«IÑ CILI, IÑ ATMOSFERALI, IÑ KÖÇLE TAWIŞLI FORUM BU» ← kire kaytirga

Xäzer Bilärdä X Xalıkara «Sälät» yaşlär uku-ukıtu forumınıñ öçençe smenası – SELET BILER FORUM uza. Ul forumnıñ töp smenası bulıp sanala. SELET BILER FORUM-nıñ bıelgı üzençälekläre häm yañalıkları turında «Sälät» yaşlär üzäge direktorı urınbasarı, cäyge alannar koordinatorı Igor Smirnow söyläde. 

– Sälät dönyası belän äle tanışıp kına kilüçelärgä añlat äle: SELET BILER FORUM-nıñ üzençälege nidä?

– Kayber balalar Sälät dönyası belän Bilärgä kilgäç, yagni forumda gına tanışa. Alar täüge märtäbä mäktäpkä bargandagı kebek xäldä bula. Äle närsä eşlärgä ikänlegen dä tulaem añlap beterä almıylar. Ä SELET BILER FORUM-da inde äzerlekle, Sälätneñ «5 nçe sıynıfı ukuçısı» kebek balalar katnaşa. Balalar alannarda atna-un kön yaşilär, yal itälär, üzara tanışalar häm Bilärgä sälätlären kürsätergä kilälär. Bu forumnı bez traditsion dip yörtäbez, çönki tarixı monnan 25 el elek başlana. Xis-kiçereşlär, moxit yagınnan ul bötenläy başka. Iñ cılı, iñ atmosferalı, iñ köçle tawışlı forum bu. Monda hawanı totıp karap bula dilär. Ul şundıy kaynar!

– SELET BILER FORUM nindi şartlarda uza?

– Kurkınıçsızlık mäsäläse buença soraular eş kilä. Borçılırlık urın yuk: barlık şartlar da karalgan. Keçkenä genä öy kebek palatkalarda 8 keşe yaşi. Eçtä karawatlar, yokı kapçıkları bar. Yuınırga modulle yabık duşlar tözelde. Köngä 5 märtäbä, tämle xäläl rizıklar aşatıla. Ä balalarnıñ iminlegen daimi räweştä OMON, politsiya, Rosgwardiya, Gadättän tış xällär ministrlıgı wäkilläre täemin itä. Kurkınıçsızlıknı bez genä tügel, balalar üzläre dä uylıy. Beleşmälär, böten kiräkle kägazlär – barısı da bar.

– SELET BILER FORUM-da yaña alannar barmı?

– Yaña alannar kilde dip äytä almıym, bezgä yanädän kuşıluçılar bar. Mäsälän, Başkortstandagı «Sälät-Tulpar»nıñ kabat forumda katnaşuı bezneñ öçen bik küñelle wakıyga. Xäzer monda 8 alan. Alar barısı da bu smenanı kızu itep ütkärergä äzer. Koyaş kızdırsa da, yañgır yausa da!

– ELET BILER FORUM-da, gadättä, alannar ber-berse belän yarışa. Igor abıy, sin üzeñ kaysı alan öçen can atasıñ?

– Sälät öçen can atam. Min bit şul alannar belän eşlim, alar artınnan küzätäm. Aerıp bilgeli torgan bernindi alanım da yuk. Yaşermiçä äytäm: min üzem – «Sälät-Rauşan» sälkeşe. Läkin bar alannarga da mönäsäbätem bertörle. Härberse üzen törle yunäleştä kürsätä. Älbättä, kemder ciñä, ä kemder ciñelä. Ämma bez bit monda kuboklar yaulau öçen genä kilmibez. Duslık, yaxşı käef, yal itü möhimräk!