Cäyge alannar citäkçeläre «kızu» cäygä äzer! ← kire kaytirga

Sälätneñ XVII «Başcitäk mäktäbe 2018» kısalarında cäyge alannar direktorları balalar yalına bagışlangan näticäle eşkä start birde. 
Uzgan yal könnärendä Sälätneñ 2018-nçe elnıñ cäyge alannarnıñ 40 direktorı häm ölkän äydamannarı psixologiya, menedjment, komanda buldıru, şäxes üseşe ölkälären kamilläşterde. 

Smenalar citäkçeläre proekt koordinatorı Tahir Nasibullin, mäktäp kuratorları Albina Kadirowa, Elina Nasibullina belän citäkçeneñ psixologik tibına, stresslarga karşı toruçanlıkka yunältelgän testlar eşläp, ideal citäkçeneñ nindi ikänen açıkladılar. Älege testlarga nigezlänep, citäkçeneñ kiläse sıyfatlarga iya bulırga tieşlegenä inandılar: 

1. Kıyu; 
2. Cawaplı; 
3. Akıllı; 
4. Açık küñelle; 
5. Balalarnı yaratuçı. 

Smenalarda kurkınıçsızlık — citäkçelärneñ iñ töp burıçlarınıñ berse bulganga, biredä mäktäptä alar berençe meditsina yardäme nigezläre belän tanıştılar. 

Monnan tış, bulaçak ölkän äydamannar häm smena citäkçeläre «Sälät» fondınıñ başkarma direktorı Timur Söläymanow, «Sälät» Yaşlär üzägeneñ direktorı Aygöl Gabdraxmanowa häm proekt kuratorları belän berlektä törle pedagogik situatsiyalär turında fiker alışıp, alardan döres çıgu yulların ezlädelär. 

«Biredä, sezneñ yardämegez belän barlıkka kilgän cılı moxitne cäy häm alannarıgız aşa ütkärsägez ide. Alannıñ nigezendä härber katnaşuçınıñ zur xezmäte yata. Sälät ul — akıl, tel häm rux sintezı, ä anı kamilläşterü barı tik sezdän genä tora. Älege el komandası — iñ köçlelärneñ berse. Sezneñ härberegez — şäxes, häm näk menä sezdä — Sälätneñ barlık köçe!», — dip assızıkladı Timur Söläymanow.

«Başcitäk mäktäbe 2018» katnaşuçılarnıñ kayberse bik zur teläk belän üz xis-kiçereşläre turında söyläp birdelär. 

Ilsöyar Xismätowa («Sälät-Arşan 2018» ölkän äydamanı): 

- Başcitäk mäktäbe kıska, läkin bik produktiw buldı. Bez küp kenä kiräkle mäglümat tupladık, problemalı soraularnı çiştek, pedagogik situatsiyalärdän çıgu yulların taptık. Kıskaça äytkändä, psixolog bulıp karadık. Mäktäpneñ moxite eldan-el üzgärmi — bez bötenebez ber zur gailä kebek. Kiçä genä sälkeş bulgannarnı xäzer inde äydaman rolendä kürü — ber ük wakıtta küñelle dä, moñsu da... Läkin, älege eget-kızlarda bulgan potentsial bik köçle! Alarga barı tik uñışlar häm üzlären yaña yaktan açuların telim! 

Adel Xayrullin («Sälät-Izge Çişmä 2018» direktorı): 

- Älege «Başcitäk mäktäbe 2018» dä katnaşuıma bik şat! Ukudan soñ, barlık imtixannardan kotılıp, Sälät moxitenä kuşılu şundıy räxät ikän. Belem birü programması aeruça bik effektiw ütte. Biredä, cäyge alannarda bula torgan barlık eşçänlekne centekläp analizlap çıktık. Bulaçak äydamannar belän küreşü, tanışu aeruça pozitiw xislärgä bay buldı. Kazanga kaytkannan soñ, ber täülek kenä tügel, ber atna ütkän kebek buldı.