Sälkeşlär energiyaläre belän Izge Bolgarnı tañ kaldırdılar ← kire kaytirga
Sälätneñ iñ berençe häm iñ masştablı smenalarınıñ berse axırına yakınlaşıp kilä. Izge Bolgar cirendä urnaşkan muzey-tıyulık belän kürşedä IV Töbäkara «Bolgar-Tugan tel 2017» çatırlı alanı uza. Biredä sälätle yaşlär üzläreneñ sälätlären tagın da üsterälär, tatar moxitendä kaynıylar, mädäniyatebezne öyränälär.
Ber atna däwamında Tatarstan rayonnarınnan, Räsäyneñ distälägän töbäklärennän cıelgan balalar kalligrafiya, kuray, jurnalistika kebek yunäleşlärdä ostaxanälär tıñlıy aldılar. Smenanıñ axırında sälkeşlär Sälät media-üzäge citäkçese Gölşat Gıymadiewa belän berlektä gazeta da çıgaraçak.
«Bezneñ berläşmädäge iñ ähämiyatle töşençä – ul sez – kaderle balalar. Äydamannar da eşçänlegebezneñ aerılgısız öleşe, näk menä alar sezneñ öçen ikençe äti-äni rolen üti. Sezdän köç-därt börkelep tora, bez ilhamlanabız! Sez – bezneñ däwamçılarıbız. Sez – bezneñ kiläçägebez!» - dip belderde «Sälät» Fondınıñ başkarma direktorı Timur Söläymanow.
Açılu tantanasında möxtäräm kunaklar da katnaştı: Tatarstan Respublikası mägarif häm fän ministrlıgınıñ Töbäkara xezmättäşlek sektorı äydäp baruçı kiñäşçese Göliya Musina, Tatarstan Respublikası mägarif häm fän ministrlıgınıñ äydäp baruçı konsultantı Älfiya Äxätowa, Tatarstan Respublikası Spas rayonı başkarma komitetınıñ sotsial soraular buença citäkçe urınbasarı Elena Afonşina, Spas rayonınıñ uku-ukıtu bülege citäkçese Aleksandr Ermilin, Spas rayonınıñ yaşlär eşläre häm sport bülege citäkçese Äxtäm Wäliäxmätow.
«Kaderle katnaşuçılar! Ukuçılarıbız! Barıgıznı da TRnıñ mägarif häm fän ministrı Engel Näwap ulı Fättaxow isemennän sälamlim! Smenanıñ şäp uzuına ber şigem dä yuk, hawa torışı gına äzräk borçıp tora. Oeştıru komitetı sezneñ öçen kızıklı däreslär, mawıktırgıç ostaxanälär, mädäni-küñel açu çaraları äzerläde. Aktiw bulıgız! Tatar telen üsteregez! Uñışlar sezgä!» - dip teläklären belderde Göliya Musina.
Çınnan da, smenanıñ programması bik kızıklı. «HAVA projects» media-kompaniyasenä nigez saluçılarnıñ berse, rejisser Ilşat Räximbay rejissura neçkälekläre xakında söyläde. «Yalkın» jurnalı jurnalistları Aygöl Abdraxmanowa belän Iskändär Xäbibullin interwyu janrınıñ üzençäleklären añlattılar. «Idel» jurnalınıñ baş möxärrire Radik Sabirow, anıñ urınbasarı Gölüsä Zakirowa jurnalistikanıñ eçke tözeleşe, balalar şigriyate turında bäyan itte. «Matbugat.ru» internet-portalı citäkçese Danil Säfärow internet-jurnalistika, «Sobaka» jurnalı citäkçese Rädif Kaşapow elektron kitaplar dönyası, blogger Bulat Bravo uñışlı blog serlären çişte.
«Bez kilgäç koyaş ta çıktı. Oeştıruçılarga küñelle smena öçen räxmät! Biredä balalar, çınnan da, tatar moxitendä tärbiyalänälär. Räsäyneñ börle ölkälärendä yaşäüçe tatar yaşläre üzara aralaşa, dus-tatu yaşi. Uñışlar!» - dip ixlas teläklären belderde Elena Afonşina.
Sälät media-mäktäbe ukuçısı Alinä Sısoewa