Sälkipuşlar ingliz telen öyränä ← kire kaytirga

Sälät oeşması bügenge köndä  mäktäp ukuçıları häm studentlarga östämä belem birü östendä genä eşläp kalmıyça,  mäktäpkäçä yaştäge balalarnı üsterü belän dä şögıllänä. «Bäläkäç» studiyasendä Sälät gailäläre sälkipuşları äle küptän tügel genä ingliz telen dä öyränä başladılar. Ni öçen näk menä älege fän saylap alıngan? Tieşle näticälär ozak köttererme? Bälki berençe uñışlar da bardır? Bu xakta bezgä «Bäläkäç» mäydançıgınıñ ingliz tele ukıtuçısı Rimma Gıyläcewa söyläde.

- Rimma, ni öçen ukıtuçı hönären saylarga buldıñ?

- Minem äniem dä ukıtuçı. Şuña da min kitap-däftärlär arasında üstem. Öyrätüçe uençıklar da bik oşıy ide. Äniem üze belän mäktäpkä alıp bargan kön çın mägnädä bäyrämgä äwerelä ide.

- «Bäläkäç»kä niçek kilep eläkteñ?

- KFUda ukıym, ispan telen häm ädäbiyatın öyränäm. Ukıtuçım – Dilärä Cäüdät kızı. Söyläm praktikası däresendä balalarga ingliz telen öyrätü telägem buluın äyttem. Ä ul minem Sälät aktiwistı buluımnı belä ide, şuña da «Bäläkäç» turında söyläde. Küñel türendä yörtkän xıyallarnıñ çınga aşuına ışanam, minem oçrak – şuña açık misal.

- Sälättä sin küptännän dimäk? Nindi proektlarda katnaştıñ?

- 2008-nçe eldan birle 18 tapkır sälkeş buldım bit min! «Sälät-Kir» (xäzer «Sälät-Sanak»), «Sälät-Şäxes», «Sälät-Arşan», «Sälät-Sanak», «Sälät-Ruxiyat» smenalarında yal ittem, yazgı häm közge sessiyalärdä katnaştım. Äydaman, ukıtuçı bularak ta üzemne sınap karadım. Bıel isä berençe tapkır «Sälät-Ruxiyat» alanına ölkän äydaman bularak baraçakmın. Äle Bikmullin festiwalendä dä katnaşkanım bar, dus kızlarım belän magnitofon otkan idek! (Kölä)

- Ni öçen ingliz telen keçe yaştän ük öyränü kiräk?

- Sälät liderlarınnan härdaim Sälät – öç telle moxit digän süzne işetäbez. Iseme cisemenä turı kilsen öçen iñ keçkenä Sälätlelärdä dä ingliz telenä mäxäbbät uyatırga kiräk. Bügenge köndä ingliz tele yaña termin da, moda da tügel, ä kiräkle belemgä äylände. Balaçakta keşe tellärne tizräk üzläşterä. Şäxsän üzem äniemnän gel nik ingliz telen keçkenädän öyrätmädeñ dip sorıym. Miña kalsa, bügen anı öyrängändä  miña küpkä ciñelräk bulır ide.

- Bezneñ sälkipuşlarga ingliz tele niçek birelä?

- Dekabr aenda şögıllänä başladık. Isänläşergä, üzebez turında söylärgä, sanarga, ciläk-cimeş häm tugannar isemnären öyrändek.

- Balalarnı kızıksındıru ciñel eş tügel şul.

- Şuña da bezgä kunakka eş kına Mikki Maus belän Goga (multfilm geroyları) kilä. (Kölä)

- Sineñ öçen «Bäläkäç» närsä ul?

- «Bäläkäç» – bik kızıklı proekt. Üzemne wakıt kiseleşendä kebek xis itäm: ütkän häm kiläçäk zamannarda. Sälät weterannarı häm sälkipuşların küzätüe bik kızık. Minem balalarım da kiläçäktä biregä yörsen ide dip xıyallanam.

- Bezgä teläkläreñ?

- Küp-küp faydalı däreslär telim! Alarga yörüçe balalar sanı da artkannan-artsın ide!

- Räxmät, Rimma! Siña da uñışlar!