Sälät klubları 2017-nçe elga eş planın täkdim ittelär ← kire kaytirga

3 kön däwamında berläşmäbez aktiwistları Sälät klubların üsterü häm nıgıtu buença maxsus däreslär aldılar, alarnı praktikada sınap karadılar. Misal öçen, wakıtnı niçek döres itep bülü, google-programmalar serläre, seminarlarda katnaşunıñ otışlı yakları, klub eşçänlegeneñ yaña formatı, h.b.

«Här katnaşuçı – şäxes, bergä bulganda isä ber agımnı xasil itäbez. Min sezne kotlıym: bezneñ öçen bu oçraşu – zur wakıyga, Sälät klubları – olı şatlıgıbız. Şuña da sezgä çiksez räxmätlebez! Kön saen eşli torgan xezmätebez dä urtak maksatıbızga ireşü öçen bit. Kiläçäkkä dä plannarnı bergä korıyk, bergä bulıyk!» - dip belderde «Sälät» Fondınıñ başkarma direktorı Timur Söläymanow.

Seminarnıñ töp yunäleşe bulıp 2017-nçe elga yul kartası tözü, tagın da sıyfatlırak häm näticäleräk eş planın tözü tordı. Här klub üz eşçänlegen täkdim itte: hämmäseneñ çıgışı üzençälekle häm kabatlanmas ide. Kemder zamança yaña texnologiyalär belän ilhamlanıp klubı xakında «Wkontakte» sotsial çeltäre misalında söyläde. Ikençe beräülär klubın çäçäkle waza belän çagıştırdı.

Seminarnıñ tagın ber möhim yunäleşe bulıp standart bulmagan çaralar oeştıru häm uzdıru tordı. Katnaşuçılar şähär buença roliklarda yörü marafonı,  regbi, «Pole çudes», «Acagan» uennarın täkdim ittelär.

Seminar eş planına korılgan bulsa da, icadi kiçälärsez, intellektual häm sport çaralarınnan başka uzmadı. Töp sport çarası bulıp 444 baskıçlı «Izgelär tawı»na menü bulgandır. Sälät klubı prezidentı Igor Smirnow üze yazgan cırın barlık katnaşuçılarga büläk itte. Älege cır barıbıznıñ küñelen cilkenderde, ilhamlandırdı.

Skype aşa Sälät proektları citäkçese Ädip Älmir belän aralaşu bäxetenä ireştek. Katnaşuçılar çit illärdäge Sälät klubları xakında kızıksındılar, borçıgan mäsäläläre turında kiñäşläştelär, sorauların birdelär: elektron kitap yaxşırakmı, ällä basmamı, «Sämrux» süzeneñ mägnäse nindi, yaña smenalar küp açılu arkasında elekkegeläre yabılmasmı, h.b.

«Barısı da sezdän tora. Bezneñ ber genä smenanı da yabasıbız kilmi. Sälät ul – xäräkät, sistema, agım. Anıñ töp burıçı – üzeneñ üzäklären, infrastrukturasın kamilläşterü. Üseşkä bez şat kına», - dip cawap kaytardı Ädip Älmir.

Klublarnıñ üseşe xakında da süz buldı: «Klubtagı töp element – sälkeşlär. Alar berläşmäbez belän bergä üsälär, nıgıylar. Klub, obrazlı itep äytkändä, kaynar miç ul. Anıñ utında cılınıp bula, ber-bereñä yakınaep bula. Sälät bulganda anıñ klubları da bulaçak. Klublar bulganda – Sälät yaşär», - dip belderde Sälät proektları citäkçese.

«Sälät klubları seminarı – bezneñ eşçänlekneñ impulsı ul. Bu yulı  da şulay buldı. Seminar ähämiyatle çaralar bay ide. Minemçä, Ädip Älmir belän uzgan wideo-konferentsiya berkemne dä bitaraf kaldırmagandır. Mine, şäxsän, bik ilhamlandırdı. Ul bezgä barlık burıç häm maksatlarnı tögäl itep añlata belde, borçıgan soraularga cawap birde. Yaşel Üzän aktiwistları energiya alıp kayttı! Aktiw eşçänlegebezne däwam itärgä äzerbez!» - dip belderde «Sälät-Yaşel Üzän» klubı räise Timerxan Şäyxetdinow.

«Bez däreslär ukıp kına kalmadık, başka klub wäkilläre belän täcribä urtaklaşırga da ölgerdek. 3 kön buena komandada eşläü bezne tagın da berläşterde. Seminar bik produktiw häm faydalı bulıp isemdä kaldı», - dip citkerde «Sälät-Bögelmä» klubı aktiwistı Aida Gazizowa.

Bu fiker belän barlık katnaşuçılar da kileşer dip uylıym. Ber süz belän genä äytkändä, seminar bik şäp uzdı.