Yaña räis belän tanışabız ← kire kaytirga

Sälät – el däwamında talantlı balalar häm yaşlär belän eşläüçe berläşmä. Kızu cäydä forum, törle profille smenalarda katnaşsalar, uku elı wakıtında Sälät yortında uzuçı häm Tatarstan Respublikası, Samara ölkälärendä eşläüçe klublar eşçänlegendä katnaşa alalar.

5-nçe oktyar könne ber törkem aktiwistlar, Sälät klubı prezidentı Igor Smirnow belän berlektä, «Fänsar» uku-ukıtu üzägendä uzdırıluçı Sälät klubları seminarına yul tottılar. Şularnıñ berse, «Sälät-Bögelmä» klubı turında söyläşep aldık.

Ser tügel, «Sälät-Bögelmä» klubınıñ plannarı zurdan, alar alga taba da Sälät belän kulga-kul totınışıp eşlärgä telilär. Klub 2013-nçe elda 2-nçe nomerlı litsey karşında oeşa. Bıelgı iñ zur yañalıkları – klub räise itep Aliya Rizwanowa saylangan.

- Aliya, sine yaña status aluıñ belän kotlıybız. Niçek älege eşkä alınırga buldıñ?

- Bezneñ klubta komitetlar buença büleneş bulsa da, bez barlık eşlärne bergäläşep eşlibez. Minem citäkçe bulıp kitüemdä dä bezneñ zur komanda gaeple. (Kölä)

- Aliya, sineñ öçen Sälät närsä ul?

- Sälät – üzemne azat itep xis itä torgan urın. Ul minem barlık başlangıçlarımda da teräk. Monda tanışkan häm duslaşkan keşelär belän tormışka yañaça karıy başladım.

-  Berläşmäneñ nindi proektlarında katnaşkanıñ buldı?

 - Sälättä min 2016-nçı eldan. «Sälät-Tel», «Sälät-Bögelmä», «Sälät-Bilär kalası», «Fänsar» mäktäbe sessiyalärendä katnaşkanım buldı.

- Närsälär belän kızıksınasıñ?

- Ber genä sekund buş wakıtım bulsa, teatr tügärägenä yörim, räsem yasarga yaratam.

- Ni öçen yaşlärgä Sälätkä kerep kitü kızıklı bulır dip uylıysıñ?

 - Bez törle çaralar gına ütkärep kalmıybız, ber-berebezgä teräk tä bulıp yaşibez. Bezneñ klub – ul gailä. Klub öçendäge atmosferaga karap, klubnıñ kiläçäktä kiräkme-yukmı ikänen analizlap bula.

- Uzgan el, Bulat Wäliullin citäkçelek itkändä, klubıgız «Sämrux 2016» el premiyase nominantı bulgan ide. Bıel da uñışlar teläp kalabız.

- Räxmät!