Alinä Gimaltdinowa: «Sälät eldan-el üsä, yaña mömkinleklär aça!» ← kire kaytirga

«Tatar-inform» mäglümat agentlıgında «Sälätle cäy – 2025» yal itü kampaniyase başlanuına häm Sälätle balalarnı häm yaşlärne üsterü ölkäsendä X respublikaküläm «Sämrux» el premiyasen tapşıru tantanasına bagışlangan matbugat konferentsiyase uzdı.

Çarada TR Yaşlär eşläre ministrı urınbasarı Aygöl Sabirowa, «Sälät» yaşlär üzäge direktorı Aygöl Gabdraxmanowa, «Sälätle cäy» üzäge citäkçese, «Sälät» yaşlär üzäge direktorı urınbasarı Ayaz Xanafin, Tatarstannıñ top-blogerı, «Kopilka Sçastya» xäyriya proektı awtorı, TR yaşlär eşläre ministrlıgı karşındagı ictimagıy sowet ägzası, Sälät alannarı sälkeşe Alinä Gimaltdinowa, X «Sämrux» el premiyaseneñ «El äydamanı» nominatsiyase finalistı Söläyman Möxämmätcanow katnaştı.

Tatarstan töbäk «Sälät» yaşlär fondı, Tatarstan Respublikası Xökümäte yardäme belän, aktiw balalarnı, yaşlärne, ostazlarnı, alannarnı, Sälät Klubların 2015 nçe eldan başlap, «Sämrux» el premiyase belän büläkli. 10 el däwamında älege çarada 725 tän artık keşe katnaştı, 83 ciñüçe bilgelände.

Bıel «Sämrux» el premiyasendä barlıgı 19 nominatsiya: «El sälkeşe», «El äydamanı», «El kuldaşları», «El ölkän äydamanı», «El metodistı», «El direktorı», «El alanı», «El klubı», «El ostazı», «El partnerı», «Sälät cırlıy», «Forum başcitäge», «Sälät stipendiyase», «Bez räxmätle», «Ber dulkında», «Sälät klassı», «El klub kuratorı», «El klub ukıtuçısı», «El alan ukıtuçısı» buença ciñüçelär bilgelände.

«Bıel «Sämrux» el premiyase unınçı tapkır ütkärelä. Ul el däwamında Sälätne üstergän, nıgıtkan şäxeslärgä räxmät citkerü, alarnıñ xezmäten bilgeläü, iñ osta sälätlelärne büläkläü yözennän uzdırıla. Nominatsiyalär eldan-el üsä bara, yaña nominatsiyalär barlıkka kilä, katnaşuçılar sanı arta. Mäsälän, bu elnı berençe tapkır «El alanı ukıtuçısı» nominatsiyasendä ciñüçe bilgelänäçäk. Bu elnı büläkläü tantanası Bäşir Rämiew isemendäge IT-parkta 19 fewral könne 17:00 sägattä uzdırılaçak», - dip söyläde Aygöl Gabdraxmanowa.

Şulay uk «Sälät» yaşlär üzäge direktorı TR Räise Röstäm Miñnexanownıñ, TR Yaşlär eşläre ministrlıgınıñ, TR Mägarif häm fän ministrlıgınıñ Sälät üseşenä zur öleş kertüen dä bilgeläp ütte.

Bıel Tatarstan, Başkortstan, Çuwaşiya häm Kırım bazalarında 26 cäyge profille smena uzuı planlaştırılgan. Şulay uk Bilär tarixi-arxeologik muzey-tıyulıgı territoriyasendä XIV Xalıkara «Sälät» yaşlär uku-ukıtu forumı, töbäkara çatırlı «Bolgar –Tugan tel» alanı uzaçak.

Tatarstan Respublikası Räise Röstäm Miñnexanow yardäme belän uzdırıluçı yaşlär proektı Tatarstan Respublikası rayonnarınnan 14 000 sälätle balanı, ostazlarnı, Rossiyaneñ başka töbäklärennän häm çit illärdän watandaşlarnı berläşteräçäk.

