Radik Gimatdinow «Sälät-Monreal» smenası katnaşuçıları belän küreşte ← kire kaytirga

Uzgan atna axırında Sälät yortında «Sälät-Monreal» komandası belän oçraşu uzdırılıp näticä yasaldı. Älege smena Kanadada Tatarstan Respublikası Prezidentı Röstäm Nurgali ulı Miñnexanow yardäme belän ütkärelgän ide. Oçraşuda Prezident yardämçese Radik Röstäm ulı Gimatdinow  katnaştı.

Oçraşuda Sälät fondınıñ başkarma direktorı Timur Söläymanow da bar ide.

«Radik Röstäm ulı, Sälät belän härdaim elemtädä toruçı, törle kiñäşläre belän bezgä yardäm itüçe şäxes» - dip süzen başlap cibärde Timur Cäüdät ulı.

Möxtäräm kunagıbız, üz çiratında, katnaşuçılarnıñ fikerlären tıñlap, kiläçäkkä plannarın da işette.

Ni öçen näk menä Kanada? Lagernıñ uzdırılu urını ni öçen bik möhim? Mondıy häm başka soraularga cawaplar da yañgıradı.

Belgänebezçä, berençe tapkır gına uzdırıluçı smenanıñ oeştıru komandası bik köçle ide. Älege smenanıñ  tulı komandası, oeştıru mäsäläläre xakında Sälät yaşlär üzäge direktorı Aygöl Gabdraxmanowa fikere:

«Sälät-Monreal»  –  yaña xis-kiçereşlär, onıtılmas mizgellärgä bay bulgan smena ide. El başında bez 270 gariza kabul ittek. Yartı el däwamında katnaşuçılar belän oçraşular uzdı. Şular näticäsendä Tatarstannan 5, millättäşlärebez arasınnan 21 bala saylap alu etapların uzıp finalga çıktı. Smena 10 kön däwamında güzäl tabigatle Kwebek cirlegendä uzdı. Programmaga kilgändä, törle ostaxanälär, tatar tele häm tarixına kagılışlı däreslär, Sabantuy kebek milli bäyrämnär, kwestlar,  Monreal häm Otttawaga säyaxät....

Oçraşu däwamında skayp aşa älege proektnıñ Kanadadagı kuratorı, Sälät weteranı Alimä Säläxetdinowa belän dä elemtägä kerdek.

«Proekt barı tik uñay fikerlär genä kaldırdı. Kanada, AKŞ, Çexiyadän bulgan balalar  tatar telen kamilläşterdelär, xäzerge köndä xätta tatar tele kurslarına da yörilär. Balalar gına tügel, 10 kön däwamında uzgan smenaga kunak bularak kilgän äti-änilär dä tatar tele belän tiränten kızıksına başladılar. Katnaşuçılar Kazanga kilep, Sälät moxite belän tagın da kızıksınu teläge barın belderdelär. Ber katnaşuçı xätta Sälätneñ cäyge kampaniyasendä berär smenada äydaman  bulası kilüen äytte»  – dip fikere belän urtaklaştı Alimä.

 Katnaşuçılar fikere:

Ence Äxmätcanowa, Sälätneñ küp kenä proektlarında katnaşuçı Sälät aktiwistı: «Smena miña bik oşadı. Organizm başta Kanadadagı wakıt aermasına künegä almadı, läkin annarı iyaläştem. Millättäşlärebez belän tatar telendä aralaşu, alarga Sälät turında kübräk söyläüne üzemä maksat itep kuygan idem. Buldırdım dip uylıym».

Alisä Camaliewa, Sälät aktiwistı, älege proektnıñ äydamanı: «Kanadaga oçu, minem çit ilgä çıgumnıñ iñ berençe säyaxäte. Minem xislärne süz belän genä äytep beterep bulmıy. Bez, äydamannarga gına tügel, Tatarstannan bargan sälkeşlärgä dä bu üz sälätlären tagın da açu, üsterüneñ ber mömkinlege buldı».

Ilsöyar Xismätowa, Sälät aktiwistı, älege proektnıñ äydamanı: «Çit il katnaşuçıları belän eşläü ciñel  ük bulmadı diyar idem. Berençe könnärdä  alar bezneñ Sälätneñ aktiwist balaların kürep şakkattılar. Läkin smena däwamında alar bezgä künegep betep, şäp programmada katnaşıp xätta axırdan sarı galstukka da iya buldılar».

Aliya Wäliewa, Sälät aktiwistı, älege proektnıñ äydamanı: «Äydaman eşeneñ töp burıçı – balalarnı smenaga kızıksınunı arttıru. Bez buldırdık! Çit ildä yaşäüçe sälkeşlärebez tatar cırların, biyulären öyränep, bügenge köndä internet aşa bezneñ belän elemtäne ezmilär».

Filyuzä Xäyrullina, kurator, Tatarstan Respublikası yaşlär eşläre häm sport ministrlıgı wäkile: «Smena axırında barıbız da diyarlek küz yaşläre belän taralıştık, çönki smenanıñ tämamlanuın telämägän idek. Oeştıru komandası bik köçle, äydamannar üz eşlären tögäl başkardı. Mondıy komanda tuplau ciñel eş tügel. Min yaşlärebez belän gorurlanıp kayttım».

Oçraşu axırında möxtäräm kunagıbız Radik Gimatdinowtan cılı süzlär işetü, kiläçäktä dä älege proekt yaşärgä tieşlege xakında fikerlär yañgıradı.

                                                                             Sälät media-mäktäbe ukuçısı Liya Miftaxetdinowa