Kanadada Tatarstan Respublikası häm Sälät berläşmäse älämnäre kütärelde ← kire kaytirga

Şuşı könnärdä Xalıkara «Sälät-Monreal» yal, uku-ukıtu häm sälamätländerü lagereneñ  räsmi açılış tantanası ütte. Älege alan bıel berençe tapkır Tatarstan Respublikası Prezidentı Röstäm Nurgali ulı Miñnexanow yardäme belän Kanadada uzdırıla.

«Xalıkara proektlar bezneñ öçen yañalık tügel. Sälätneñ Awstraliyadä, Çexiya, Italiya, Bolgariyadä bulganı bar. Kanadada bez berençe tapkır. Bez bu proektnı da ozın gomerle itep küräsebez kilä. Anıñ däwamlılıgı, berençe çiratta, sälkeşlär sezdän tora. Bu yulı Monrealgä barırga 200-dän artık keşe teläk beldergän ide. Alarnıñ iñ-iñnäre biredä. Şulay u monda bezneñ çit illärdä yaşäüçe millättäşlärebez dä bar. Bezgä elemtäne özärgä yaramıy, gel aralaşıp torıyk! Oeştıru komitetına aerım räxmätemne belderäsem kilä. Sälät üseşenä kertkän öleşegez öçen zur räxmät sezgä!» – dip citkerde Sälät Fondınıñ başkarma direktorı Timur Söläymanow.

Tatarstan Respublikası, Sälät berläşmäse älämnäre Kara, Urta diñgez, Indiya okeanı öslärendä kütärelgän ide inde. Ä bu yulı alar berençe tapkır Atlantik okean yarlarında da cilferdäde. Bu – bezneñ öçen bik ähämiyatle wakıyga. Çönki «Sälät-Monreal» Sälä berläşmäse proektlarınıñ geografiyasen üsterergä, katnaşuçılar sanın arttırırga yardäm itä.

«Bu alannıñ elga ber genä tügel, el däwamında ütüçe smenaga äwerelüen telim! Bezne Kanadada kabul itkän Säläxetdinowlar gailäsenä zur räxmät! Initsiatiwagız, tırışlıgıgız, ömetegez öçen räxmät! Smenanıñ matur ütäçägenä imanım kamil. Oeştıru komitetı bik tırıştı. Min sezgä ışanam, gorurlanam. Sälät soñgı ellarda yaña sulış aldı. Bu – sezneñ tırışlık näticäse. Kiläçäktä dä barı uñışlar yuldaş bulsın!» – dip belderde Sälät proektları citäkçese Ädip Älmir.  

Yartı el eçendä söyläşülär formatında balalar saylap alu turları aşa uzdılar. Anıñ näticäläre buença smenada Tatarstannan 5 bala, çit ildä yaşäüçe (Amerika, Çexiya, Kanada) 21 millättäşebez katnaşa.

«Älege smena turında miña Alimä apa Säläxetdinowa xäbär itte. Moñarçı Sälätneñ Kazanda barlıgın işetep belä idem, «Sälät-Rauşan»nı alanı bik kızıksındırdı. Üzem 4 tel beläm: tatar, törek, ingliz häm yapon tellären. Öydä gel tatarça aralaşabız. Elegräk San-Frantsiskoda tatar mäktäbe bar ide, tik xäzer inde ul yuk. Tatar telendä söyläşüçe duslarım küp tügel. Biredäge duslarım belän kiläçäktä sotsial çeltärlär aşa aralaşıp torırbız dip uylıym», – di San-Frantsisko sälkeşe Umit Çapanoglu.

Sälkeşlär tulısınça tatar moxiten toya alsın, tatar mädäniyate belän yakınnan tanışsın öçen alar belän Sälät aktiwistları häm weterannarı eşli – äydamannar, proekt, yunäleş citäkçeläre, tatar xalkı mirasına tormışın bagışlagan şäxeslär bügen «Sälät-Monreal» proektı üzägendä kaynıy.

«Bez bügen sezneñ belän tarixi wakıyganıñ katnaşuçıları. Älege proektnı bez bik küp ellar küñel türendä yörtep, uylap yördek. Här närsäneñ üz wakıtı, nihayat, ul tormışka aştı. Monıñ öçen Tatarstan Prezidentı Röstäm Nurgali ulına räxmät! Sezne alda kötkän 11 könne matur itep ütkäregez, här mizgelneñ tämen belegez!» – dip izge teläklären Sälät weteranı, ostazı Alik abıy Gıylmi.

Lagerneñ Kanadada urnaşuı oçraklı xäl tügel. Sälät weteranı Alimä Säläxetdinowa gailäse belän Monrealgä küçep kitkäç, biredä «Sabıylar-Monreal» tatar balaları üzägen açıp cibärä, Sälät missiyasen däwam itä. Millättäşlärebezne ber urında cıyu, saylap alu buença da kuratorlık eşen ul başkardı.

«Süzne räxmät äytüdän başlıym: barıgızgada zur räxmät! Sälkeşlär, sez bik bäxetlelär! Biredä tugan ber mömkinlegegezne dä kuldan ıçkındırmagız. Tatar telen yaratıgız! Sälät, sezne biredä karşı aluıma çiksez şatmın! Xäerle sägattä!», – di sälamläde ul.

Lagerneñ programmasında törkemnärdä dä, gomumi eşçänlek tä karalgan. Fizik künegülär, trening, networking-sessiyalärdän soñ sälkeşlär Sälät moxite belän tanışa. Kiçlären üz sälätlären icadi kontsertlarda, kiçke çaralarda kürsätä. Programmanıñ töp üzençälege bulıp kön saen uzuçı refleksiya bülege tora: biredä här katnaşuçı üze öçen könenä näticä yasıy, tuplagan belemen, täcribäsen analizlıy.

Älegä kadär balalar ber tawıştan «Sälät-Monreal»  – çınga aşkan xıyal, ä Sälät – urtak mäxäbbät ul dip belderälär.