Älfiya Şakirzyanowa – prodyuser yaki rejissermı? ← kire kaytirga

Çın küñeldän Sälät Forumı media-komanda katnaşuçısı Älfiya Şakirzyanowanı International Film Festival 2018 KAZAN-ZILANT festiwalendä finalga uzuı belän kotlıybız!

International Film Festival 2018 KAZAN-ZILANT – kinofestiwaldä büläklärgä iya bulgan dönyanıñ barlık kinematografistlarına dönya bazarında filmnar häm awtorlarnı tanıtuçı festiwal.

Kinofestiwalnıñ oeştıruçıları: «Lion Productions» kinokompaniyase (Räsäy-Auropa), «Yunıy rejisser» Xalıkara balalar kinomäktäbe (Kazan şähäre).

Älege festiwaldä Älfiya «Gran» kinosın täkdim itte. Geroylar – keşelärgä döreslekne niçek bar, şulay itep kabul itärgä yardäm itüçe däwalau metodikasın häm preparatın uylap çıgargan Zalmin tabibı patsientları.

Ägär dä kinät barısı da plan buença barmasa, proekt yabılırmı?

Tabibnıñ eksperimentı uñışsız tämamlanaçakmı?

- Älfiya, kinoindustriyagä niçek kilep eläkteñ?

- Barısı da 7-nçe sıynıfta başlandı. Kullarıma kamera kilep eläkte häm şul wakıtta hönärem kino belän bäyle bulaçagın añladım. Institutka ukırga wakıt kilep citkäç, dokumentlarımnı Kazan Däülät mädäniyat institutına ber yunäleş, häm ber hönärçelekkä genä tapşırdım. Ul wakıtta üz-üzemä bik ışana idem. Häm ikençe planım yuk ide. Läkin, bu minem öçen härwakıtta da xas tügel. Allaga şöker, ukırga kerä aldım! Näk menä şul wakıttan minem «kinoşnıy» tormışım başlanıp kitte dä inde. Ukıtkan ostazıbız – Aleksey Aleksandr ulı Barıkin bik şäp. Berençe kurstan başlap üzeneñ, üz ukuçılarınıñ semkalarına daimi räweştä yörtä ide. Minem «xlopuşka» wazıyfasın başkargan berençe film – «Aysılu». Kübese belgänçä, bügenge köndä Tatarstanda ul bik tä populyar. Älege filmnıñ ikençe öleşen töşerep betergännän soñ, ul prokatka çıktı. Mine bu semkalarga algan wakıtta, min bu proektnıñ mondıy zur däräcägä barıp citäçägen uylamagan da idem. Arina Tumanowa (minem proektlar prodyuserı, «Gran» kinosı prodyuserı) belän berlektä äkrenläp üz proektlarıbıznı da tormışka aşıra başladık.

- Kino töşerergä ciñelme?

- Älbättä, kino töşerü bik tä katlaulı eş! Läkin şul uk wakıtta ul kızıklı! Bezneñ aldıbızda kuela torgan burıçlar iñ başta kurkınıç bulıp kürenä. Tik axır çiktä barısı da kilep çıga. Tögäl ber äyber äytä alam, ideyaga, filmga, rejisser kebek miña ışana torgan komanda bulsa, barısı da şäp bulaçak! Komandasız rejisser – rejisser tügel!

Üz komandamnı bik nık yaratam! Minem belän berniçä proekt däwamında Ekaterinburgta yaşäüçä stsenarist häm operator eşlilär. Alarnıñ Kazanga kilüe öçen, minem: «Kino töşerergä cıenam» digän süzlär genä citä. Kiläse, bez alınırga telägän proektka start aprel aenda bireläçäk. Bu bezneñ öçençe urtak proektıbız bulaçak, Alla birsä. Ä xäzerge wakıtta distantsion räweştä stsenariy östendä eşçänlek alıp barabız. Älege filmda da min üzemne rejisser rolendä sınıym. Çönki minem bolay da administrator yaki prodyuser bulıp eşlägän proektlarım şaktıy küp. Min üzemne ezlim. Miña rejisser yaki prodyuser bulganımnı añlarga kiräk.

- Ni öçen rejisser hönären saylarga buldıñ?

- Kino aşa keşelärneñ añına yogıntı yasıysım kilä. Alarnı filmnıñ ideyase, geroylarnıñ tormışı belän ilhamlandırasım kilä. Minem iñ töp maksatım – popkorn belän karalmıy torgan kino töşerü. Üz eşläremä tirän mägnä salam!

Minem zur telägem – tamaşaçıbız uylıy belä torgan bulsın ide.

Misal itep minem ikençe «Motılek» filmın alsak, biredä bäxet ideyasen kürä alabız. Älege kinonı karagannan soñ, barlık keşe dä üzen şundıy bäxetle keşe ikänen añlasa ide. Proektımnıñ töp geroy kızında «Motılek» sindromı, läkin şuña da karamastan, ul bäxetle.

