Ruslan Sabirow: “Iñ belemle sälkeşlärgä şäp büläklär dä äzerlädek” ← kire kaytirga

Bıel berençe tapkır Bilär Forum kısalarında Bilär cire, Böek Idel bue Bolgar däüläteneñ tarixına bagışlangan “Tamırlar” respublikaküläm olimpiadası uza. Üz belemnären forumda katnaşkan här sälkeş sınap karıy ala. Ciñüçelärne niçek büläklilär? Olimpiadaga niçek äzerlänergä? Bu häm başka soraularga “Tamırlar” olimpiadası koordinatorı, intellektual turnir citäkçese Ruslan Sabirow cawap birde.

- “Sälät” belän kayçan tanıştıgız?

- Min “Sälät”kä 2015 elda kildem. “Sälät-Rauşan” alanına sälkeş bulıp bardım, annan “Izge Çişmä”dä wolonter idem. Küp kenä alannarda ostaz buldım, aeruça “Sanak” alanında. Inde 10 el ütkän ikän, bıel “Sälät”le bulunıñ yubileen bilgeläp ütäm.

- “Tamırlar” olimpiadası oeştırırga kem täkdim itte?

- Bu - Timur abıy Söläymanownıñ ideyase. “Sälät” 1997 eldan birle Izge Bilär cirenä kayta. Gomumän, bezneñ bu urın belän bäyläneşebez zur, çönki alannarnıñ isemnärendä dä Idel bue Bolgar däüläte xannarınıñ isemnären kullanabız. “Tamırlar” olimpiadası - ul böek xannar cirenä, tarixka xörmät kürsätü. Bıel bez Bilär Forumnıñ 3 smenasında da şuşı olimpiadanı oeştırdık.

- Olimpiadanıñ isemenä dä mägnä salıngandır?

- Döres, bez üzebezneñ tamırlarıbıznı öyränäbez. Tarixi wakıygalarga möräcägat itäbez, ellar aşa säyaxät itäbez. Iñ belemle sälkeşlärgä şäp büläklär dä äzerlädek. 3 forum näticäsendä 15 ciñüçe bilgelände. Berençe urınnarga - welosiped, ikençe, öçençe, dürtençe, bişençe urınnarga - “Alisa” kolonkası birelde.

- Katnaşuçılar arasında rekordsmennar barmı?

- Ildus isemle eget ike forumda da ciñüçelär rätenä kerde. Anıñ kim digändä 2 “Alisa” kolonkası bar. Soraular här smenada alışınıp tordı. Tulaem 150 sorau äzerlädek. Här forumda sälkeşlär ber sägat eçendä 50 sorauga cawap birde. Forum kısalarında olimpiadaga äzerlänü däresläre dä uzdı. Tarixi çıganaklarnı öyränüçe belgeçlär, arxeologlar sälkeşlär öçen maxsus ostaxanälär ütkärde.

- Xäzer tarix belän kızıksınuçı balalar küpme?

- Balalarnı tarix belän kızıksındıru xäzer kıenrak, çönki, ni kızganıç, balalar buş wakıtların da telefonda ütkärä. Balalarda intellektual turnirlarga igtibar arttıru öçen här elnı uennarga yaña formatlar kertergä tırışabız. Audio, wideo materiallar äzerlibez, yasalma fähem yardämendä äzerlängän biremnär uylap tababız. Döresen äytkändä, sälkeş bulganda da iñ yaratkan kiçke çaram - intellektual turnir ide. Mondıy tör çaralar bulırga tieş, anıñ üz auditoriyase bar.

- “Tamırlar” olimpiadası däwamlı bulaçakmı?

- Älbättä, bu proektnı däwam itäsebez kilä. Kiläse forumnarda da olimpiada uzar dip ışanam.