ARTS BILER FORUM: 3 köndä 9 ör-yaña proekt! ← kire kaytirga

Bügen ARTS BILER FORUM-da teatr, muzıka häm biyu yunäleşläre buença icadi laboratoriyalär üz eşçänlegen başlap cibärde. Här yunäleştä öçär ostaz. Smena azagına alar katnaşuçılar belän berlektä 9 ör-yaña proekt äzerläyaçäk häm tamaşaçılarga 30 iyundä gala-kontsertta täkdim itäçäklär.

Laboratoriyalärdä katnaşu öçen kızlar häm egetlär kasting uzdı. Komandaga eläkmägännär smena däwamında Tatarstannıñ häm Rossiyaneñ tanılgan mädäniyat eşlekleläre master-klasslarında belem alaçak.

Muzıka yunäleşendäge kastingta 100dän artık yaş icatçı katnaştı. Här laboratoriyagä unbişär keşelek komanda cıeldı. Alar arasında cırçılar da, muzıkantlar da bar.

«Bez bu öç laboratoriyadä öç yaña äsär äzerläyaçäkbez. Berençese – tatar xalık köylärenä nigezlänep yazılgan cır yaki popurri bulaçak. Ikençese – Sälät cırlarına yaña karaş. Öçençe laboratoriyabez citäkçese – kompozitor, ul balalar belän bergä yaña formada klassik muzıka yazaçak, – dip söyli yunäleş citäkçese Zärinä Wildanowa. – Maksatıbız – balalarga, kollektiw citäkçelärenä tatar muzıkası, tatar cırları nindi bulırga mömkin ikänen kürsätü. Katnaşuçılar yaña forma, yaña stildä eşläp karasınnar ide. Kiläçäktä alar şuşı belemnären icatlarında kullanır, dip ömetlänäbez».

Teatr performanslarında isä 32 keşe katnaşaçak. «Üz rollärenä, obrazlarına turı kilgän balalarnı saylap aldık. Monda ciñüçelär häm ciñelüçelär yuk, barısı da ota, Bilärdän ber koçak belem häm täcribä belän kaytıp kitäçäklär», – dip äytä teatr yunäleşe öçen cawaplı Liliya Nurel. – Rejisserlar katnaşuçılar belän berlektä performans eskizı buldıraçak. Älbättä, ostaznıñ äsär kuelışı turında nindider küzallawı bar, ämma çın icat barı tik eş barışında gına tuaçak».

Rejisser Bulat Minkin «Sez işetmägän tatar äkiyatläre» äsären säxnäläşterergä cıena. Regina Sattarowa «Ike minut» monologın äzerli, Dinara Säyfetdinowa katnaşuçılar belän berlektä «Sämrux koşı riwayate» performansın kuyaçak.

Sälät masştablarında rekord – biyu yunäleşendä. Kastingta 400 keşe katnaştı. Här komandaga egermeşär biyuçe saylap alındı.

«Laboratoriyalärdä katnaşuçılar 3 kön däwamında ostazları belän bergä yaña biyu äzerläyaçäklär. Bu wakıt bik az, bilgele. Şuña tiz otıp aluçı, yañalıktan kurıkmauçılarnı saylap aldık. Kollektiwlarda çıgış yasauçılarnıñ kayberlärenä üz-üzlären kürsätüe awırrak ikänlege açıklandı, çönki alar ansambldä biergä iyalängän. Läkin laboratoriyalär här biyuçe öçen kızıklı täcribä, – di yunäleş citäkçese Wenera Galimowa. – Laboratoriyalärne Rossiya külämendä tanılgan xoreograflar citäkli. Bezneñ mädäniyatkä, muzıkaga, teatrga, goref-gadätlärebezgä alarnıñ üz karaşı. Töp maksatları – biyu aşa tatar mädäniyateneñ maturlıgın kürsätü. Şuña icadi laboratoriyalär «Tatar icatına yaña karaş» dip atala».