Aygöl Gabdraxmanowa: «Tel häm tarix bezneñ öçen härwakıt berençe urında» ← kire kaytirga

Bıel Sälättä beryulı ike istälekle wakıyga bilgelänep ütä: Bilärgä berençe tapkır kaytuıbızga – 25, ä cıennarnı forum formatında ütkärä başlawıbızga 10 el! Bu cäyneñ täüge forumı, Sälät tormışındagı häm Bilär territoriyasendäge yañalıklar turında «Sälät» yaşlär üzäge direktorı Aygöl apa Gabdraxmanowa belän söyläştek.

- Här cäy saen sälkeşlärne gacäpländerergä tırışabız. Mäsälän, bıel forum territoriyasendä yaña art-obektlar buldırıldı. Izge Bilär cirenä ayak basuga uk, sälkeşlärne äydaman häm başcitäklär obrazındagı stendlar karşı ala. Alar zäwıklı, zamança kiemnän. Säxnädän erak tügel agaçtan yasalgan Sämrux koşı kalıktı, yanında gına balalar öçen mäydançık tözedek, tagannar kuydık. Sälkeşlär anda ber-berse belän aralaşıp, wakıtların faydalı itep uzdıra ala.

-  Katlaulı epidemiologik wäzgıyattä dä Sälät üz eşçänlegen däwam itä. Balalarnıñ iminlegen täemin itü öçen nindi çaralar kürelä?

-  Aldıbızda zur cawaplılık – bez balalarnı äti-änilärenä isän-sau kaytarırga tieş. Sälkeşlärneñ genä tügel, äydamannarnıñ, oeştıru komitetınıñ da sälamätlege möhim. Şuña bäyle räweştä, bez meditsina xezmätkärläre, Gadättän tış xällär ministrlıgı, Eçke eşlär ministrlıgı, küzätçelek organnarı, Rospotrebnadzor belän täülek bue elemtädä torabız. Forum territoriyasendä kullarnı antiseptik belän eşkärtä torgan sıekçalar bar. Bez könenä 2şär märtäbä tän temperaturasın ülçibez. Taläplär bik küp. Bez alarnıñ barısın da tögäl ütibez!

-  Forumnıñ här smenasınıñ üz yunäleşe. JUNIOR SKILLS BILER FORUM kiläçäk hönärlärenä bagışlangan. Balalar öçen ul nindi mömkinleklär birä?

- Balalar törle rayon, şähärlärdän kilä. Bälki, kayber hönärlär turında alarnıñ, gomumän, işetkäne dä yuktır. Biredä yaña yunäleş belän tanışıp, ostazlarga soraularıñnı birergä mömkin. Şul räweşle, balalarda kızıksınu uyana, yaña uy-teläklär tua.

- Bıel Tugan tellär häm xalıklar berdämlege elı. Forum programmasında ul niçek çagıla?

- Tel häm tarix bezneñ öçen härwakıt berençe urında. Smena programması monı açık kürsätä. Cırlar, biyulär, äydamannar belän aralaşu, kiçke çaralar, radioda yañgıragan cırlardan formalaşa ul. Sälättä tagın ekologiyagä dä zur igtibar birelä. Bıel maxsus mäydançıkta cämägat bakçası barlıkka kilde. Anda balalar üz kulları belän törle yaşelçälär, çäçäklär utırta. Sälkeşlär smena däwamında alarnı üzläre karap, tärbiyaläp toraçak. Şulay uk ekologiyagä bagışlangan däreslär dä ütä.