«Sanak-lab» нәтиҗәләр ясады ← кире кайтырга

Узган шимбәдә Сәләт Йортында «Sanak-lab» белем бирү Лабораториясе проектларын тәкъдим итү һәм 2017-2018-нче уку елына нәтиҗә ясау кичәсе булды.

Йомгаклау чарасының ничек узуы турында проект җитәкчесе Ләйсән Сабитовадан сораштык.

– Бу уку елына нинди максатлар куелган иде? Аларга ирешә алдыгызмы?

– Быел без белем бирүнең шартларын яхшыртуны, балаларның белем дәрәҗәләренә туры китереп, IT өлкәсе буенча тагын да күбрәк юнәлешләр булдыруны максат итеп куйган идек. Без балаларга үсеш һәм киләчәктә тормышта үзләрен күрсәтә алсыннар өчен мохит тудырабыз. Конкурс һәм контестларны карап барабыз, балаларны олимпиадага әзерлибез, үз сайтларын, уеннар, модельләр ясарга өйрәтәбез. Бу белемнәр балаларга кызыксынуларын билгеләргә һәм ИТ өлкәдә әйдәп баручы вузларга керергә ярдәм итә.

– Быелгы уку елы узган елгысыннан нәрсә белән аерылып торды?

– Быел схемотехника, сайт ясау һәм информатикадан БДИга әзерләнү кебек яңа юнәлешләр барлыкка килде һәм без моңа чиксез шат.

– Тагын нинди юнәлешләр бар иде? Гомумән, балалар ни белән шөгыльләнде, нинди уңышларга иреште?

– Лабораториядә «Сайт ясау», «Схемотехника», «Олимпиада программалаштыруы», «С++да программалаштыру нигезләре» «3d-модельләштерү», «Системалы администрацияләү», «Виртуаль һәм өстәмә чынбарлык өчен кушымталар ясау» юнәлешләре буенча дәресләр үтте. Укучылар программалаштыру буенча олимпиадаларга әзерләнде, үзләре сайтлар һәм компьютер уеннары ясады, 3d модельле «акыллы йорт» төзеде.

– Балаларга ошадымы соң?

– Барысы да бик канәгать калды. Дәресләргә зур кызыксыну белән йөрделәр, интенсив программа утырышларына да бик теләп килделәр һәм киләчәктә дә Лабораториядә белем алуларын дәвам итәселәре килә.

– Киләсе елга нинди максатлар куйдыгыз?

– Үсәргә һәм тагын да күбрәк баланы бәхетле итәргә, аларга яңа мөмкинлекләр, белем һәм, әлбәттә инде, Сәләт дөньясын ачарга.