«Sälät» alannarı yözlägän yaş sportçılar, liderlar häm media belgeçlärne üsterä! ← kire kaytirga
«Akbüre» – Tatarstan Respublikasınıñ sälätle balalar häm yaşlären tabu häm üsterügä, östämä belem birügä, uku öçen uñaylı şartlar tudıruga yunälderelgän profille Sälät alanı. 2025 elnıñ cäyge smenasında 70 tän artık bala katnaştı: alar arasında Kazan, Mäskäü, Yar Çallı, Baltaç, Biektau, Balık Bistäse rayonnarı häm xätta Törkiyadän kilüçe katnaşuçılar da bar ide.
Uku-ukıtu programması liderlık potentsialın üsterügä yunälderelgän häm SMM, grafik dizayn, ingliz tele, şäxsi üseş häm proekt eşçänlege buença däreslär häm ostaxanälärdän gıybarät ide. Här könne intellektual, icadi, muzıkal, akterlık häm liderlık sälätlären üsterügä yunälderelgän mädäni häm sport çaraları uzdırıldı. Monnan tış, Böek Watan sugışı geroyları istälegenä bagışlangan «Min gorurlanam» patriotik aktsiyase aerım igtibarga laek. Smena katnaşuçıları şulay uk «Sälät» proektları citäkçese Ädip Älmir häm «Garmoniya» psixologiya üzäge citäkçese Xäbil Säxäbiew belän oçraştı, alar balalar öçen lektsiyalär häm treninglar ütkärde.
Elga buenda urnaşkan unikal sport yunäleşle «Kama» alanı – sport häm turizm, icat häm küñel açu belän bergä aktiw yal itü öçen ideal urın. Älege alan üzläreneñ fizik künekmälären häm icadi sälätlären üsterergä telägän balalar öçen intensiw programma täkdim itä. Balalar üzläreneñ sport kazanışların yaxşırtıp kına kalmıyça, komandada eşlärgä dä öyränä aldı.
Alan yunäleşe kısalarında saylangan sport törendä trenirowka (futbol, woleybol, basketbol, tennis), turizm ölkäsendä belem alu, intellektual östäl uennarı, sport biyuläre kebek däreslär oeştırıldı. Alar öçen ataklı spikerlar, icat keşeläre häm üz eşeneñ ostaları unikal belemnär belän büleşte. Kön barışında balalar saf hawada sport uennarı, küñelle kiçke çaralarda katnaştı häm törle yaklap üzläreneñ sälätlären kamilläşterä aldı.
«Batır» – şulay uk sport häm turizm yunäleşendäge cäyge profille Sälät alanı. El saen alanda Çuwaşiya häm Tatarstan Respublikalarınnan sport häm turizm belän şögıllänüçe, sälamät yaşäü räweşe alıp baruçı, şähär, respublika häm Bötenrossiya külämendä uzdırıluçı yarışlarda ciñü häm prizlı urınnar yaulagan 12 yaştän alıp 18 yaşkä kadärge balalar yal itä.
Smenanıñ uku-ukıtu programması kısalarında Tatarstan Respublikasınıñ ataklı trenerlarınnan futbol, basketbol, woleybol, östäl tennisı, stretçing, xoreografiya häm şaxmat buença däreslär uzdırıldı. Monnan tış, sälkeşlär öçen wokal, gitarada uynau, badminton, skrapbuking, räsem, «Närsä? Kayda? Kayçan?» uenı, debatlar buença häm başka kızıklı ostaxanälär ütkärelde.
«Galäm» alanı Rossiya Federatsiyaseneñ törle regionnarınnan —
Mäskäü, Tübän Nowgorod, xätta Ispaniya, Frantsiya häm Törkiya illärennän kilgän 220 bala öçen
media ölkäsennän törle künekmälär belän tanışıp, tormışta kullanırga häm üzläşterergä öyränergä mömkinlek birde. Mädäni programma şulay uk bik tıgız häm aktiw ütte. Galäm alanında gına uza torgan çaralar — Sälkeşlär yarışı, Galäm köne bu elnı da uzmıy kalmadı. Smenanıñ här köne belem birü häm uen däresläre, sport yarışları häm mädäni kiçke çaralar belän ürelep bardı.
Sälkeşlär uku aldınnan yaña köç häm energiya tupladılar, faydalı belemnär üzläşterdelär häm mädäni çaralarda üz sälätlären kürsättelär. «Sälätle cäy - 2025» kampaniyase monıñ belän genä tämamlanmıy, alda sälätle balalarnı «Imänkäy» häm ör-yaña «Şayan» alannarınıñ intensiw programması kötä, biredä katnaşuçılar ekologiya häm telewidenie nigezlärenä töşenä alaçak.
