«Sälät-Samara» klubı kuratorı Sabir Galimullin uzaçak kışkı smena turında söyläde ← kire kaytirga
«Sälät-Samara» – sälät moxitenä kümelgän belem-birü, mädäni-küñel açu häm sport programması.
Katnaşu öçen garizalar monda kabul itelä.
Älege kışkı smena nindi bulaçak? Programmaga närsä kerteläçäk? Alanga kunakka kemnär kiläçäk? Barlık soraularga bezgä «Sälät-Samara» klubı kuratorı Sabir Galimullin cawap birde.
- «Sälät-Samara»nıñ kışkı smenasın ütkärü kemneñ täkdime?
- Cäyge alannı ütkärgännän soñ, bez balalarda küp kenä energiya kalganın añladık. Cäyge smena barışında da, alar älege 18 könne berär niçek ozınaytası kiräk digän fiker belän yöri idelär. Näk menä şunnan çıgıp, bez cäyge smenalardan kala şulay uk közge, kışkı häm yazgı alannarnı oeştırırga buldık. Älbättä, alarnıñ däwamlılıgı kıskarak, çönki töp belem birü protsessına berniçek tä komaçaulap bulmıy.
- Kışkı alannı oeşturuçı komanda nindi bulaçak?
- Minemçä, ul bik köçle!!! Direktor – Bulat Waliullin, ölkän äydaman – Tahir Kärimullin. Äydamannar turında söyläsäk, alar barısı da Sälät keşeläre.
- Sineñçä, äydaman bulu närsäne añlata?
- Minemçä, ul inwestor wazıyfasın başkara. Älbättä, iñ başta ul balalarnı barlık belgän mäglümatı, täcribäse belän tanıştıra. Soñınnan balalar näticä bularak törle bäygelärdä, forumnarda katnaşıp, üzläreneñ aktiwlıkların kürsätälär.
- Smenada küpme bala katnaşaçak?
- 45 sälkeş. Älbättä, bu küp tügel. Läkin bez alarga belem birü sıyfatı östendä eşlärgä dip üz aldıbızga maksat kuydık. Smena Samara şähärendä «Zolotaya rıbka» Balalar sälamätländerü-belem birü üzäge bazasında uzaçak.
- Programma nindi kızıklı üzençäleklärgä bay?
- Xäzerge wakıtta programma östendä kızu eşçänlek alıp barıla. Könneñ berençe yartısı belem-birü formatın yörtsä, ikençe yartısı Sälät moxitenä bagışlangan bulaçak.
- Alanga kunakka kemnär kiläçäk?
- «Tübätäy» tiz tuklanu çeltäre citäkçese Soltan Safin belän oçraşu oeştırılaçak. Bezneñçä, balalarga zur ürlärgä menep citkän eşmäkär belän şäxsän aralaşu bik kızık. Ul ciñel formatta, yaşlärçä sälkeşlär belän üz täcribäse belän urtaklaşır dip ömetlänäbez.
- Alan nindi sıynıfta ukıy torgan balalarga yunältelgän?
- Älege smena 7-8-nçe sıynıflarda belem aluçı ukuçılarga bagışlangan. Biredä Töp däülät imtixanına aktiw räweştä äzerlek baraçak. Sälkeşlärne ukıtu öçen maxsus ukıtuçılar bula. Läkin däreslär gadi tügel, kızıklı häm üzençälekle formatta uzaçak.
- «Sälät-Samara» klubı wäkilläre älege smena oeştıruında katnaşaçakmı?
- Älbättä! Alar alannı buldıruçı nigez bulıp sanala.
-Sez klubıgıznı yaña formatta çıgarırga telisez. Älege plannarıgız belän büleşsägez ide.
- «Sämrux-2016» premiyase «El klubı» nominatsiyasendä bez ciñü yauladık! Şuña kürä, bu elga plannar şaktıy küp. Iñ berençe çiratta, Samaranıñ barlık mäktäplärenä yörep Sälät oeşması, bezneñ klub eşçänlege turında söyläü. Şulay itep klubıbıznıñ katnaşuçılar sanın arttırırga digän teläk bar.
- Bügenge köngä sezneñ klubıgızda niçä wäkil bar?
- Xäzerge wakıtta klubnıñ aktiwı – 20 keşe. Alarnıñ härberse üzlärenä genä birelgän wazıyfanı üti. Minemçä, şundıy büleneş, axırda bik yaxşı näticälärgä kiterä.
- Sälkeşlärgä teläkläreñ.
- Sälkeşlär, sezneñ maksatçan buluıgıznı telim! Üzegezneñ tormış marşrutın döres tözep, biek ürlärne yaulawıgızga ışanam!