Ädip Älmir kubogına şaxmat turnirı ← kire kaytirga
2-nçe aprel könne Sälät yortında Ädip Älmir kubogına «Atlant» şaxmat klubı turnirı uzdı. Turnirda 5-48 yaş aralıgındagı barlıgı 26 keşe katnaştı. Alar Kazan şähärennän, Tatarstan rayonnarınnan cıelgan ide.
«Bezne intellektual uennarga, şaxmatlarga bulgan mäxäbbät berläşterä. Şuña da turnirıbız dustanä häm räxät moxittä uza», – dip belderde Sälät klubı prezidentı Igor Smirnow.
Çınnan da, ciñü yaulau teläge zur bulsa, duslık xisläre östenräk bulıp çıktı. Kemder ottırgannan soñ da köndäşenä uñışlar teläde, ikençe beräülär xataların analizladı.
Bıel turnir öçen äylänmäle sistema saylangan ide. Här katnaşuçı da böten köndäşläre belän uynap çıga aldı. Barlık katnaşuçılar da 3 kategoriyagä bülengän ide: ir-atlar, xatın-kızlar häm balalar.
Iñ keçkenä katnaşuçı Dilä Zakirowaga nibarı 5 yaş kenä buluga karamastan, ul bik osta uynıy. Änise Gölnaz Zakirowa süzläre buença, şaxmat uenı alar gailäsendä poçetlı urınnı bili. «Şaxmat dönyasına mäxäbbätne däü ätiläre tärbiyaläde. Ulım Danil da 3 yaşennän birle şaxmat uynıy, ber genä yarışnı da çitlätep uzmaska tırışabız. Ädip Älmir kubogı yarışlarında da berençe tapkır gına katnaşmıybız. Bıel kızımnı da alıp kilergä buldım, Sälät moxiten toep üssen dim. Şaxmat buença berençe adımnarın näk menä Sälättä yasawın telim», – dip belderde Güzäl.
«Barısı da bik äybät uzdı, añlaşılmauçanlıklar bulmadı. Katnaşuçılar söenderde, absolyut ciñüçelär dä buldı. Miña da citäkçe, oeştıruçı bularak «Atlant» şaxmat klubı zur täcribä tuplarga yardäm itte», – dip, xis-kiçereşläre belän proektnıñ citäkçese Göldaniya Bulatowa da urtaklaştı.
Här şaxmat söyuçegä katnaşuı turında tanıklık tapşırıldı, ciñüçelärgä istälekle büläklär dä baytak buldı: «Kıstıbıy» kompaniyasennän tämle prizlar, «Need for speak» tellär mäktäbennän tanıklıklar, «Knitka», «Balmy» proektlarınnan büläklär dä birelde.
Keçe törkemdä ciñügä Danil Zakirow laek dip tabıldı. Ir-atlar törkemendä Azat Xörmätullin, xatın-kızlarda Adilä Zinnätullina ciñüçe bularak tanıldı.
«Uen ciñel birelmäde, tik şulay da berençe urınnı yaulıy aldım. Oeştıruçılarga räxät moxit häm eçtälekle turnir öçen räxmät! Barısı da bik oşadı!» – dip fikeren citkerde Azat Xörmätullin.
Sälät media-mäktäbe ukuçısı Alinä Sısoewa