ARTS BILER FORUM. Icat öçen yaña kiñleklär açabız! ← kire kaytirga
Bilärdä ARTS BILER FORUM-nıñ icadi smenası däwam itä. Älege forumnıñ töp üzençälege bulgan laboratoriyalär belän berrättän monda biyu, muzıka häm teatr yunäleşläre buença master-klasslar da uza. Ostaxanälärdä balalar gına tügel, alar belän bergä kilgän kollektiw citäkçeläre dä katnaşa, üzläre öçen yañalık aça. Spikerlar Tatarstan gına tügel, Rossiya däräcäsendä tanılgan sängat eşlekleläre. Kayberläre belän däreslärdän soñ küreşep, forum turında fikerlären, xis-kiçereşlären beleştek.
Spikerlarnıñ berse – M.Cälil isemendäge Tatar akademiya opera häm balet teatrınıñ solistı Aysılu Mirxafizxan. Ul üze dä Sälät balası, kayçandır sälkeş, äydaman häm xätta başcitäk bulgan.
«Smenada katnaşuçılarnıñ xis-kiçereşlären yaxşı añlıym. Sälätkä kilgäç, dönya açılıp kitkändäy bula. Tirä-yundä sineñ kebek ük sälätle balalar, alarga karap yaña belemnärgä omtıla başlıysıñ!» – di Aysılu. Ul klassik biyu häm plastika buença ostaxanä ütkärä.
«Älbättä, xäzer modada kübräk zamança biyulär. Läkin balalarnı üsterä, kamilläşterä torgan biyu ul – klassik biyu. Çönki monda emotsiya genä tügel, baş ta eşli, – dip söyli biyuçe. – Däres başlanır aldınnan härwakıt balalardan nindi maksat belän kilüläre xakında sorıym. Mäsälän, bügen biyu texnikası «layfxak»ları belän büleşüemne soradılar, piruet, balans häm döres sikerü serläre belän urtaklaştım».
Sälättäge balalar belän eşläü ciñel häm räxät buluın Aysılu da, başka ostazlar da bilgeläp ütä. Mäsälän, Slawa Poluninnıñ akademiyasen tämamlagan professional kloun Ruslan Rimanas ta şul fikerdä. Ul balalarga kloun hönäre üzençälekläre turında söyläde.
«Master-klass bik yaxşı uzdı. Maksatım – balalarnı klounada tarixı häm teoriyase belän tanıştıru, praktik künegülär eşlätep karau ide. Balalar şundıy açık, härwakıt eksperimentlarga äzer. Bu – bik şäp, minemçä! – di Ruslan Rimanas. – Master-klassta küp igtibar plastikaga birelde. Balalar üzlären irken totarga, tirä-yaktagılarga karamıyça biergä, cırlarga, gomumän, küñel kuşkannı eşlärgä, elmaerga häm şatlık tudırırga öyrände!»
Ruslan äytüençä, balalar arasında üz tormışın kloun hönäre belän bäylärgä teläüçelär älegä bulmasa da, älege ampluada eşli alırlık katnaşuçılar bar ikän.
Cırçı Zärinä Xäsänşina forumga äle berençe tapkır gına kilä. Master-klassında ul xalık cırları turında söyläde. «Däreskä sängatkä gaşıyk, cırlıy, muzıkanı işetä belä torgan balalar cıelgan. Tawışları da şäp. Bez alar belän bergä wokaldagı iñ eş oçrıy torgan problemalarnı barladık. Döres sulış alu, tawışnı kiñäytü, bit muskullarınıñ kierenkelegen beterü buença künegülär yasadık. Ber-berebezne añlap eşlädek», – di ul.
Şunı da äytep ütärgä kiräk, küp wakıt däres uzgan çatırlarda balalar arasında başka yunäleş buença eşli torgan spikerlarnı da oçratırga bula. Çönki forum – yaş icatçılar gına tügel, inde täcribäle sängat eşlekleläre öçen dä täcribä urtaklaşu, yaña mäglümat alu mömkinlege. Här cirdän icat sarkıy!