2017-nçe elnıñ iñ şäp cırın Alinä Şäripcanowa başkardı ← kire kaytirga
El däwamında Sälät proektları katnaşuçıları belän cäyge alannar, törle bäygelär kısalarında şaktıy küp awtor awtorlı cırlar icat itelä. Näk menä şul säbäple, Premiyadä maxsus – «Sälät cırlıy» nominatsiyase karalgan. Bu elnı ciñü tämen yaş «Sälät-Samara» alanı tatıp karadı. Ciñüçene internet çeltärendä açık tawış birü buença sayladılar. Şulay itep, «Sälät-Samara» alanı cırı öçen 762 tawış birelde. Cırnıñ başkaruçısı Alinä Şäripcanowa, süzlär awtorı Mödärris Kayumow, köy awtorı Miläüşä Xayrullina häm «Sälät-Samara» smenası direktorı Bulat Wäliullin belän älege cır tarixı turında söyläşep aldık.
Älege cırnı icat itüdä ni öçen katnaşırga buldıgız?
Alinä Şäripcanowa:
- Döresen genä äytkändä, artist öçen cır ul – bäläkäy bala sıman. Yaznıñ ber könendä cır awtorlarınnan miña bik kızık kına täkdim kilep ireşte. Älege cırnı başkarırga soradılar. Cır buença materialnı cibärgännän soñ, anıñ şunıñ kadär pozitiw, cılı, yaktı xislärgä bay bulganın añladım. Minemçä, bu cır äti-änilärennän nindider wakıtka erak bulgan balalarga bik zur yardäm bulaçak. Cırnı bez bik tiz yazdırdık häm soñınnan äzer wariantnı miña cibärgännän soñ, kilep çıkkan näticägä bik kuandım. Şunısı kızık, kuplettagı süzlär, frazalar tözeleşe bik üzençälekle. Tatar tıñlauçısı moña äle bik künegep betmägän, läkin min monı bik kızık format dip küräm. Cırnıñ ber «Sälam, Sälät» digän yulın alıp karasak ta, anıñ üze belän nindi tirän mägnä alıp kilgänenä inanabız.
Ägär dä miña kabattan şundıy täkdim kilep ireşsä, ber uylamıyça rizalaşırmın! Mondıy proektlarda katnaşu üzem öçen dä zur täcribä dip sanıym. Mödärris häm Miläüşä kebek awtorlar bulgan wakıtta yaşlär tatar muzıkası belän kızıksınaçak, tatar telenä tartılaçak dip sanıym.
Cırnı icat itüçe komanda niçek barlıkka kilde?
Bulat Wäliullin:
- Iñ baştan uk awtorlı cır icat itergä buldık. Läkin, kızganıç, anıñ niçek yasalganın belmi idek. Şul wakıtta bez barıbız da muzıka keşese – Mödärrisne iskä töşerdek. Barısın da söyläşep, cırnı icat itüçe komandanı ul cıyaçagın bilgelädek.
Älege cırnı icat itärgä närsä ilhamlandırdı?
Mödärris Kayumow:
- Sälät öçen cırlar yazırga bik yaratam! Icat cimeşlärebezne sälkeşlär cırlap yörgändä küñelem şundıy söenä! Dimäk, barlık yazgan cırlar da yukka tügel. (Elmaya)
Miläüşä Xayrullina:
- Tulısına Sälät xäräkäte ilhamlandırdı dip äytä alam. Çınnan da, balalarga istä kalırlık yaxşı, därtle, pozitiw köy icat itäse kilde.
Ni öçen näk menä älege alan öçen cırnı yazırga buldıgız?
Mödärris Kayumow:
- Yaznıñ ber könendä Almaz Şäräpow ( «Sälät-Samara-2017» äydamanı) «Sälät-Samara» alanına cır kiräk dip möräcägat itkän ide. Ul minem yakın dustım, şuña räxätlänep bulışırga rizalaştım. «Kart babayga» niçek yardäm itmiseñ inde?! (Kölä) Smena başlanır aldınnan tulı albom çıgarırlık material yazıldı, läkin, küñellärne dulkınlandırsın öçen töp cır östendä beraz kübräk eşlärgä, tırışırga turı kilde. Cırnıñ köen yaş häm bik talantlı kompozitor Miläüşä Xayrullina yazdı. Cırga cäyge käef kersen öçen, Miläüşägä Sälät turında küp kenä kızıklı xikäyalär söylädem. Ul kızıksınu xise belän yanıp kitte. Aranjirowkanı dustıbız Sergey Tutaew yasadı.
Cırga can kertererlek tawışnı bik ozak ezlädek. Cäy könnärendä cırçını tabırga kıen ikän. Barısı da gastrollärdä, sabantuylarda. Alinä Şäripcanowa rizalıknı beldergäç, küñel küklärne tişep, galämgä oçarday buldı.
Miläüşä Xayrullina:
- Älege alanda minem duslarım, şuña kürä rizalaştım da. (Elmaya)
Sezneñ eşegez iñ yaxşısı dip tanıluın kötkän idegezme?
Mödärris Kayumow:
- Bezneñ cır ciñüçe bulır dip ber dä uylamagan idek. Çönki, bezneñ «Sälät-Izge Çişmä» alanı belän berlektä 2016-nçı elda älege «Sälät-cırlıy» nominatsiyasendä inde töp büläkkä iya bulganıbız bar ide.
Şuña kürä, bu elnı, «Sämrux-2017» premiyasenä barı tik küptän küreşmägän duslar belän oçraşır öçen genä bardım dip äytergä bula. Ciñüçene iglan itkäç, berençe mizgeldä gacäpländem, ä annan soñ, mine söeneçle xislär zur dulkın belän bärep kitte. (Elmaya)
Barlık canatkan sälkeşlärgä, äydamannarga räxmätlärebezne belderäse kilä! Bar icatıbız näk menä sezneñ öçen! Bez sezne yaratabız!
Miläüşä Xayrullina:
- Ciñüne bik teli idem, läkin, şul uk wakıtta kötmi dä idem. Çönki älege nominatsiyadä bulgan barlık katnaşuçılar da bik köçle ide. Näticälärne iglan itkännän soñ, eçtä bulgan barlık xislär taştı! Läkin, iñ töp xis barıber şatlık ide. Filarmoniya säxnäsenä meñgändä, barlık keşelär dä siña kul çapkanda – ber närsä belän çagıştıra almaslık xis-kiçereşlär ul! «Sämrux-2017» premiyasennän istäleklär haman da küñelemne cılıta. Kabattan, barısına da räxmät süzlären äytäse kilä!
Bulat Wäliullin:
- Döresen genä äytkändä, finalga ütkän barlık cırlar da ciñüçe isemenä laek ide dip sanıym. Läkin, küñelemneñ eçendä barıber bezneke ciñer dip ömetlänä idem. Kabatlanmas xislärne toydım! Bu – eyforiya häm soklanu xise!