«Fän belän şögıllänü populyarlaştı» ← kire kaytirga

Balalarga östämä belem birü, alarnı yugarı uku yortına äzerläü, aerım fängä aktsent yasau – «Fänsar» mäktäbeneñ, gomumän, «Sälät»neñ ber maksatı bolar. Şuña kürä fän, uku-ukıtu buença proektlar bezneñ oeşmada şaktıy. Şularnıñ berse – Mirza Ismail ulı Mäxmütow isemendäge «Fänsar» mäktäbe häm anıñ yomgaklau çarası bularak oeştırıla torgan fänni-gamäli konferentsiya. Soñgısı bu elda öçençe tapkır ütkärelde.

«Fänsar» mäktäbeneñ III Respublikaküläm fänni-praktik konferentsiyase 21 aprel könne «Sälät» yortında fängä bitaraf bulmagan balalarnı cıydı. Fänni eşlär: gumanitar, tabigıy, tögäl fännär; psixologiya, iktisad, sotsiologiya yunäleşläre buença bülende. Bu elnı oeştıruçılar barlıgı 400dän artık gariza kabul itep algannar. Şulay da konferentsiyadä katnaşu bäxetenä 200 keşe genä ireşkän.

Dörestän dä, «Sälät» proektları arasındagı älege konferentsiyane ukuçılar tiz arada yaratıp ölgerde. Monıñ ni säbäple şulay buluı xakında bez «Fänsar» mäktäbe citäkçese Elina Nasibullinadan soraştık.

–       Minemçä, bügen fän belän şögıllänü populyarlaştı, çönki sineñ alda barlık ölkägä dä işeklär açıla häm ukuçılar monı üzläre dä yaxşı añlıylar. «Fänsar» mäktäbendä bulgan balalarnıñ barısı da imtixanda yaxşı uñışka ireşep, yugarı uku yortına kerälär. Älegä bez mäktäp ukuçıları belän genä eşläsäk, kiläse elga studentlar öçen dä fän mäktäbe buldırunı, konferentsiya oeştırunı planlaştırabız, – dip urtaklaştı ul.

Çınnan da, kamillekneñ çige bulmaganday, östämä belem berkemgä dä komaçau itmi. Sälätle balalarnıñ monı añlap, üzläre teläp şundıy märtäbäle çarada katnaşuı söenderä. Mäsälän, Çallı şähärennän kilgän Regina Ibeteewa ukıtuçısına konferentsiyagä barırga telägänen üze beldergän.

–       Mondıy çarada minem nibarı ber genä tapkır katnaşkanım buldı. Bügengese turında işetkäç, üzemneñ tugan yak turında fänni eş yazırga buldım. Minemçä, älege temanı fänni yaktan kübräk öyränergä kiräk, çönki bez tugan cirebez xakında mäglümatka bay bulırga tieşbez, – di Regina Ibeteewa.

Kazannıñ N.I.Lobaçewskiy isemendäge litseenda ukuçı Almira Gataullina isä «Faşizm – çuma XXI weka» digän temanı saylagan. Anıñ süzlärençä, bu eş xäzerge wakıtnıñ sotsial problemasın yaktırta.