Bilär kalasında uzuçı sessiya härwakıt üzençälekle bula ← kire kaytirga

Bügennän başlap 7-nçe noyabrgä kadär Bilär kalasınıñ «Fänsar» üzägendä M.I.Mäxmütow isemendäge «Fänsar» mäktäbeneñ közge sessiyase uzaçak. 

Mäktäp uku-ukıtu, küñel açu yunäleşen üz eçenä ala. Bıel älege mäktäp KFU belän berlektä uzdırıla. Matematika, cämgıyat beleme, fizika, ximiya, biologiya fännäre buença kızıklı häm faydalı däreslär planlaştırılgan.

Matematika fäne däreslärendä ukuçılar KFU-nıñ mexaniko-matematika fakultetın tämamlagan, 2008-nçe eldan başlap «Sälät» proektlarında katnaşkan, «Gıylmi Yarışlar Çempionatı»nıñ koordinatorı  Alsu Gataullina belän oçraşaçaklar.

Biologiya fäne däresen bioximik, molekulyar biolog «Student goda-2015» bäygese ciñüçese Dinara Fäysxanowa ukıtaçak.

Ximiyadän isä  A.M.Butlerow isemendäge Ximiya institutınıñ 5-nçe kurs studentı, Räsäyküläm olimpiadalarda bik küp katnaşkan, yaş, sälätle eget Ewgeniy Blednıx belem biräçäk.

Cämgıyat beleme häm tarixnı üzebezneñ kızıbız, Sälät proektlarında aktiw katnaşkan, yuristprudentsiya buença olimpiadalar ciñüçese,

«Derjawin ukuları» konferentsiyase katnaşuçısı, Tatarstan Respublikası prezidentınıñ stipendiyasen algan Läysän Gataullina ukıtaçak.

Älege ukıtuçılar sostawında şulay uk «Fänsar» mäktäbendä 2014-nçe eldan birle ukıtkan, Kazan şähäreneñ 131-nçe nomerlı fiziko-matematika litseen uñışlı tämamlagan, «Lider goda-2014, 2015» bäygese oeştıruçısı, kızıl diplomlı Anna Şäräfiewa da bar. 

Ädäbiyat fäne şulay uk «Sälät»le, KFUnıñ 4-nçe kurs studentı Rimma Gıyläcewa kulında.

Uku-ukıtu programması bik tıgız bulsa da, intellektual, küñel açu çaralarına da wakıt tabılgan: English Club kwestı, «Köyne otıp al» bäygese, «Närsä? Kayda? Kayçan?», Art-razgruzka, SMM buença ostaxanä, «Open mic», fänni stand up, kontsert, traditsiyagä äylängän şämçek h.b.

Dinara Fäysxanowa, ukıtuçı:

- «Sälät» berläşmäse  turında min küptännän işetep beläm. Monda minem duslarım bik küp: äydamannar, mäsälän. Uzgan el minem ber genä köngä genä «Fänsar»ga barganım buldı. Balalarnıñ biologiya fäne buença kızıksıngan soraularına cawap tabarga bulışasım kilä. Kiläçäkläre öçen bu fänne döres saylagannarmı, yukmı ikän digän sorauga da bergäläp cawap tabarbız dip uylıym. Üz täcribämnän çıgıp ukuçılar belän dä urtaklaşa alsam, min üzemne cidençe küktä kebek xis itär idem. Uñışlar, balalar!

Läysän Gataullina, ukıtuçı:

- Bu smenaga berençe tapkır baram. 2011-nçe häm 2013-nçe elda «Rauşan»da sälkeş, ä 2015-tä «Sanak»ta äydaman buldım. Şul eldan birle minem küñel  «Sälät-Sanak» smenasına tartıla, üzem gumanitar fännärne üzitsäm dä. 2016-nçı elda metodist buldım, ä 2017-dä ölkän äydaman.

Bu smenadan min menä närsä kötäm: balalarnıñ yaña belemnärgä omtılu xise bulunı, küzläre här närsädän yanıp torunı. Buldıra almagan eş yuk! Nindi genä eşkä alınsagız da, kurıkmagız!

Märyam Gıymadiewa, katnaşuçı:

- «Sälät»tä min 2015-nçe eldan. «Sanak-2016, 2017» smenalarında, «Olimp-2017» (közge sessiya), «Tel-2016, 2017», «Iske Kazan-2017»dä aktiw katnaştım. «Sälät»neñ  küp kenä proektlarında katnaşırga tırışam häm yaratam. Mäsälän, G.Tukaynıñ 130 ellıgına uzdırılgan şigriyat bäygesendä prizlı urın da alganım buldı.  «Fänsar» mäktäbenä berençe tapkır gına baram. Duslarımnan älege smena turında bik küp yaxşı fikerlär işetkänem buldı. Monda – süz belän genä äytep beterä almagan moxit, dus-tatu gailä. Min monı üz küzem belän kürep, bu atmosferanı toep kararga buldım. Min bıel 9-nçı sıynıfta, bu smenada näk menä ximiya fäne buença BDIga äzerlänäsem kilä. Ukıp kına kalmıyça, yaña duslar tabu niyate belän dä barırga buldım.