Sälättä gayat zur yañalıklarga bay bulgan cäy kötelä! ← kire kaytirga

Kiçä, 24 gıynwar könne Sälät Yortında cäyge alannar, forumnarga kagılgan soraular buença «Sälät» Fondınıñ başkarma direktorı Timur Söläymanow belän oçraşu ütkärelde. 

Biredä oeşmanıñ citäkçese, «Sälät» Yaşlär üzäge direktorı Aygöl Gabdraxmanowa häm Sälät profille alannarına äzerläü üzägeneñ citäkçese Albina Kadirowa oçraşuga kilgän kunaklarnıñ barlık soraularına centekläp cawap birdelär. 

Timur Söläymanow oçraşunıñ başınnan uk cäygä karata gayat zur plannar belän şakkatırdı: «15 meñ katnaşuçı, 24 lager, alar arasında yañaları da bar häm 6 Sälät Forumı. Bu – fantastika tügel, ä bezneñ 2018-nçe el öçen bilgelängän plannar», – dip, assızıkladı citäkçe. 

Älbättä, oeşma eldan-el üsä, üzenä küp sanlı sälkeşlärne cälep itä. 2017-nçe el da iskärmä tügel. Fondnıñ başkarma direktorı süzlärençä, ütep kitkän el yaña proektlarga şaktıy baytak buldı. Alar arasınnan Kanadadagı tatar wäkilläre cämgıyate belän berlektä «Sälät-Monreal» smenasın atap bula. Läkin, bez, ireşkän uñışlarıbızda gına tuktalıp kalırga cıenmıybız. «Bu cäy yaña proektlarga, üzgäreşlärgä bay bulaçak», dip Timur Söläymanow wägdä birde. 

Kübese belgänçä, Sälät – mömkinleklär moxite! Oeşma barlık ukuçılarga, studentlarga, abiturientlarga küp kenä proektlarda, smenalarda katnaşu öçen törle mömkinleklär tudırırga tırışa. Şul isäptän, bu cäyne 11-nçe sıynıflarnı tämamlauçı ukuçılar, abiturientlar öçen maxsus «Sälät-Akbüre» smenası buldırılaçak. Ul şäxes, oratorlık ostalıgınıñ üseşenä yunältelgän bulaçak. «Smenanıñ iseme Sälät proektlarınıñ citäkçese Ädip Älmir tarafınnan täkdim itelde. Ak büre riwayatenä ışansañ, ul – keşelär häm xaywannar dönyasın berläşterüçe köçle obraz. Ä «Sälät-Akbüre» mäktäp yaşennän student çorına küçü smenası bulıp tora», – dip añlattı Timur Söläymanow. 

Cäyneñ tagın ber zur yañalıgı – traditsion Sälät Forumı 6 tapkır uzdırılırga isäplänä. Mondıy täkdim Tatarstan Respublikası Prezidentı Röstäm Miñnexanow tarafınnan citkerelde. 21-nçe iyunnän 8-nçe awgustka kadär forumnarnıñ uzdırıluı kötelä. Älege forumnarda ilebezneñ barlık töbäklärennän, erak çit illärdän 15 meñgä yakın bala katnaşuı kötelä. Şulay uk, 2011-nçe elga kadär eşläp kilgän Kara diñgez buendagı «Sälät-Arşan» smenasınıñ yañadan başlanuı kötelä. 

Äytep kitelgänçä, cäy yañalıklarga bay bulaçak. Tagın ber yañalık – «Sälät-Olimp» mäktäbe üz cäyge smenası ütkäräçäk. Moña kadär ul uku el däwamında, mäktäp kanikulları wakıtında gına ütkärelsä, bu elnı üz formatın tulısınça üzgärtä. Tizdän balalar iyun aylarında uk olimpiadalarga, BDIga, TDIga äzerlänä alaçaklar. Ukuçılar belän kwalifikatsiyale belgeçlär, yugarı uku yortları ukıtuçıları eş alıp baraçaklar. 

Törle töbäklärdäge balalar Sälät dönyası, alannarı, Forumnarı belän könnän-kön kübräk kızıksına başladı. Şul isäptän, älege cäyge alannarga gariza birü kampaniyase üz eşçänlegen bik irtä, noyabr aenda uk başlap cibärde. Misal öçen, xäzerge wakıtta «Sälät-Ruxiyat» alanına 100 urınlık smenaga 174, «Sälät-Rauşanga» 143, «Sälät-Bolgarga» 119, «Sälät-Arşanga» 112 gariza kilep ireşte», – dip bilgeläde Sälät profille alannarına äzerläü üzägeneñ citäkçese Albina Kadirowa. 

Garizalar kabul itü kampaniyase üz eşçänlegen däwam itä! Cäeñne bezneñ belän Sälättä ütkäräseñ kilsä, portfolio-selet.ru saytında garizañnı kaldırırga aşık! Küreşkängä kadär!