«Iske Kazan cıenı 2017» festiwale ← kire kaytirga

19-nçı awgust könne, 14:00, Iske Kazan muzey-tıyulıgı territoriyasendä (Tatarstan Respublikası, Biektau rayonı) «Iske Kazan» profille smenası kısalarında traditsion «Iske Kazan cıenı» hönäri ostalıklar festiwale ütäçäk. Biredä Tatarstannan, Räsäy töbäklärennän kilgän sälätle balalar häm yaşlär katnaşa. Şulay uk «Iske Kazan» katnaşuçıları yanına «Sälät-Şäxes», «Sälät-Imänkäy» alannarı sälkeşläre dä kilüe kötelä. Festiwaldä Sälät weterannarı, dusları, ukıtuçıları häm tarix belgeçläre dä katnaşaçak.

Çaranıñ programması traditsion hönärlärne öyränü, saklap kaluga yunälderelgän. Cıen Tatarstan Respublikası balaları häm yaşläre arasında Bötendönya WorldSkills standartlarına turı kilüçe eşçe hönärlärne populyarlaştırunı da maksat itep ala.  Festiwal kısalarında mädäniyat häm sängat eşlekleläre, kul eşläre ostaları, WorldSkills milli çempionatı prizerları belän oçraşular da planlaştırılgan.

Katnaşuçılar üzläre aktiw räweştä Cıenga äzerlänälär. Här alan üz yunäleşe buença ostaxanä ütkärergä äzerlänä: «Sälät-Şäxes» sälkeşläre säxnädä çıgış yasau serlären çişäçäk, «Sälät-Imänkäy» intellektual uen uzdıraçak, «Iske Kazan» katnaşuçıları «Altın kullar» master-klassın ütkäräçäk.

Festiwal kısalarında el saen tatar xalkınıñ  milli bäyräme Sabantuy uza. Ul bıel da bulaçak. Teläüçelär çülmäk watu, kapçık kiep sikerü, arkan tartışu kebek uennarda üzen sınap karar.

Yomgaklauçı çara bulıp zur kontsert toraçak. Biredä katnaşuçılarnıñ cır, biyulär, KWN mäzäkläre belän çıgışları kötelä. Barıgıznı da hönär, traditsiya häm tatar tele bäyrämenä çakırıp kalabız!