Prezident Röstäm Miñnexanow «Yoldızlı» bazasında kunakta buldı! ← kire kaytirga

Bügen Tatarstan Respublikası Prezidentı Röstäm Nurgali ulı Miñnexanow Laeş rayonında urnaşkan «Yoldızlı» balalar-sälamätländerü üzägendä buldı. Bıel bu baza «Cäy – balalarga» prezident programması kısalarında yañartıldı.

1973-nçe elda tözelgän lagernı renowatsiyaläü 2019-nçı elda başlanıp kitkän ide. Xäzergä eşlärneñ 1-nçe etabı tögällängän, kiläçäktä 2-nçe etap kötelä. «Yoldızlı» – Sälätneñ küpellık bazası, monda bik küp cäyge smenalar uzdırıldı. Remontka kadär fäkat cäyge smenalar gına uzdıru mömkin bulsa, xäzer baza el äylänäse eşli alaçak. Monıñ öçen böten şartlar da tudırılgan!

Prezident kiläse köngä turı kiterep, «Yoldızlı» bazasında bügen «Sälät cıenı 2020» ütte. Xäzerge wakıtta bazada «Sälät-Şäxes» smenası uza, näk menä andagı sälkeşlärgä häm äydamannarga Cıenda katnaşu bäxete tätede. Ä kalgannar Cıenda onlayn räweştä «kunak» bula aldı: kön däwamında instagramda kuep bargan storislar häm postlar şundıy mömkinlek tudırdı.

Kön traditsiyaon turıtayaktan başlanıp kitte. Cıen katnaşuçıları öçen uku-ukıtu sessiyasenä spiker bularak Sälät aktiwistı, tarix fännäre kandidatı, KFU dotsentı, Istanbul uniwersitetı mögallime Ilsur Näfıykow çakırılgan ide. Balalar şulay uk futbol häm stritbol buença çempionatta, djem-sessiyalärdä häm djenga uenı buença belem birü sessiyasendä katnaştı.

Prezident Röstäm Nurgali ulı Miñnexanow bazada remont eşläre barışı, yañartılgan korpuslar, sport mäydançıgı häm aşxanä belän tanışıp çıktı. Häm başkarılgan eşlärdän bik kanägat kaluın belderde. Bazada xäzer 7 torak korpus, aşxanä, administratiw blok remontlangan. Torak korpuslarda 220 bala, 18 äydaman häm 60 xezmätkär urnaşa ala. Elek duş häm bädräflär uramda ide, ä xäzer alar barısı da korpus eçendä, cılıda.

Şunnan soñ Tatarstan Respublikası Prezidentı Röstäm Nurgali ulı Miñnexanow «Sälät» berläşmäse aktiwı belän oçraştı. «Sälätle cäy 2020»gä näticä yasaldı, şulay uk Prezidentka cäyge profille smenalarnı oeştıru buença metodik eşlänmälär täkdim itelde. Ä Sälätneñ mägarif üzäge citäkçese Dilärä Yakubowa «Asıltaş» Sälät mäktäbe açıluı häm «Bäläkäç» klubı turında söyläde. Bilgele bulgança, xäzerge wakıtta yaña mäktäpkä 1-nçe sıynıfka balalar tuplau bara. Bıel 1-nçe sıynıfka 15 bala kabul itü niyatlänä.

«Bez kiläçägebez, milli traditsiyalärebez häm goref-gadätlärebez, tugan telebez, mädäniyatebez öçen borçılabız. Sez bu yunäleştä zur eş alıp barasız, häm bez sezneñ belän milli baylıgıbıznı saklap kala alaçakbız», - dide TR Prezidentı.

Ul bilgeläp ütkänçä, respublikada «Adımnar» küp telle mägarif kompleksları çeltäre üseş ala, anıñ da «Sälät» xäräkäte belän küp kenä urtak burıçları bar. Tatarstan Prezidentı küp telle mäktäplärdä Sälät täcribäsen häm eşlänmälären kullanırga täkdim itte.

«Sezneñ eşegez bik kiräkle. Mondıy aktiw, bitaraf bulmagan yaşlär belän bez respublika üseşe xakına küp närsälärgä ireşä alaçakbız», - dide Röstäm Miñnexanow.

Annarı Tatarstan Prezidentı «Sälät-Şäxes» smenasınıñ traditsion turıtayagında katnaştı.

Röstäm Nurgali ulı Miñnexanownı Tatarstan Respublikası yaşlär eşläre ministrı Damir Fättaxow, «Sälät» yaşlär üzäge direktorı Aygöl Gabdraxmanowa häm başkalar ozatıp yörde.

Tatarstan Respublikası yaşlär eşläre ministrı Damir Fättaxow xäbär itkänçä, lager böten respublikadan häm Rossiya töbäklärennän kilgän sälätle balalarnı häm talantlı yaşlärne üsterü öçen mäydançık bulaçak häm el äylänäse eşli alaçak.

Oçraşu axırında sälätlelär Prezidentka Sälätneñ sarı futbolkası räweşendä yasalgan poster-kartina büläk itte, ä Röstäm Nurgali ulı anda imzasın kaldırdı häm «Alga!» dip yazdı.