Kazanda “Fänsar” Akademiyaseneñ fänni-tikşerü konferentsiyase bulıp uzdı ← kire kaytirga

             2014 nçe elnıñ 6 nçı noyabrendä közge sessiya kısalarında “Fänsar” Akademiyaseneñ fänni-tikşerü konferentsiyase bulıp uzdı. Älege çara PGAFKSiTnıñ uku-laboratoriya korpusında, 9-11 nçe sıynıf ukuçıları häm studentlar öçen ütkärelde. Biredä Tatarstan Respublikasınıñ 18 rayonınnan 100 keşe katnaştı. Katnaşuçılar sentyabr-oktyabr aylarında fansar.selet.biz saytında bargan distantsion etap nigezendä saylanıp alındı.

            Konferentsiya közge sessiyaneñ axırgı etabı bulıp tora. Monda cämgıyat beleme, tarix, matematika häm fizika kebek fän sektsiyalärendä eş kaynadı. Tarix häm cämgıyat beleme fännäre ölkäsendä katnaşuçılarga bäyane “Sälät” Fondınıñ başkarma direktorı Timur Söläymanow, Ministrlar Kabinetı Apparatınıñ ictimagıy üseş belän idarä itü bülege citäkçese urınbasarı Almaz Xäbibullin, Tatarstan Respublikasınıñ Däülät Sowetı karamagındagı ictimagıy yaşlär palatası ägzası Robert Minegulow häm TNW telekanalınıñ alıp baruçısı Albert Şakirow birde. Ä “Matematika-Fizika” mäydançıgınıñ ekspertları bularak “Fänsar” distantsion mäktäbeneñ direktorı, K(P)FU ukıtuçısı Änwär Tuykin, “Fänsar” Akademiyase proektı citäkçese, K(P)FU ukıtuçısı Elina Stepanowa häm “Sälät” Fondınıñ baş xisapçısı Roza Stepanowa katnaştılar.

            Konferentsiya 3 sägat däwamında bardı, jyuri xökemenä 27 doklad täkdim itelgän ide. Timur Söläymanow katnaşuçılarnıñ fän dönyasına berençe adımnarı gına bulsa da, eşläreneñ bik üzençälekle buluların iskärtep uzdı. “Kiläçägegezne fän belän bäylärgä telisezme, yukmı – möhim tügel. Belem aluga, tikşerülärgä, aek fiker söreşenä bügen niçek omtılasız – şunı saklıy belegez. Älege konferentsiya sezgä ilham birsen, därt östäsen. Ä “Sälät” sezgä bu eştä härçak yardäm itär!” – dip belderde ul.

Konferentsiya axırında jyuri iñ äybät dip tabılgan eşlärne aerıp kürsätte. Tik monıñ belän genä eş betmi äle: 2015 nçe elnıñ martında katnaşuçılarnı Akademiyaneñ yazgı sessiyase kötä. Dimäk, çiratta tagın ber fänni-praktik konferentsiya bulaçak digän süz. “Fänsar” balalar häm yaşlär uñış akademiyaseneñ asılı da şunda bit – xäzerge yaş buında belemgä mäxäbbät tärbiyaläügä häm fän dönyasına omtıluçılarga praktik yaktan uñaylıklar tudıru.

Akademiya gadäti häm çittän tış uku mäktäbe formatında çınga aşırıla. Mögallimnär bularak Räsäyneñ aldıngı uku yortlarınıñ ukıtuçıları çakırıla. Şulay uk Akademiya kısalarında on-layn mäktäp tä eşläp kilä, sessiyalär dä uzdırıla.

“Fänsar” Akademiyase inde 2 eldan artık eşläp kilä. Älege wakıt aralıgında proektta 500 dän artık ukuçı katnaşkan häm alarnıñ 100% da yugarı uku yortlarına kerä algannar.