Röstäm Miñnexanow: «Sälät – respublikabıznıñ ürnäk programması!»

Bügen Tatarstan Respublikası Räise Röstäm Miñnexanow XIV Xalıkara «Cälät» yaşlär uku-ukıtu forumınıñ ikençe smenasında – Hönärlär Bilär Forumda kunakta buldı. Bilär Forum – tatar, rus häm ingliz tellären irken kullanu, mädäniyat, sängat, belem birü, media häm MT ölkäsendäge ideyalär, yañalıklar belän büleşü häm şäxsi, hönäri sıyfatlarnı kamilläşterü, dönyaküläm trendlar belän tanışu moxite.

Xalıkara «Sälät» yaşlär uku-ukıtu forumı 8 iyuldän 1 awgustka kadär Bilär tarixi-arxeologik muzey tıyulıgı territoriyasendä uza.

Bıel forum wakıtında törle yunäleşlärgä bagışlangan öç smena ütä: Sälät Bilär Forum (Selet), Hönärlär Bilär Forum (Remesla / Junior Skills), Aldıngılar Bilär Forum (Perwıe/ Forward). Forum Tatarstan Respublikasınıñ barlık rayonnarınnan häm Rossiya töbäklärennän kilgän 9000 balanı berläşterä. Biredä Rossiyaneñ törle regionnarınnan: Tatarstan, Başkortstan, Mari El, Udmurtiya respublikaları, Samara, Kirow, Irımbur, Perm, Mäskäü ölkälärennän häm Tatarstannıñ barlık rayonnarınnan kilgän balalar oçraşa.

«Sälät» forumı – Tatarstan Respublikası Räise Röstäm Miñnexanow yardäme belän uzdırıluçı töbägebezneñ yöze bulgan proektlarnıñ berse.

Hönärlär Bilär Forum 18 – 24 iyul könnärendä «Sälät — Adımnar» sıynıfları ukuçıları, töbäk «Sälät» klubları liderları, Sälät «Almagaç» mäktäbe, «Adımnar» polilingwal mäktäpläre ukuçıları katnaşında ütkäreläçäk. Cmena programması üz eçendä öç yunäleşne kolaçlayaçak: icat, media, mäglümati texnologiyalär. Hönärlär Bilär Forum katnaşuçılarga älege yunäleşlärdä eçke potentsialların açıklau, gamälgä aşıru häm üsterü öçen unikal mäydançık bularak oeştırıla.

Forum kısalarında ostaxanälär, açık oçraşular, workşoplar, respublikanıñ häm ilneñ äydäp baruçı belgeçläre belän interaktiw oçraşular ütkärelä. Smenanıñ här köne däreslär häm uennar, sport yarışları häm mädäni kiçälär belän ürelep bara. Smena kısalarında belem birü sessiyaläreneñ Tatarstan häm Rossiyaneñ iñ aldıngı spikerları häm ekspertları belän interaktiw formatları yasala, gamäli icat, milli koloritlı dizayn buença ostaxanälär ütkärelä, şulay uk «EkoSälät» häm Bilär tarixı buença maxsus proektlar mäydançıkları eşli.

Respublikabız Räise Hönärlär Bilär Forum katnaşuçıları belän aralaştı, smenanıñ uku-ukıtu mäydançıkları belän tanıştı häm sälkeşlärgä cılı teläklären citkerde:

«Berençe tapkır Bilärgä kayçan kilgänemne xäterlämim, ämma bu Izge cirlär härwakıt üzenä tartıp tora. Biregä nigez saluçılar – uñ yuldan baruçılar. Böten dönyada globalizatsiya bargan çorda telebezne, goref-gadätlärebezne saklap kalu – iñ töp mäsälälärneñ berse. Näk «Sälät» oeşması gailälär belän berrättän balalarga döres tärbiya başlangıçları birüdä, alarga yaktı kiläçäklären bilgeläüdä yardäm itüçe töp rolne başkara. Bolarnıñ barısı – berdäm komanda eşçänlege näticäse. Äydaman, başcitäklärneñ gadel xezmäte nigezendä sälkeşlärgä döres tärbiya orlıkları salına. Balaçak – iñ räxät çak! Bezneñ wakıtta bügenge könge mömkinleklär bulmasa da, bez bik bäxetle idek. Sez dä yaşlekneñ, balaçaknıñ kaderen belegez! Sälät – respublikabız öçen ürnäk programma!»

«Sälät» yaşlär üzägendä aktiw eşçänlek alıp barılganga inde 30 eldan artık. Kazan däülät uniwersitetınıñ entuziast-ukıtuçıları initsiatiwası belän 1994 elda Arçada (Tatarstan) 65 bala katnaşında berençe ukıtu-sälamätländerü lagerennan başlangan «Sälät» xäräkäte, Tatarstan Respublikasınıñ 25 meñnän artık sälätle balasın häm yaşlären, Rossiya Federatsiyaseneñ unnan artık töbägen, şulay uk çit illärne üz proektlarına cälep itüçe sotsial-pedagogik komplekska kadär utızellık üseş yulı ütte.

Bu elgı «Sälältle cäy» yal itü kampaniyase kısalarınla 24 profille alan uzdırıla. Alar üz eşçänleklären awgust axırına kadär alıp baraçak.

Sälät – mömkinleklär moxite! Biredä sälkeşlär icattaş fikerdäşlär tabıp, gomerlek dusların oçratıp, ömetle yaktı kiläçäkkä atlıylar.