«2024 elnıñ cäendä Sälät berläşmäse tarafınnan Tatarstan, Çuwaşiya, Başkortstan häm Kırım Respublikalarında 30 profille alan uñışlı uzdırıldı. Agımdagı elda şulay uk, traditsion Sälät alannarın, xalkıbıznıñ tarixın öyränü, tugan telne saklau häm üsterügä yunältelgän çaralar uzdıru planlaştırıla. Sälät proektlarında katnaşu aşa 14000 gä yakın sälätle balalar häm yaşlär icat, media, IT kebek ölkälärdä tatar telendä yaña belemnär üzläşterä ala», - dip söyläde Aygöl Sabirowa.

«Sälätle cäy» yal itü kampaniyasenä äzerlekle kadrlar cälep iteläçäk. Sälät bu eşne el äylänäse alıp bara. Kadrlar äzerläü maksatında «Äydamannar mäktäbe», «Başcitäklär mäktäbe» häm «Ukıtuçılar mäktäbe» uzdırıla. Alarnıñ eşçänlegendä 700 dän artık keşe katnaşa.

«Barlık Sälät alannarında, proektlarında katnaşırga teläüçe äydamannar öçen maxsus onlayn häm oflayn däreslär oeştırıldı, «Başcitäklär mäktäbe» häm «Media mäktäbe» proektları üz eşen däwam itte. Alannar öçen sıyfatlı programma äzerläü közdän ük başlana. «Sälätle cäy - 2025» garizalar kabul itü kampaniyase üz eşçänlegen 1 mart könne yaña Sälät platformasında başlap cibäräçäk. Bu ör-yaña platforma añlaeşlı, zamança, zäwıklı, anıñ üz reyting häm platforma sisteması balalarnı saylap alu öçen genä tügel, ä Sälät xäräkätenä kuşılu öçen tagın ber ısul bulıp tora», - dip assızıkladı «Sälätle cäy» üzäge citäkçese, «Sälät» yaşlär üzäge direktorı urınbasarı Ayaz Xanafin.

Anıñ süzlärençä, här balanıñ üzenä oşagan profille alannı saylau häm şuşı yunäleşne tiränten öyränü mömkinlege bulaçak.

Tatarstannıñ top-blogerı, «Kopilka Sçastya» xäyriya proektı awtorı, TR yaşlär eşläre ministrlıgı karşındagı ictimagıy sowet ägzası, Sälät alannarı sälkeşe Alinä Gimaltdinowa Sälätneñ anıñ tormışında nindi rol uynawı xakında söyläp kitte.

«Üz wakıtında min dä Sälät proektlarında aktiw katnaşkan idem, ä xäzer min spiker, ostaz, ekspert, äni bularak el saen forumnarda, «Sämrux»ta katnaşam, balalarımnı cäyge profille Sälät alannarına cibäräm. Sälätneñ şuşı ellar däwamında masştabları kiñäyde, Sälät eldan-el üsä, yaña mömkinleklär aça, sälätle yaşlärne üsterä», - dip bilgeläde ul üz çıgışında.

«Min Sälät moxitenä 2021 elda kuşıldım. Sälättäge yulımnı min Bilär kalası alanında başladım. Şundıy oşatıp kayttım min bu moxitne, biredäge açık küñelle keşelärne, mawıktırgıç çaralarnı. Annarı bik teläp äydamanlık yulımda berençe adımnarımnı yasadım, törle smenalarda katnaştım. Sälät – mömkinleklär moxite, ul üsterä, kamilläşterä, yaña ürlär yaularga yardäm itä. Sälättäge aktiw eşçänlegemneñ näticäse «Sämrux» el premiyasendä El äydamanı häm El kuldaşları finalistı buluım, - dip söyläde jurnalistlarga Söläyman Möxämmätcanow. - Ber nominatsiyadä ciñüçe inde bilgele, ä kalgannarında berençelekne kemnär alganın «Sämrux» el premiyasen tapşıru tantanasında beläçäkbez».