«Olimp». Smenadan algan xis-kiçereşlär ← kire kaytirga

27-nçe – 30-nçı oktyabr aralıgında Bilär kalasınıñ «Fänsar» uku-ukıtu üzägendä «Sälät-Olimp» olimpiadalarga äzerläü mäktäbe uzdı.

5-nçe – 9-nçı sıynıf ukuçıları matematika, ingliz tele, cämgıyat beleme, tarix fännäre buença belemnären arttırıp, matematika fäne buença  BDIga äzerländelär. Smenada Tatarstannan barlıgı 40 bala katnaştı. Aralarında Kazan, Älmät, Yar Çallı, Bögelmä, Cälil, Alekseewsk rayonnarınnan kilgän balalar da bar ide. Smena däwamında xätta kayber ukuçılar uku-ukıtu programmasına üz täkdimnären dä kerttelär. Misal öçen, 9-nçı sıynıf ukuçısı Emil Nugaybikow kiläçäktä «Sälät-Olimp» smenasında fizika fänen ukıtırga teläge zurdan ikänen belderde.  

Yaña belemnär tuplarga häm tagın da kamilläşergä menä kemnär yardäm itte:

Matematika fäne – BDI äzerläüçe trener Arslan Yusifow; Sälät proektlarında aktiw katnaşuçı, ukıtuçı Nadir Kuramşin;

Cämgıyat beleme häm tarix fäne – BDI munitsipal etap buença ekspert Ilfat Gıymadiew;

Ingliz tele – olimpiadalarga äzerläü mäktäbe trenerı Aysılu Galimowa.

Programma  törle küñel açu häm intellektual çaralarga da bay ide: «Närsä? Kayda? Kayçan?», QUIZ,  «Intuitsiya» h.b.

Nadir Kuramşin, proekt citäkçese:

- Smena yugarı däräcädä uzdı. Balalar – şäp, aktiw! Min üzem bik küp uñay emotsiyalär belän kayttım.  

Göldaniya Bulatowa, äydaman:

- «Sälät»neñ intellektual çaralar uzdıruçı kreatiw laboratoriya citäkçese bularak min balalarnıñ bu ölkädä sälätlären kürergä häm açarga telädem. «Atlant» şaxmat turnirında katnaşırga teläge bulgan balalar belän aralaştım.  Gomumän,  «Sälät-Olimp» smenasında bik talantlı häm belemle äydamannar, citäkçelär eşli bit:  Nadir abıy Kuramşin, Igor abıy Smirnow. Alarga karap  tagın da belem tuplıysım kilä. Smena bik yaxşı uzdı. Ber ürnäk gailä tormışı kebek monda. Aerılışırga bik awır ide.  

Alina Wolkowa, äydaman:

- «Olimp» smenasın beläsezme ni öçen sayladım? Çönki balalar küp bulmagan smenaga gaşıyk buldım soñgı arada. Berniçä kön däwamında, balalar küp bulmau säbäple, bez zur ber gailägä äyländek. Bu smenada min berençe tapkır, läkin soñgısı tügel. Balalar ilhamlandıra. Monda  sälätlelärneñ sälätleläre cıelgan. Smena däwamında min alarnıñ akıllılıgına şakkattım. Alar köne-töne ukıdılar, buş wakıtları bulmadı da diyarlek.
Ukıtuçılar üz däreslären uen formasında ütkärdelär. Min uzgan atnada gına äle «Äydamannar yarışı» bäygesendä dä katnaşkan idem. «Sälät-Bilär kalası 2016, 2017, «Sanak-lab» , Forumnıñ ikençe smenası....  Häm menä xäzer «Olimp». 

Sälätkä iptäş kızım arkasında kilep kerdem. Ul «Sälät-Zäy 2013» smenasında katnaşkan ide häm miña da Sälätkä kilergä täkdim itte. Şulay itep min 2013-nçe elda «Bilär Kalası»na bardım. «Bilär» – minem küñelemdä gomerlek!

Arslan Söläymanow – äydaman:

- Bu smenada öç tapkır buldım. Min sälkeş çagımda bu smena yuk ide äle, monda üzemne başka yaktan kürsätergä telädem. Bezneñ komanda häm ukıtuçılar sostawı bik köçle. Smena – super!  Cäyge smenalar uzgannan soñ, bu smenada sin kabat cäyge xislär belän yaşiseñ. Här katnaşuçı üzençälekle, belemle. Afärin!

Ruzäl Gıyzzätullin, äydaman:

- Min balaçaktan uk törle olimpiadalarda katnaşıp kildem, bu miña bik oşıy ide. Bıel «Sälät-Bilär kalası» smenasında Arslan Söläymanow miña älege proekt turında tulırak söyläde. Min  ike uylamıyça, äydaman bularak üzemne älege smenada sınap kararga buldım. Gariza tutırdım häm eşne başlap cibärdem.  Sälät moxitenä çumu, gimn marşnı kabat iskä töşerü, «Sälät »tä tanışkan duslarıñnı kabat kürü – bu onıtılmaslık mizgel. Nadir Kuramşin citäkçelek itkän smenada miña eşläwe bik oşadı.

Kärimä Malikowa – katnaşuçı:

- Bu smenaga min berençe tapkır bardım häm şunda uk bu proektka gaşıyk buldım. Här sekundta minem yözemnän şatlık , elmayu xisläre kitmäde. Min barısınnan da kanägat kaldım. Äydamannarıma  häm sälkeşlärgä zur räxmätläremne belderäsem kilä. Smenada iñ oşaganı ul – ukıtuçılar. Ingliz tele ukıtuçısı Aysılu apaga çiksez räxmätle min. Smena 4 kön genä barsa da, ul minem küñeldä mäñgegä istä kalaçak.

Ralina Korbanowa, katnaşuçı:

- Min Sälättä 3 el. 2015-nçe eldan birle  älege smenaga baram.  «Olimp»ka berençe el gına barmasam da, el saen üzgäreşlär bula monda. Yaxşı yakka, älbättä. Kabatlaular yuk. Monda tanışkan duslar belän el däwamında aralaşam. Bu smena minem öçen küñelgä iñ yakını. Gitaraga kuşılıp cırlaular, «Sälät » cırların kabat iskä töşerü....  Ukıtuçılar turında aerım äytep uzasım kilä: Aysılu apaga räxmät! Anıñ däreslärennän soñ min ingliz telen yaxşırak belä başladım. «Sälät-Olimp» smenaları barısı da şäp, läkin iñ istä kalgannarı ul  berençe häm öçençe smenalar ide. Alar törle urınnarda uzdırılgan ide. Berençese – «Wolga» yaşlär üzägendä , kalgannarı – «Fänsar»da.  Igor Smirnowka bezneñ mäktäpkä kilep älege proekt turında söyläp kitkäne öçen zur räxmät äytäsem kilä.