2004-nçe eldan birle Sälät dönyasında kaynıym ← kire kaytirga
«Kuşılsañ ägär bezgä, ükenmässeñ gomergä». Çınnan da, Sälättä yal itkän, monda bulgan keşelär, alanda ütkän könnärne hiç onıtmıy. Ellar ütkäç tä, kabat sagınıp kayta.
Sälät weteranı, Iktisad fännäre kandidatı, dotsent Läysän apa Arsentewa da şundıylardan. Ul SOFT SKILLS BILER FORUM-nıñ dürtençe könendä Bilärgä kilde.
«Sälät – ul yaşäü räweşe. Sälät – ul minem yakın dustım. Sälättä tanışkan keşelär belän haman da duslıgıbıznı saklıybız, aralaşabız. Duslarım belän oçraşkanda, can räxätlege kiçeräm. Alar belän oçraşunı tugan nigezgä kaytu belän çagıştıram: äti-änilär yanında niçek räxät bulsa, Sälättä tapkan duslarım yanında da şulay. Oçraşularnı min tüzemsezlek belän kötäm», – dip başladı süzen Läysän apa.
Läysän apa berençe tapkır sälkeş bulıp, 2004-nçe elda Bilärgä kilgän. «Ul keçkenä genä alan ide. Anda nibarı 50 keşe yaşädek. Däreslärebez dä, «apa», «abıy»larıbız da bar ide. Bik sagınıp iskä alam ul wakıtlarnı. Älbättä, ul çornıñ da üz romantikası bar ide», - di ul, xatirälären yañartıp. Läysän apa bıelgı forumnıñ yugarı däräcädä ütüen häm Sälätneñ masştabları eldan-el kiñäyuen dä bilgeläp ütte.
Sälätçelär Läysän apanı Sälät oeşmasınıñ küp kenä cırların başkaruçı bularak belä. Läkin belgeçlege buença – ul iktisadçı. Ber-bersennän şaktıy aerılıp torgan ölkälärdä uñışka ireşü, bu sälätlärneñ ber keşedä tuplanuın normal küreneş dip atıy: «Bu şakkatırgıç tügel. Sälättä bulgan keşelärneñ barısı da şundıy kiñkırlı talant iyaläre. Icat belän mawıgıp, şul uk wakıtta, iktisad ölkäsendä eşläü küpkä kızıgrak. Küñel birep, yaratıp eşlägäç, bu hönärlärneñ aerması da yuk kebek. Iktisad ta üzenä kürä ber cır. Cır da – iktisad. Muzıka – ul minem xobbi. Sälätçelärneñ barısına da cırlarga, muzıka belän mawıgırga kiñäş itäm. Üzeñne törle ölkädä sınap kararga kiräk», - di ul.
Läysän Arsentewa öçençe forumda da katnaşaçak, 6-nçı iyul könne ul ostaxanäsen ütkärä. Lektsiya rus, tatar häm ingliz tellärendä baraçak. Ostaxanä kızıklı bulır dip kötelä: ul üzeneñ Bill Geyts, Belgiya patşası häm Elton Djon belän niçek häm kayda oçraşuın da, hönärlärneñ kiläçäktä yaşäeşe turında da söyläyaçäk.