Ä menä «Gran» kinokartinası turında süz alıp barsak, anıñ töp ideyase – döreslekne niçek bar, şulay kabul itü. Wirtual, uylap tabılgan dönyada yaşärgä kiräk tügel. Añlı räweştä, barlık gamälläreñä cawap birä alırlık yaşärgä kiräk! Filmnı karamagaç, minem süzlärne añlau awırrak bulır, läkin inde cäy aylarında proektımnı internet çeltärenä eläçäkmen. Biredä dä minem tamaşaçım barlıkka kiläçägenä ışanam.

- Festiwal turında närsä söyli alasıñ?

- Filmıbıznı 5 festiwalga cibärdek. Öç festiwalneñ bäyge programmasına ul inde ütte. Kalgan ike festiwalnıñ könnäre äle kilep citmäde. Berençe näticäne kürgän festiwal Kazan şähärendä ütte. Bezneñ gacäplänügä ul finalist däräcäsenä iya buldı. Döresen genä äytkändä, bez monı ber dä kötmägän idek. Çönki bäygeneñ geografiyase bik kiñ. Büläkläü tantanasında Mäskäü, Piter, Rostow-na-Donu, Ärmänstan, Ispaniyadän katnaşuçılarnı bilgelädelär. Ä menä iñ kızıgı Kazannı barı tik bez genä täkdim ittek. Bu minem rejisser

bularak berençe debyut filmım. Xäzer kabattan anı karap çıkkaç, barlık xatalarımnı da kürdem. Läkin, şuña da karamastan, ul üzeneñ tamaşaçısın taba alganına min bik şatmın. Miña kalsa, bu kinokartina barlık keşegä dä añlaeşlı tügel. Bu – psixologik drama. Şuña kürä, kiläse eşemdä barlık yullamalarımnı (posıl) ciñeläytergä buldım. Xäzerge wakıtta anıñ eş iseme «Motılek».

- Tamaşaçı kürä torgan berniçä minut artında gayat zur eş tora, şulay bit?

- Äye. Preprodakşn, prodakşn, postprodakşn wakıtında şaktıy zur eş eşlände, küp köç tügelde. Älege protsess, filmda grafik öleşlär bulganlıktan bik ozakka suzıldı. Bez anı 2017-nçe elnıñ martında töşerä başlagan idek. Ber el wakıt ütkännän soñ, min anı festiwalga cibärergä buldım.

- Kiläçäk plannarıñ nindi?

- Mart aenda miña 3 proektta prodyuser-administrator wazıyfasın başkarırga täkdim ittelär. Xäzerge wakıtta 3 proektta preprodakşn stadiyasendä. Martnıñ urtasında älege 3 proektka da start birergä toram.

- Nindi tanılgan şäxeslär belän eşläp karıy aldıñ?

- Tanılgan şäxeslär belän uzgan proektta eşlärgä turı kilde. Älege film –

Elizaweta Fedor kızı Romanowa turında. Rejisser rolen bezneñ ostazıbız Aleksey Aleksandr ulı Barıkin başkardı. Bu kinokartinada min rässam assistentı, administrator bulıp eşlädem. Semkalarda katnaşır öçen Andrey Ilya ulı Merzlikin häm Aleksandr Yakow ulı Mixaylow çakırılgan ide. Professional akterlar belän eşläü bik şäp! Alar yardämendä semkalar bik sıyfatlı, tiz ütte dip bula.

Dekabr azagında isä, ärmän rejisserı Guja Tadewosyan belän dä eşläp karau mömkinlege tudı. Min ikençe rejisser bulıp katnaşkan filmnıñ iseme «1 den». Töp rollärne başkarır öçen Natalya Berger häm Mikael Aramyan çakırılgan ide.

- Sälät Forumında üz rejisser säläteñne üsterergä plannaştırasıñmı?

- Älbättä, cıenam! Praktika kürsätkänçä, härber Forum uzganınnan yaxşırak. Bu elnı alar bötenläy 6 bulaçak! Älege san – tagın da kübräk eşläü, ilhamlanır, yaxşı energiya häm xis-kiçereşlär alır öçen menä digän etärgeç. Şunısı räxät – monıñ barısı da, Sälät moxitendä uzaçak. Bez inde äzerlänä başladık. Zarıgıp cäyne kötäbez!

Axırda, «HAVA-projects» media-kompaniyasenä miña, minem proektlarga härwakıt yardäm kürsätkäne öçen räxmät süzlären äytäsem kilä. Şulay uk Sälät Yortına da zur räxmätemne äytep kitmiçä bulmıy. Kızıklı fakt: minem «Motılek» filmında bäyläüçe element bulıp poçta tartması buldı. Älege tartmanı miña semkalarga näk menä Sälät Yortı birde. Şulay itep, älege poçta tartmasın proektımnıñ töp geroe dip tä sanap bula. (Elmaya)

- Sälättä böten keşeneñ häm böten närsäneñ sineñ öçen möhim buluı bezne bik şatlandıra! Uñışlar siña, Älfiya! Bez siña ışanabız!