Timur Söläymanow: «Sälät ul – fikerläü räweşe!». Bilärdä «Sälät» forumınıñ ikençe smenası tämamlandı ← kire kaytirga

23 nçe iyul könne Bilärdä XIV Xalıkara yaşlär uku-ukıtu forumınıñ ikençe smenası – HÖNÄRLÄR BILÄR FORUM (Remesla/Junior skills) räsmi räweştä yabıldı.

Älege smena mäktäp ukuçılarına xäzerge zaman häm kiläçäk hönärlären üzläşterü öçen yaña mömkinleklär tudıruga yunältelde.
Smena programması ukuçılarga keçe yaştän ük hönäri yunäleş birügä nigezlände, uku-ukıtu çaraları gamäli-yunäleş birü formatında oeştırıldı. Alar ukuçınıñ şäxes bularak üseşenä etärgeç birä torgan, praktikaga yunälgän, uen, yarış, wakıyga formatındagı däreslärne üz eçenä aldı.

Smenada Rossiyaneñ törle regionnarınnan: Tatarstan, Başkortostan, Mari El, Udmurtiya respublikaları, Samara, Kirow, Irımbur, Perm, Mäskäü ölkälärennän häm Tatarstannıñ barlık rayonnarınnan 800 yakın bala katnaştı. Katnaşuçılar arasında şulay uk fän olimpiadaları, konferentsiyalär ciñüçeläre häm prizerları, töbäk Sälät klubları liderları häm Tatarstan Respublikası rayonnarı häm mäktäpläre aktiwistları buldı.

Räsmi yabılu tantanasında gadättägeçä «Sälät» yaşlär üzäge citäkçese Aygöl Gabdraxmanowa çıgış yasadı. Ul süzen: «Xäerle kiç, Bilär Forum! Sälam, Sälät!» - dip yalkınlı sälamläülärennän başladı. Çıgışı barışında Aygöl apa yaña «Alçarlar» proektı wäkillären büläkläde, istälekle büläklär, räxmät xatları tapşırdı. «Alçarlar» – «Sälät» yaşäeşen, yañalıklarnı, proektlarnı, oeşma eçendä ütkärelgän aktiwlıklarnı sotsial çeltärlärdä yaktırtıp baruçı, yaştäşlären «Sälät»kä däşüçe aktiwistlar cıelması. Tantanalı räweştä iñ zur büläk – «Sälät» alanına yullama da tapşırıldı. Aña Gazizowa Zilä laek dip tanıldı. Çıgışın Aygöl Gabdraxmanowa şulay uk traditsion räweştä yalkınlı «Bez berdäm, bez köçle, Sälätkä ber räxmätle!» süzläre belän tögälläde.

Alga taba süzne TR Räise yardämçese, Tatarstannıñ «Aldıngılar xäräkäte» balalar häm yaşlär gomumrossiya ictimagıy-däülät xäräkäteneñ töbäk bülege sowetı citäkçese Timur Söyläymanow aldı:

«Bezneñ monda sanıbız bixisap buluga karamastan, bez härberebez aerım unikal şäxes. Biredä ütkärgän könnär däwamında härkaysıgız üzenä yaña duslar tabıp, töple täcribä tuplap, yaña xıyal-omtılışlar buldırgandır dip ışanam – bu iñ möhime! Sälät – mömkinleklär moxite häm ul mömkinleklär adım saen, alarnı barı tik kürä genä belergä kiräk. Bilär cirenä kilep sez, xatirälär kitabıgıznıñ yaña bülegen başlıysız.

Min üzem Sälätkä 12-13 yaşlärdä kildem. Inde xäzer Tatarstan Respublikası Räise yardämçese buldım, ämma Sälät härçak minem küñelemdä, yörägemdä. Sälät ul – fikerläü räweşe. Izge cirlär köçen toep, bergä yaña tarix yazıyk. Bez - zur Sälät gailäse»

Alga taba iñ aktiw «Sälät»lelärgä däräcä ordennarı, maxsus büläklär tapşırıldı.

