«Sälätkä nur bulgan yoldızlar» - yaña formatta! ← kire kaytirga

«Sälätkä nur bulgan yoldızlar» konkursınıñ garizalar kabul itü kampaniyase 1-nçe iyungä kadär ozaytıldı!

⠀Garizalar selet.biz saytında, ä konkurs eşläre selet.nur@gmail.com poçtası aşa kabul itelä. Ädäbi konkurs turında tulırak bezneñ saytta PROEKTLAR bülegendä tanışırga mömkin.

⠀Konkurs üze kayçan bula soñ, dip sorasagız, bıel ul yaña formatta uzaçak. Bäyge ARTS BILER FORUM kısalarında küçmä mäktäp formatında oeştırıla! Katnaşuçılarnı 3 könlek tıgız programma: konkursnıñ jyuri ägzaları belän äñgämä, ekspertlar belän eşläü, spikerlar belän oçraşu häm başkalar kötä. Häm küçmä mäktäpneñ näticäse bularak, «Sälätkä nur bulgan yoldızlar» konkursınıñ finalistların büläkläü tantanası uzaçak.

⠀ARTS BILER FORUM-da (27.06-02.07) uzaçak küçmä mäktäpkä barı tik 80 katnaşuçı çakırıla. Alar arasınnan ekspertlar iñ-iñnären saylayaçak.

Üzgäreşlär turında tulırak «Sälätkä nur bulgan yoldızlar» konkursınıñ koordinatorı Aygöl Wäliullina söyläde:

– Bıel «Sälätkä nur bulgan yoldızlar» yaña formatta uzaçak, mondıy formatnıñ äle bulganı yuk ide. Zamanında bezneñ «Akkoş küle» digän klub eşlägän, şunıñ kısalarında gına nindider keçkenä genä oçraşular oeştırılgan. Ä menä küçmä ädäbi mäktäp yuk ide äle. Bıel bezgä bäxet elmaydı: «Sälätkä nur bulgan yoldızlar» proektı belän grant ottık! Şuña kürä konkursnı yaña formatta ütkärü mömkinlege açıldı.

Küçmä mäktäp 27-nçe iyun-2-nçe iyul aralıgında uzaçak ARTS BILER FORUM wakıtına turı kilä. Dimäk, «Sälätkä nur bulgan yoldızlar» konkursınıñ saylap alu turın ütkännär beryulı ike kuyannıñ koyrıgın tota alaçak! Berençedän, ARTS BILER FORUM-da katnaşalar. Forumnıñ üz programması, ul bik kızıklı bulaçak. Yukka gına ARTS BILER FORUM-nı iñ icadi forum dip atamıybız – ul çıp-çın icat dönyası! Ikençedän, «Sälätkä nur bulgan yoldızlar»nıñ üz programması da şäp häm faydalı bulaçak. Xäzerge wakıtta programmanı eşlibez. Törle spikerlarnı çakırabız. Şunı xäzerdän ük äytä alam: härwakıt bezneñ belän tıgız elemtädä bulgan «Yalkın», «Idel», «Kazan utları» jurnallarınıñ baş möxärrirläre häm xezmätkärläre küçmä mäktäpkä spiker bularak çakırulı.

Bu proekt küçmä mäktäp belän genä çiklänmi, kiläçäktä dä zur eşlärebez bulaçak. Sentyabr aennan Sälät Yortında ädäbi yunäleştä kurslar başlanaçak. Oktyabr aenda ikençe küçmä mäktäp uzaçak. Häm «Akkoş küle» klubı eşçänlegen dä yañartıp cibäräçäkbez.