Fänni potentsialnı üsteräbez ← kire kaytirga

15-nçe aprel könne Sälät yortında M.I. Mäxmütow isemendäge Respublikaküläm «Fänsar» mäktäbeneñ fänni-praktik konferentsiyase uzaçak. selet.biz saytında baruçı terkälü tämamlanuga nibarı 2 atna wakıt kalıp bara. Dustım, sin fän belän kızıksınasıñmı? Bälki sineñ arsenalıñda fänni proekt ta bardır? Ul da bulmasa, fänni yunäleştä üzeñne sınap karıysıñ, tagın da üsäseñ kiläder? «Fänsar» mäktäbe ukıtuçısı Alsu Gataullina konferentsiyaneñ barlık serlären dä çişärgä äzer.

- Alsu, çarada kemnär katnaşa ala?

- Här teläk beldergän, fän häm küzätü-tikşerülärne söyuçe yugarı sıynıf ukuçısı.

- Prioritetlı yunäleşlär barmı?

- Yuk, här yunäleş tä bik ähämiyatle. Bez balalarga alarnı kızıksındırgan yunäleştä belem birügä şat kına bulırbız.

- Sine şäxsän nindi fännär kızıksındıra?

- Matematika häm tarix.

- Konferentsiyadä katnaşu ni birä?

- Zur täcribä, üz köçeñne sınap karau häm mawıktırgıç fän dönyasına kızıklı säyaxät.

- Fänni mäkalälär cıentıgı dönya küräçäkme?

- Äye! Közgä taba ölgertergä uylıybız.

- Konferentsiyadä katnaşuçılarga kiñäşläreñne bir äle.

- Mäsäläneñ çişeleşenä standart bulmagan yullar ezlägez, fängä başka rakurstan küz salıgız. Üz öleşegezne kertergä dä onıtmagız! Fän ul – citdi häm totrıklı töşençä, ä sin – anıñ ber öleşe, aña üzgäreşlär kertergä sälätle şäxes. Şunı añlau bik möhim.

- Sälätkä niçek kilep eläkteñ? Nindi proektlarda, smenalarda katnaştıñ?

- Sälättä min 2001-nçe eldan birle. «Ruxiyat», «Arşan», «Sanak» smenalarında yal ittem, «Fänsar» mäktäbeneñ közge häm yazgı sessiyalärendä buldım, forum, festiwallär, «Äydamannar mäktäbe»nnän dä çittä kalmadım.

- Bügen ni säbäple näk menä «Fänsar»nı sayladıñ?

- Biredä min üzemne katnaşuçı, annarı äydaman, başcitäk rolendä dä sınap karadım. Bügen inde min ukıtuçı. Nik «Fänsar» disezme? Çönki näk menä biredä öyrätep tä, öyränep tä bula. «Fänsar» – täcribä urtaklaşır öçen dä ber digän urın.

- Şäp! Räxmät! Konferentsiyadä küreşkängä kadär!