«Sälät» Forumınıñ berençe smenasında mäktäp ukuçıların nilär kötä? ← kire kaytirga

19-23 iyun könnärendä Bilär muzey-tıyulıgında X Xalıkara «Cälät» yaşlär uku-ukıtu forumınıñ berençe smenası – Junior Skills Biler Forum uzaçak.

Smena programması ukuçılarga keçe yaştän ük hönäri yunäleş birügä nigezlänä. Ul ukuçınıñ şäxes bularak üseşenä etärgeç birä torgan, praktikaga yunälgän, uen, yarış, wakıyga formatındagı däreslärne üz eçenä ala.

Forumda Kazan däülät arxitektura-tözeleş uniwersitetı belän berlektä oeştırılgan arxitektura, modelläşterü häm dizaynga bagışlangan mäydançıklar eşläyaçäk.

Bilär cirenä Rossiya dizaynerları berlege Witse-prezidentı, Rossiyaneñ atkazangan mädäniyat xezmätkäre, Olimpiya obektları awtorlarınıñ berse – Yuriy Mençits (Mäskäü) kilüe kötelä. Ul balalarga Soçidagı Olimpiya şähärçegeneñ niçek tözelüe turında söyläyaçäk.

Mäskäü politexnika uniwersitetı wäkilläre katnaşuçılarnı pilotsız oçuçı awiatsiya sistemaları belän tanıştıraçak. Şulay uk alar kızıklı fizik häm ximik täcribälär, eksperimentlar tulı fänni şou kürsätäçäk.

Interer dizaynı häm ornamentlar turında interer häm landşaft dizaynı ölkäsendä eşläüçe arxitektor, arxitektorlar berlege ägzası, Kazan däülät arxitektura-tözeleş uniwersitetınıñ ölkän ukıtuçısı Marina Däülätgäräewa söyläyaçäk.

«Kazan yarminkäse» kürgäzmälär üzägeneñ üseş kontseptsiyasen eşläü konkursında berençelekne yaulagan arxitektor, urbanist Zölfiya Ilkaewa proektlarnı döres täkdim itü serlären açaçak häm arxitektura kollajları yasarga öyrätäçäk.

Kazan däülät arxitektura-tözeleş uniwersitetınıñ «DAŞKA» balalar arxitektura-dizaynerlık mäktäbe mögallimnäre «kiläçäk yortları» proektların äzerläü häm modelläşterü buença master-klasslar ütkäräçäk. Forumda balalar grafika, kalligrafiya, şrift dizaynı belän dä yakınnanrak tanışaçak.

Smena programmasında ekologiyagä kagılışlı çaralarga da zur igtibar birelä. Ukuçılarga ekologik yaşäü räweşe xakında söyläyaçäklär. Zero Waste Lab kreatiw berläşmäse eşkärtelgän plastiktan yasalgan cihazlar turında tulı mäglümat biräçäk.

A. N. Tupolew isemendäge Kazan milli tikşerenü texnik uniwersitetı – KAI wäkilläre mäktäp ukuçıların awiamodelläşterü belän tanıştıraçak, oçu modellären tözü häm konstruktsiyaläü turında söyläyaçäk.

Smenanıñ här könendä uku-ukıtu programması, mädäni çaralar häm sport yarışları bar.

«Balalarnıñ kurkınıçsızlıgı bezneñ öçen berençe urında. Forum Gadättän tış xällär ministrlıgı, Eçke eşlär ministrlıgı häm Rospotrebnadzor belän berlektä uza. Bilärgä barır aldınnan oeştıruçılar PTsR-test tapşırırga, ä balalar meditsina tikşerüe uzarga tieş. Katnaşuçılar smena däwamında forum territoriyasennän çıgıp yöri almayaçak», – dide «Sälät» yaşlär üzäge direktorı Aygöl Gabdraxmanowa.

Forum – Tatarstan Respublikasınıñ iñ märtäbäle yaşlär proektlarınıñ berse. Anıñ turında Rossiyadä genä tügel, çit illärdä dä yaxşı belälär. Mädäniyat, sängat, belem birü, media häm IT ölkäsendäge täcribä, ideyalär häm yañalıklar belän urtaklaşu platforması ul.

Forumnıñ maksatı – intellektual, ruxi häm mädäni üseş belän kızıksınuçı yaşlärne berläşterä torgan moxit buldıru.