Ilnaz Safiullin: «BikaFest» – yazmışımnı bilgelägän tormış mizgele ul!» ← kire kaytirga
Röstäm Bikmullin isemendäge XVI Respublikaküläm «Bikafest» cır häm şigriyat festiwalendä katnaşırga teläk belderep gariza kaldırırga häm anıñ tarixına üz isemeñne östärgä sanaulı könnär kalıp bara. 2001-nçe eldan birle çarada 5 meñnän artık sälätle balalar häm yaşlär katnaşıp ölgerde. Küplär öçen Bikmullin festiwale üz-üzen tabu urını häm üseş mäydançıgına äwerelde.
Misalga, Ence Äxmätcanowa, üzeneñ 15 yaşendä festiwaldä inde 4 tapkır katnaşıp ölgergän. Uzgan el isä gran-pri däräcäsenä menep citte. Bulaçak hönären dä icat belän bäylise kilä di: «Katnaşkan dürt elımda da «Iñ osta awtor-başkaruçı» nominatsiyasen sayladım. Başta maxsus büläk, annarı 2-nçe urınga laek buldım, şunnan soñ berençelekne yauladım. Uzgan el isä gran-pri aldım. Kauşau, kurku xisläre här bäygedä dä bula, tik «BikaFest»ta küñelgä räxät, säxnägä çıgası da ciñel. Karşıñda utırgan jyuri da pozitiw käef çıganagı bulıp tora.Üzem 8 yaşemnän birle wokal belän şögıllänäm, fortepiano klassın tämamladım. Kazannıñ 111-nçe mäktäbendä 9-nçı sıynıfta ukıym, uzgan el muzıka mäktäben tämamladım. Şigırlär icat itäm, törle icadi bäygelärdä katnaşam. «BikaFest»ta barısı üzara dus, tatu, şuña da çıgış yasaganda üzemne duslarıma cırlaganday xis itäm. Älege festiwal yardämendä üzemä küp täcribä tupladım, här katnaşuçıdan üzemä ürnäk alırga tırışam», – di Ence.
«Sälät» tä, «BikaFest» ta sälätle yaşlärne häm fikerdäşlärne üzendä berläşterä. Ciñüçelär arasında bügenge tatar estradasınıñ yaktı yoldızları, şigriyat dönyasınıñ çın ilham çıganakları da bar. Alar inde xäzer üzläre katnaşuçılarga bäya birä.
«Sälät» proektları weteranı Yoldız Miñnullina bügenge yaşlärne ak könläşü belän küzätä: «Min «BikaFest»ta katnaşkan wakıtta bügenge kebek mömkinleklär yuk ide: yaktı, irken «Sälät» yortı da, bixisap proektlar da bulmadı bez üskän wakıtta. Şuña da cäyge alannardan soñ küreşü urını bulıp Bikmullin festiwale tordı. Monda ütkärgän könnär berkayçan da istän çıkmıy: kiç utırular, gitaraga kuşılıp cırlagan bard cırları, yakın duslar belän aralaşu... Bügenge yaş buınnı da festiwaldä katnaşırga çakıram! Oyalmagız! Üzegezne 200%-lık şäp itep kürsätegez!» – di Yoldız.
«Turkvision-2014» katnaşuçısı Aydar Söläymanow ta festiwaldä katnaşkan elların elmayu belän iskä ala: «2004-nçe elda min dä «BikaFest»ta katnaştım, 3-nçe urınnı yauladım. «BikaFest» ul – icatların başlap cibärgän şagıyr, cırçı, kompozitorlar öçen ber digän mäydançık. Üseş öçen dä biredä yaxşı şartlar tudırılgan: xätta bäyge barışında uk icadi duetlar, yaña cırlar tuganı berkemgä dä ser tügel. Şagıyrlär şigır icat itte, kompozitorlar – köy, wokalistlar anı şunda uk xalıkka täkdim dä itte. Bu bik matur küreneş! «BikaFest»ta katnaşıgız, ideyaläregezne çınga aşırıgız, tanışıgız, duslaşıgız, urtak icat tudırıgız!»
