Sälät «Almagaç» mäktäbendä Belem bäyräme uzdı!

1nçe sentyabr – här elnı barısı öçen dä üzençälekle, kürkäm ber data. Ul belem dönyasına yaña adım yasau, yaña ömetlär, yaña maksatlar belän uku elına ayak basu köne. Sälät «Almagaç» mäktäbendä dä bügen yaña uku elı başlanıp kitte. «Açış» gimnaziyasendä Belem bäyräme görläde häm berençe saf ukuçıları öçen täüge kıñgırau çıñı yañgıradı.

Ukuçılarnı közneñ berençe bäyräme belän TR Räise yardämçese, «Aldıngılar xäräkäte» oeşmasınıñ respublika bülege citäkçese Timur Söläymanow kotladı:

«Bezdä bügen zur bäyräm! Şuşı matur bakçada niçänçe el däwamında Sälät «Almagaç» mäktäbe üsep kilä. Älbättä, monda mömkinleklär moxite. Bez Sälät belän bergä şuşı mömkinleklär moxiten üsteräbez häm biredä iñ şäp gimnaziya eşlärgä telibez! Bu bezneñ urtak eşebez. Barlık ukuçılarga da zur uñışlar telibez!» - dip belderde ul.

Bulaçak tözüçelär, jurnalistlar, ukıtuçılar, injenerlar, tel belgeçläre, yözüçelär, şaxmatçılar, muzıkantlar bäyräm lineykasınıñ bizäge buldı, kilgän kunaklarga şigırlären söyläde. Şulay uk ukuçılarnı häm kilgän kunaklarnı Ilgiz Şäyxraziew häm Malsi Music maxsus çıgışları belän söenderde. Alda sälätl balalarnı belem ilenä säyaxät, bersennän-berse mawıktırgıç däreslär kötä. Uku-ukıtu programması Sälätneñ öç telle moxit buldıru printsibına nigezlänep äzerlänüe häm däreslärneñ tellär öyränü belän baetıluı xakında «Sälät» mägarif häm uku-ukıtu texnologiyaläre üzäge citäkçese, Sälät «Almagaç» mäktäbe kuratorı Dilärä Yakubowa iskärtep ütte.

Biredä balalarnıñ räxätlänep belem aluı, şäxes bularak formalaşuı, sälätlären üsterüläre öçen barlık mömkinleklär dä tudırılgan: zamança cihazlandırılgan sıynıflar, küpfunktsiyale aktlar zalı, sport zalı, sport mäydançıkları, basseynnar, irken aşxanä.

107 nçe nomerlı «Açış» gimnaziyaseneñ direktorı Anastasiya Akmaewa tantanada ukuçılarga karata ömetläre belän urtaklaştı:

«Bu uku elında bezne yaña berençe sıynıf ukuçıları, şulay uk yaña altınçı sıynıf ukuçıları kötä, alar Sälät «Almagaç» mäktäbe proektı belän bergä gimnaziyabezneñ işeklären açtılar. Bıel bezne küp yaña açışlar häm zur kazanışlar kötä. Ukuçılarıbıznıñ uñışlarga ireşäsenä ışanam».

Sälät «Almagaç» mäktäbe ukuçıları el däwamında Sälättä häm mäktäptä uzdırıluçı proektlarda, çaralarda katnaşa. Gailälärneñ ber-berse belän yakınnanrak tanışuı, kızıksındırgan soraularına cawaplar tabuı öçen küçmä sessiyalär, törle ölkälärdäge tanılgan şäxeslär belän oçraşular oeştırıla. Ukuçılar törle kontsertlarga, ekskursiyalärgä, teatrlarga, muzeylarga, kürgäzmälärgä yöri. Ukuçılar yaña uku elında da Sälät berläşmäseneñ törle proektlarında häm çaralarında katnaşıp, belemnären tiränäytäçäk häm yaña täcribä tuplayaçak.

Belem dip atalgan mogcizalı ilneñ işekläre ukuçılarıbız öçen kiñ açılsın, yaña uku elı küñellärendä matur xatirä bulıp uelıp kalsın!