«Fänsar» mäktäben tämamlauçılar ukırga kerergä äzer ← kire kaytirga

Bilärdä «Fänsar» fän häm mägarif üzägendä «Fänsar» mäktäbeneñ yazgı sessiyase tämamlandı.

Näk menä biredä 3 etapnı: saylap alu, onlayn belem alu, test häm äñgämäne uzgan balalar tuplandı. Tatarstannıñ törle rayonnarınnan 250 baladan barı tik 100e genä saylandı.

«Fänsar» mäktäbe – uku-ukıtu proektı, ul belemgä, fängä omtıluçı yaşlär öçen uylap tabıldı. Biredä ukuçılarga mäktäp programmasında karalmagan belem birelä. «Fänsar» mäktäbe uku yortına yörep häm çittän torıp ukıy torgan mäktäp formatında, Tatarstan Respublikası Xökümäte yardäme belän ütkärelä. Mäktäp ukıtuçıları – Räsäy Yugarı uku yortlarınıñ äydäp baruçı ukıtuçıları.

Sessiya aldında kuelgan barlık burıçlar da oeştıru komitetı tarafınnan ütälde. Proekt citäkçese Elina Nasibullina süzlärençä, uku-ukıtu programması yugarı sıyfatta uzdı.

Programma kısalarında matematika, fizika, ximiya, biologiya, cämgıyat beleme buença däreslär, KFU wäkillärennän ostaxanälär, intellektual uennar: «Närsä? Kayda? Kayçan?», «Wakıt kapsulası», «Yözgä ber» ütkärelde. 21-nçe aprelda Sälät Yortında (Kazan şähäre, Ostrowskiy ur.,23) uzaçak «Fänsar» mäktäbeneñ Fänni-gamäli konferentsiyasenä äzerlänü bik citdi alıp barıldı. Şulay uk Tatarstan Respublikası Fännär Akademiyase ägza-korrespondentı, tarix fännäre doktorı Fayaz Xucin belän dä oçraşu uzdırıldı.

Iñ möhim wakıygalarnıñ berse, «Fänsar» mäktäbe ukuçıları öçen «Sälät» olimpiadası ütkärelde.

Zölfiya Xäsänowa, sessiya katnaşuçısı:

- Smenadan kitergä telämädem! Elarga yaratmıym, läkin, biredä, küz yaşlären tükmiçä buldıra almadım. Elina apa Nasibullinaga älege proekt öçen zur räxmät äytäsem kilä! «Fänsar» mäktäbeneñ 2 sessiyasendä katnaşuıma min bik şat! Biredä alıngan belemnär miña Yugarı uku yortına ukırga kerergä bulışaçagına ışanam!

Liya Kogan, sessiya katnaşuçısı:

- «Fänsar» sessiyaläre gadi smenalar tügel, minem öçen alar bik tirän mägnägä iya bulgan çaralar. Biredä min 4 tapkır buldım häm tagın kilergä plannarım bar. Näk menä bu cirdä min iñ yaxşı duslarnı, ukıtuçılarnı, äydamannarnı häm kabatlanmas başcitäklärne taptım. Monıñ barısı da bergä – berdäm, köçle mexanizm. Älege proektnı Sälät oeşmasında iñ köçlelärneñ berse bulıp sanıym.

Älege sessiya kısalarında härber sälkeş üzenä oşagan, kiräk bulgan fänne saylap, könenä 3 sägat däwamında belem aldı. Ukudan tış, küñel-açu programması da bik şäp ide. Iñ yaratkannarınıñ berse, Dilärä apa Xalitowa belän uzdırılgan «Art razgruzki» ostaxanäse ide. Anıñ belän bergä agaçtan tatar bizäklären yasadık. Kiçke çaralar da bik kızıklı ütte. Barısına da tanış bulgan «Närsä? Kayda? Kayçan?» uenı ör-yaña formatta uzdı, «Fälsäfäçelär» uenında isä bez törle fänni wideolar da töşerdek. Härber ütkärelgän şämçek dustanä, cılı moxitkä uralgan ide.

Mondıy wakıtlarda «Fänsar»nıñ çın gailä bulganına inanasıñ.

Elina apa Nasibullinaga, Aynur abıy Sabitowka, barlık äydamannarga älege kabatlanmas sessiya öçen zur räxmät süzlären äytäse kilä!