Şagıyr Rifat Salyax: «Röstäm Bikmullin festiwale turında berençe märtäbä «Sälät-Rauşan 2003» smenasında işetkän idem. Ni kızganıç, «Sälät»neñ küp proektlarında katnaşsam da, «Bikafest»ta bıltır häm öçençe el jyuri bularak kına katnaştım. Bik yaxşı festiwal! Bik talantlı egetlär-kızlar kilä! Alarga çın küñelemnän soklanam! Wakıt maşinasında ütkännärgä kaytıp bulsa, berençe eş itep şul festiwaldä katnaşır idem. Bıelgı katnaşuçılarga hämmäsenä dä uñışlar häm jyuriga saylap alu katlaulı bulunı telim. Bezneñ tatar xalkı talantlarga bay! Menä şularnıñ barsı da «Sälät»tä! «BikaFest» ta, «Sälät»neñ başka proektları da xalkıbızga sulış kebek kiräk!»
Tatar estradası yoldızı Ilnaz Safiullin da ciñüçelär isemlegendä. «Min 2002-2004 ellarda «Iñ osta awtor-başkaruçı» nominatsiyasendä katnaşıp berençelekne yauladım. «BikaFest» – minem öçen bik zur xatirä, däräcä, yazmışımnı bilgelägän tormış mizgele ul. Älbättä, festiwal eldan el üsä. Katnaşuçılarga barlık sälätlären tieşençä kürsätülären häm barı uñışlar teläp kalam. «Sälät»tägedäy cılı atmosferanı sez başka cirdä taba almassız. Katnaşıgız!» – dip belderde Ilnaz.
«Tatar radiosı» muzıkal redaktorı Robert Murtazin yaşlärgä kübräk xıyallanırga kiñäş itä: «Berniçä el däwamında festiwal kunagı buldım. «Sälät»tä min 5 yaştän. 2014-nçe elda «Sälät-Rauşan»da äydaman bulgan idem. «Sälät» minem öçen duslık, därt häm ilham çıganagı. Kurıkmagız! Xıyallanırga kurıkmagız!»
Festiwaldä 250-dän artık sälätle bala katnaşaçak. Katnaşırga teläüçelärneñ yaşe 12-dän alıp 30-ga kadär.
«BikaFest» festiwale tübändäge nominatsiyalär buença ütkärelä:
- iñ osta awtor-başkaruçı;
- iñ osta kollektiw-başkaruçı;
- tatar xalık cırın iñ osta başkaruçı;
- tatar kompozitorlarınıñ akademik äsären iñ osta başkaruçı;
- üz äsären iñ osta yattan ukuçı (şigır, proza, ädäbi-muzıkal kompozitsiya);
- başka awtor äsären iñ osta yattan ukuçı (şigır, proza, ädäbi-muzıkal kompozitsiya).
Festiwal 2001-nçe eldan «Sälät» berläşmäseneñ yakın häm kaderle dustı Röstäm Tälgat ulı Bikmullinnıñ isemen mäñgeläşterü maksatında oeştırıla. Bügen tatar estradası häm şigriyatendä isemnäre eş yañgırıy torgan Asılyar, Ilnaz Safiullin, Aydar Söläymanow, Läysän Äsxätowa, Miläüşä Safina, şagıyrlär Gölnaz Garipowa, Yoldız Miñnullina, Liliya Gibadullina, Läysän Fätxetdinowa, Alinä Bikmullina, Rifat Säläxow h.b. icat yulların «BikaFest»ta ciñülärdän başlagan şäxeslär. Bu isemlektä sin dä üzeñne kürä alaçaksıñ. Mömkinlekne kuldan ıçkındırma!
Katnaşu öçen garizalar 12-nçe noyabrgä kadär selet.biz saytında kabul itelä.