«Sälät-Aksubay» klubı tugan könenä çakıra! ← kire kaytirga

Sälät berläşmäseneñ sälätle yaşläre belän eşçänlek el äylänäse bara. Sälät yortınnan kala aktiwistlarıbız üz rayonnarındagı Sälät klublarında cıela.

Ber aydan «Sälät-Aksubay» klubı berençe zur datasın – 1 yaşlek tugan könen bilgeläp ütäçäk. Anıñ sälkeşläre küp kenä Sälät proektlarında katnaşıp ölgergännär: zur delegatsiya belän Bilärdäge «Fänsar» fän häm mägarif üzägendä uzgan Änwär Xäyri ukularına kilgännär; «Sämrux» el premiyasendä «El pabligı» nominatsiyasendä üzlären sınap karagannar. Ä «Sälät-Aksubay» klubı räise Läylä Moratşina «El sälkeşe» nominatsiyasendä TOP-8 sälkeş arasına kergän.

Klub kısalarında aralaşu tatar telendä bara. Balalar tatar telen, traditsiyalärebezne häm mädäniyatebezne saklap kalırga tırışa. Tatar telenä bagışlangan aktsiyalärdä katnaşalar, mäktäplärendä dä tatar tele atnalıgı uzdırgannar. Bu cäyne mäktäpläreneñ 26 ukuçısı Sälät forumınıñ 2 smenasında katnaşkan. KWN, QUIZ häm sport çaralarında üzlären kürsätkännär.

Här sişämbe klubnıñ aktiwistları kiñäşmägä cıela. Ul, Sälät çaralarına xas bulgança, şämçek belän tögällänä ikän. 2017-2018-nçe uku elına yul kartası inde tözelgän.

Sälkeşlär zarıgıp Klublarınıñ tugan könen kötälär. Çönki anıñ kısalarında Açık işeklär köne uzdırırga planlagannar. Bez dä, üz çiratıbızda, barlık Sälät aktiwistların çakırıp kalabız! Ul 28-nçe oktyabr könne, 11:00, 3-nçe Aksubay  urta belem birüçe mäktäbendä uzaçak.

Yakın kiläçäkkä bulgan plannar belän dä tanışıp ütik. 21-nçe oktyabr könne Alsu apa Gataullina katnaşında Fänni yarışlar çempionatı uzaçak. Top-spiker, Open mic, Intuitsiya uenı, «Aksubay kiçläre» icadi kiçäse, ÇGK, QVIZ, Tübätäy uenı, sport çaraları, şaxmat-şaşka turnirları da el däwamında ütkäreläçäk.

Läylä Moratşina, klub räise:

-         Duslar, aktiw häm initsiatiwalı bulıgız! Bez sezneñ täkdimnäregezgä härwakıt şat. Menä min, mäsälän, Klubnı açtım häm anıñ räise buldım. Nik disezme? Çönki minem öçen Sälät – gailä, duslar, ostazlar häm üseş moxite ul. Inde öçençe el rättän «Fänsar» mäktäbendä belem alam. Sälät mindä KWN uenına mäxäbbät uyattı. Tagın räsem yasarga yaratam. Klubta gailä moxite buldırırga, komanda ruxı tuplarga tırışam. Bez ber-beregezgä härdaim yardäm iteşep torabız. Sin dä bezneñ saflarga kuşıl! Bergä bulganda bez köçle!