Yabılu tantanası çarada «Sälät» proektları citäkçese Ädip Älmir üze dä buluı belän kaderle ide. Ul da balalarnıñ eşçänleklären küzätep, söenep toruı belän urtaklaştı. «Sälät» klubları eşçänlegen yugarı bäyaläp, «bez san belän tügel, sıyfat belän köçle!» - dip assızıkladı. Anıñ yalkınlı çıgışınnan soñ, kiçneñ iñ dulkınlandırgıç mizgele, «Sälät» klublarınıñ XV nçe prezidentın saylau wakıtı kilep citte. Ike ellık gadel, tırış eşçänlegennän soñ «Sälät» klublarınıñ XIV nçe prezidentı Islam Mirgayazow üz urının yaña prezident wazifasın aluçı Ayzat Idiyatullinga tapşırdı. Eks-prezidentnı küplägän räxmät süzläre, cılı teläklär häm matur biyu belän ozattılar.

Smenanıñ här köne uku-ukıtu programması, uennar, sport yarışları häm kiçke çaralar belän ürelep bardı. Smena wakıtında ukuçılar woleybol, şaxmat çempionatlarında, intellektual turnirlarda, djem-sessiyalärdä, totrıklı üseş maksatları buença uennarda häm başka küp kenä aktiwlıklarda katnaşa aldılar.

Äytep uzarga kiräk, Hönärlär Bilär Forum kısalarında Izge Bilär cirendä «Sälät» berläşmäse belän «RUWIKI» internet-entseklopediyase arasında partnerlık turında kileşü tözelde.

Forumda «Canlı Sälät» turıdan-turı efirlar studiyase eşläde. Translyatsiyalärdä laboratoriyalär citäkçeläre, aktiw sälkeşlär häm Hönärlär Bilär Forum kunakları katnaştı. «Canlı Sälät» yardämendä här telägän keşe, öennän çıkmıy gına da, forumnıñ onıtılmaslık moxitenä kuşıla, Bilär cirendä bargan wakıygalarnı küzätä ala. Translyatsiyalär forumnıñ WKontakte häm RuTube ofitsial akkauntlarında alıp barıla.

Cmena programması üz eçendä öç yunäleşne kolaçladı: icat, media, mäglümati texnologiyalär. Hönärlär Bilär Forum katnaşuçılarga älege yunäleşlärdä eçke potentsialların açıklau, gamälgä aşıru häm üsterü öçen unikal mäydançık bularak oeştırıldı. Äytep uzarga kiräk, här yunäleş buença aerım laboratoriyalär eşläde. Häm şul laboratoriyalär üz eşçänlek näticälären soñgı kiçne gala-kontsertta täkdim ittelär. Yabılu kontsertı bersennän berse matur cırlar, biyulär, üzençälekle perfomanslar häm teatral küreneşlär belän ürelep bardı.

Alda katnaşuçılarnı «Sälät» forumınıñ öçençe smenası — ALDINGILAR BILÄR FORUM kötä, ul «Aldıngılar xäräkäte» belän berlektä oeştırıla. Bu smena kısalarında katnaşuçılar liderlık häm komanda künekmälären üsteräçäklär. Eş xäräkätneñ 12 yunäleşe buença başkarılaçak: mägarif, fän, xezmät häm hönärlär, mädäniyat, wolonterlık, patriotizm, sport, sälamät yaşäü räweşe, media, diplomatiya, ekologiya häm turizm.

Anıñ kısalarında ukuçılarnı törle ictimagıy oeşmalardan, törle ölkälärdän kilgän belgeçlärdän ostaxanälär häm lektsiyalär kötelä.

Xalıkara «Sälät» yaşlär uku-ukıtu forumı Tatarstan Respublikası Xökümäte, TR Yaşlär eşläre ministrlıgı häm TR Mägarif häm fän ministrlıgı yardäme belän uzdırıla.