«Безнең фикер»: һәммәсе дә бик мөһим ← кире кайтырга

11-нче декабрь көнне, «Сәләт» йортында III Республикакүләм «Безнең фикер» татар телендәге парламент дебатлары турниры узды. Чарада Татарстан Республикасыннан җыелган мәктәп укучылары һәм студентлар катнашты. Турнир балалар һәм яшьләр арасында күзаллауны киңәйтү, фикер йөртү һәм ораторлык осталыгына өйрәтү максатыннан уздырыла.

Ике кешедән торган командаларга бүленеп катнашучылар америкалы һәм британ форматларындагы дебат уеннарын уйнадылар. Һәр турның башында бирелгән тема буенча һәр команда да берничә аргумент китерергә тиеш иде.

Беренче тема «Бу пулат укытучыларның хезмәт хакын укучыларның өлгерешенә бәйлиячәк» дип аталды. Мәктәп укучыларына бу тема бик җиңел тоелды: алар үзләре дә мәгариф учреждениеләре үзәгендә кайный. Шуңа да аргументлары шактый саллы булды. Тик студентлар да читтә калмады: үз фикерләрен ачык һәм тулы итеп җиткерә белделәр.

Икенче һәм өченче турның темалары авыррак булды: «Бу палата 21-нче гасырда миллилек кирәкми дип саный», «Бу палата илебезгә импортлы товарлар кертүне туктатачак». Фикерләр бик күп булды, аларның һәрберсенә жюри әгъзалары тарафыннан тиешле игътибар бирелде.

«Турнирның һәр катнашучысы үз фикерен дөрес итеп белдерергә өйрәнә ала. Практика гына кирәк. Биредә миңа татар телендә иркен аралашып булуы аеруча ошый!» - дип хис-кичерешләре белән уртаклашты турнир катнашучысы Рәхимә Шиһапова.

Иң зур күләмдәге баллар туплаган лидерлар финалга узды. Биредә барлыгы 4 команда көч сынашты: «Бу палата югары уку йортларында белем бирү бушлай итәчәк».

Катнашучылар хезмәтенә «Сәләт» яшьләр үзәге директоры Айгөл Габдрахманова, Сәләт клубы президенты Игорь Смирнов, берләшмәбез активисты Нияз Мортазин бәя бирде.

Жюри әгъзаларын балаларның татар теле дәрәҗәсе таң калдырды. Аргументлар да сынатмады: күбесе юмор хисе һәм фәнни фактлар белән үз фикерен аңлата белде. Һәр катнашучыга жюри үз киңәшен бирде.

«Дебатларда катнашканда сез тормышта кирәк булачак тәҗрибә туплый аласыз!» - дип искәртте Айгөл Габдрахманова.

Турнирның төп оештыручысы Ләйсән Миңнуллина барлык катнашучыларга рәхмәтен белдерде: «Һәр катнашучы үзе өчен яңа белем туплый алгандыр. Һәрберегезгә – афәрин!»

Сәләт медиа-мәктәбе укучысы Инзилә Шакирова