9-26-nçı awgust aralıgında, «Fänsar» fän häm mägarif üzägendä (Alekseewsk rayonı) sälätle balalar häm yaşlär öçen «Sälät-Imänkäy» profille smenası uzaçak. Biredä Alekseewsk rayonınıñ 75 fän olimpiadaları, konferentsiya, icadi bäygelär, sport yarışları ciñüçeläre katnaşaçak. Şulay uk Tatarstannan «Sälät-Rauşan», «Sälät-Saba», «Sälät-Bilär kalası» i «Sälät-Yar Çallı» alannarında üzen aktiw kürsätkän 6 sälkeş buluı da kötelä.

Bıel smena tugan yaknı öyränügä häm millätara mönäsäbätlärgä bagışlangan bulaçak.

Mädäni häm sport çaralarınıñ çiratlaşuı, distälägän ostaxanälär balalarga fän dönyasın açar, üzlären törle yaklap kürsätergä yardäm itär.

Sälkeşlär intellektual uennarda, biyu battlında katnaşaçak, Iske Kazan muzey-tıyulıgında ütäçäk «Iske Kazan cıenı»na baraçak. 

Smenanıñ programmasın çınga aşıru öçen äydamannar komandası tuplandı. Alar balalarnıñ barlık uy-xıyalların çınga aşırırga äzer.

Ilnaz Nasretdinow, alannıñ ölkän äydamanı:

 - Berläşmädä min 2011-nçe eldan birle. Inde 2 el mine başcitäk rolenä çakıralar, tik min yaratkan «Rauşan»ımnı almaştırırga telämädem, üzemne kızıl futbolka öçen ölgermägän dip uyladım. Bıel miña «Rauşan» alanı gına citmi kaldı. Tagın Sälätkä barası kilä! Bäxetkä, «Imänkäy» smenasın täkdim ittelär. Minemçä, cäygä şäp nokta kuyu bulır bu!

Sälät minem öçen aerım ber dönya. Min biredä yaşim. Barlık duslarım berläşmädä bulgannar yaki bezneñ safka baskannar. Sez dä kuşılıgız, kurıkmagız! Yanäşägezdä härçak äybät keşelär bulır! Sälät ul – motiwatsiya! Uñışlar sezgä!