«Ostazlarnı, gailälärne häm sälkeşlärne berläştergän forum»: Sälät Bilär Forum smenası tämamlandı. ← kire kaytirga
Bilärdä XIV Xalıkara «Sälät» yaşlär uku-ukıtu forumınıñ traditsion häm iñ kötep alıngan smenası tämamlandı. Bu yulı kunakçıl Bilär cirendä 7 kön däwamında katnaşuçı häm oeştıru komitetınnan torgan 1200 artık keşe yaşäde. Katnaşu öçen «Sälät» berläşmäseneñ tübändäge profille smenalarnıñ bersenä saylap alu etabın uzarga kiräk ide: «Rauşan», «Bilär kalası», «Gayrät», «Aznakay», «Ruxiyat», «Saba». Yomgaklau kiçäsendä Sälät berläşmäse aktiwistları häm alannar kötep algan büläkläü tantanası uzdı.
Katnaşuçılarga yugarı abruyların tanu yözennän Sälätneñ III däräcä kömeş 8 taclı yoldızlar häm Sälät berläşmäseneñ nıguına zur öleş kertkännäre öçen Sälätneñ II däräcä altın 8 taclı yoldızlar, ä aktiwistlarga xezmätlären tanu yözennän ölgergänlekne simwollaştıruçı şämäxä töstäge futbolkalar tapşırıldı. Şulay uk yabılu tantanasında smena kısalarında uzdırılgan yarışlar ciñüçelären dä bilgelädelär. Smena barışında alannar sport çaralarında, mädäni häm intellektual çaralarda üzara yarıştılar.
Sälät Bilär Forumda gadättägeçä alannarnıñ profille tematikaları: fän, icat häm sängat, sport belän bäyle laboratoriyalär formatında gamälgä aşırıldı. Smena kısalarında belem birü sessiyaläreneñ Tatarstan häm Rossiyaneñ iñ aldıngı spikerları häm ekspertları belän interaktiw formatları planlaştırılgan ide.
Şulay uk Forum kısalarında «Sälät» yaşlär berläşmäseneñ berniçä zur proektı da tormışka aşırıldı. Şularnıñ berse - «Ostaz» proektı. 9 iyuldän başlap 12 iyulgä kadär Bilärgä Kazan şähäre, Tatarstan Respublikası häm kürşe töbäklärdän gomumi belem birü oeşmalarınıñ pedagogları, ukıtu, tärbiya eşe häm milli mäsälälär buença direktor urınbasarları, pedagogik yunäleşlärdäge yugarı häm urta hönäri belem birü mägarif oeşmalarınıñ ölkän kurs studentları cıeldılar. 4 kön däwamında katnaşuçılar öçen ekspertlardan unikal belem häm täkdimnär alu, belem birü häm mädäni programmalarda katnaşu, üzlären kürsätü aşa üz kompetentsiyalären üsterep, başka katnaşuçılar häm ekspertlar belän hönäri, mädäni elemtälär urnaştıra, täcribä urtaklaşu mömkinlege tudırıldı.
Sälät Bilär Forumnıñ tagın ber istä kala torgan çarası bulıp Bilär tarixı buença ütkärelä torgan «Tamırlar» olimpiadası. Altı alannıñ katnaşuçıları ber-berse belän sınaşıp, näticädä şäp büläklärgä laek buldılar.
12 iyul könne forum territoriyasendä cäyge profille alannarda katnaşuçılardan tış, Sälät berläşmäse aktiwistları gailäläre dä cıeldılar. Alar icadi, intellektual häm sport mäydançıklarında Sälät berläşmäseneñ törle buın katnaşuçılarınıñ üzara bäyläneşenä yunälderelgän traditsion «Asıl gailä cıenı» programmasında katnaştılar. Proekt kısalarında Bilärgä 250 yakın katnaşuçı cıeldı. Biredä Sälät «Almagaç» mäktäbe ukuçıları, «Bäläkäç» klubı katnaşuçıları, berläşmä aktiwistları gailäläre bar ide.
Alda katnaşuçılarnı «Sälät» forumınıñ ikençe smenası — Hönärlär Bilär Forum (Junior skills / Remesla) kötä. Ul 18 iyuldän 24 iyulgä kadär uzaçak. Smena programması balalar, yaşlär häm alarnıñ ostazlarınıñ öç yunäleş buença: icat, media, mäglümati texnologiyalär yunäleşlärendä – potentsialın açıklau, gamälgä aşıru häm üsterü öçen unikal mäydançık bularak oeştırılaçak!
Xalıkara «Sälät» yaşlär uku-ukıtu forumı Tatarstan Respublikası Xökümäte, TR Yaşlär eşläre yardäme belän uzdırıla.
