«Olısı da , keçese dä – barısı da Bilärdä»: XIV Xalıkara «Sälät» yaşlär uku-ukıtu forumında «Asıl gailä cıenı» programması ütte ← kire kaytirga

12 iyul könne Bilärdä XIV Xalıkara «Sälät» yaşlär uku-ukıtu forumınıñ Sälät Bilär Forum smenası kısalarında «Asıl gailä» proektı katnaşuçıları öçen «Asıl gailä cıenı» programması uzdı. Çaraga Tatarstannıñ törle rayonnarınnan, Kazan häm Yar Çallı şähärlärennän, şulay uk başka töbäklärdän yakınça 250 keşe cıeldı.

«Asıl gailä» – Sälätneñ törle proektlarında katnaşuçı gailälär öçen unikal proekt. Äti-änilär, äbi-babaylar, nänilär häm bäbilär, 0 yaştän alıp ölkännärgä kadär - barısı da 1 köngä Bilärgä kayttılar.

Bu elgı programmada törle yaştäge katnaşuçılar öçen bay programma äzerlängän ide: ostaxanälär, uennar, sport çaraları, «Sälät» dönyasına bagışlangan kwiz, diskussiyalär häm «Xäräkättä bäräkät» proektı tarafınnan oeştırılgan milli uennar.

Forum territoriyasendä Sälät gailäläre: Sälät «Almagaç» mäktäbe ukuçıları, «Bäläkäç» klubı katnaşuçıları, berläşmä aktiwistları gailäläre dä cıeldılar. Alar icadi, intellektual häm sport mäydançıklarında Sälät berläşmäseneñ törle buın katnaşuçılarınıñ üzara bäyläneşenä yunälderelgän «Asıl gailä cıenı» programmasında katnaştılar.

«Asıl gailä cıenı» täcribä alışu, gailä kıymmätläre turında aralaşu, monı üz misallarında kürsätü, urtak kızıksınular häm dönyaga karaş turında söyläşü öçen unikal mäydan buldı.

Programma kısalarında balalar tärbiyaläü, traditsiyalärne saklau häm gailädä sälamät moxit buldıru häm üsterü mäsälälärenä bagışlangan ostaxanälär, lektsiyalär häm diskussiyalär ütte. Şulay uk, gailälär hawada sport programmasınnan läzzät alıp, «Korıltay» säxnäsendä icadi sälätlären kürsätep, kwiz uenında üz belemnären sınadılar.

«Asıl gailä» — «Sälät» forumında el saen uza torgan, tirän maksatları häm bay programması bulgan unikal proekt.