ruslan Sabirow
«El klub ukıtuçıları» – Läysän Wawilina «Sälät — Adımnar Tübän Kama» klubı, Aygöl Ibrahimowa «Sälät — Osinowo» klubı häm Zölfiya Bädriewa
«Sälät — Cihan» klubı
«El alan ukıtuçısı» – Läysän Nuriewa
«Sälät klassı» – «Adımnar — Tübän Kama» 3 «G» klassı
Ciñüçelärgä «Sämrux» simwolikası töşerelgän istälekle büläklär, partnerlarıbızdan büläklär, Fundselet mäydançıgınnan akçalata premiya häm, älbättä inde, ciñüçe diplomı häm töp büläk – «Sämrux» sını tapşırıldı. Premiyane sälätlelär üzläre fund.selet.biz platformasında tupladı. Bıel kümäk köç belän 700 meñ sumga yakın akça cıeldı.
.jpg)
