«Sälät-Samara» bıel «El klubı» bularak tanıldı ← kire kaytirga
Sälät berläşmäseneñ sälätle balaları häm yaşlärenä yardäm itüçe «Sämrux» el premiyaseneñ ciñüçeläre belän tanıştırunı däwam itäbez.
«El klubı» – «Sämrux 2016» premiyasendä ör-yaña nominatsiya, ul äle bıel gına yaşlärebezne sınap karadı. Sälätneñ 20 klubı arasınnan nibarı 5 klub kına ciñü öçen köräşä aldı: «Sälät-Aznakay», «Sälät-Yaşel Üzän», «Sälät-Bögelmä», «Sälät-Älmät» häm «Sälät-Samara».
Nominantlarnı «Sälät» yaşlär üzäge direktorı Aygöl Gabdraxmanowa häm Sälät klubı prezidentı, «Sämrux 2015» premiyaseneñ «El äydamanı» nominatsiyase ciñüçese Igor Smirnow täbrikläde. Ciñüçe bulgan «Sälät-Samara» klubı isemen dä näk menä alar iglan ittelär.
«Sälät-Samara» klubı räise Sabir Galimullinnıñ xis-kiçereşlären belü maksatınnan Sälät aktiwistı belän äñgämä kordık.
- Sabir, sezneñ öçen premiyadä katnaşu närsä ul?
- «Sämrux 2016» el premiyasendä katnaşu bezneñ öçen zur wakıyga buldı. Klubıbız äle bik yaş, nibarı ber el gına eşli. Tik bu el bik näticäle buldı: bik küp çaralar ütkärä aldık. Ä älege nominatsiyadä ciñü – bezneñ urtak tırışlıgıbız näticäse.
- El däwamında «Sämrux»ta ciñü öçen tırıştıgız dimäk?
- Äye. Bıltır aldıbızga premiyaneñ şuşı nominatsiyasendä ciñärgä digän maksat kuygan idek.
- Kiläçäkkä plannarıgız xakında da söyläp uz äle.
- Maksatıbızga ireşkän bulsak ta, tuktalıp kalırga isäp yuk. Härwakıt aldıngı bulu häm eşläü teläge belän yanabız. Ilhamıbız sürelmäs dip uylıym.
- Klubıñ belän dä tanıştır inde.
- Klubnıñ eşçänlegendä 40 keşe katnaşa. Alar barısı da bik sälätle, «sälkeş» digän zur isemne yörtergä laeklılar. Bezgä yardämnäre öçen «Yaktılık» mäktäbe direktorı Radik Räfkat ulı Gazizowka; mäktäbebez zawuçları Färidä Gomär kızı Xämidullowa, Inzilä Ralif kızı Gıyzzätullinaga zur räxmätebezne belderäbez!
- Bez dä kuşılabız! Tagın ber kat ciñüegez belän!
Sälät media-mäktäbe ukuçısı Ayzilä Gıyzzätullina
Samara şähäre dä Sälät tarixına üz yulın sala başladı. Bu elnıñ cäendä berençe tapkır «Sälät-Samara» smenası uzaçak. 17-nçe mart könne isä, 18:30, Sälät yortında smena turında tulırak mäglümat tuplıy häm «Radioefir» temasına ostaxanä tıñlıy alasız. Räxim itegez!