Timur Söläymanow: «2018-nçe elnıñ cäe «kızu bulaçak!» ← kire kaytirga
15 meñ katnaşuçı, 24 lager, alar arasında yañaları da bar häm 6 Sälät Forumı. Bu – fantastika tügel, ä bezneñ 2018-nçe el öçen bilgelängän plannar. Media üzäkneñ irtänge aşında «Sälät» Fondınıñ başkarma direktorı Timur Söläymanow, «Sälät» yaşlär üzäge direktorı Aygöl Gabdraxmanowa, Sälät profille alannarına äzerläü üzägeneñ citäkçese Albina Kadirowa älege xäbärlär belän büleştelär.
Här elnı yaña smenalar açıla, sälkeşlär sanı eldan-el arta bara. Bu elnı, berençe tapkır Kanadadagı tatar wäkilläre cämgıyate belän berlektä «Sälät-Monreal» smenası oeştırıldı. Ämma, bez, ireşkän uñışlarıbızda gına tuktalıp kalırga cıenmıybız, yaña proektlarnı da tormışka aşırırga omtılabız. Timur Söläymanow wägdä itkänçä, 2018-nçe elnıñ cäe bik «kızu» bulaçak.
Şulay uk, 2011-nçe elga kadär eşläp kilgän Kara diñgez buendagı «Sälät-Arşan» smenasınıñ yañadan başlanuı kötelä.
Sälät ukuçılarga, studentlarga, abiturientlarga küp kenä yaña proektlarda, smenalarda mömkinleklär tudıra, yugarı uku yortlarına caylaşunı da ciñeläytä. Mondıy smena bulıp, «Sälät-Akbüre» smenası sanala. Ul şäxes, oratorlık ostalıgınıñ üseşenä yunältelgän yaña smena bulaçak.
«Smenanıñ iseme Sälät proektlarınıñ citäkçese Ädip Älmir tarafınnan täkdim itelde. Ak büre riwayatenä ışansañ, ul – keşelär häm xaywannar dönyasın berläşterüçe köçle obraz. Ä «Sälät-Akbüre» mäktäp yaşennän student çorına küçü smenası bulıp tora», – dip añlattı Timur Söläymanow.
2018-nçe elnıñ tagın ber yañalıgı: «Sälät-Olimp» mäktäbe üzeneñ eşçänlegen tagın da kızıklı rejimda alıp baraçak. Moña kadär bu smena
uku elı däwamında, mäktäp kanikulları wakıtında ütkärelde. Tizdän balalar iyun aylarında uk olimpiadalarga, BDIga, TDIga äzerlänä alaçaklar. Ukuçılar belän kwalifikatsiyale belgeçlär, yugarı uku yortları ukıtuçıları eş alıp baraçaklar.
«BDI – balalarga, äti-änilärgä dä bik tanış häm aktual tema. Bigräk tä rayon üzäklärendä yugarı kwalifikatsiyale ukıtuçıların tabu – ciñel eşlärdän sanalmıy. Ä bez, Kazan Federal Uniwersitetı belän berlektä imtixannarga sıyfatlı äzerlänergä yardäm itüçe üz eşläreneñ ostaların tuplıybız », – dide Timur Söläymanow.
Bu cäyne traditsion Sälät Forumı 6 tapkır uzdırılırga isäplänä. Älege yañalık jurnalistlarda zur kızıksınu uyattı. Mondıy täkdim Tatarstan Respublikası Prezidentı Röstäm Miñnexanow tarafınnan citkerelde. 21-nçe iyunnän 8-nçe awgustka kadär forumnarnıñ uzdırıluı kötelä. Älege forumnarda ilebezneñ barlık töbäklärennän, erak çit illärdän 15 meñgä yakın bala katnaşuı kötelä.
2017-nçe elda forum 2 tapkır ütkärelde. 2-nçe smena küp kenä balalar öçen Sälät dönyasın açtı. Statistika kürsätüençä, katnaşuçılarnıñ 70% berençe tapkır kilüçelär buldı, alar kiläçäktä dä Sälät xäräkätendä katnaşırga teläk belderdelär.
«Balalarnıñ smenalarda, proektlarda Sälät belän kızıksınuları könnän-kön arta. Elek garizalar birü kampaniyase yaz köne başlansa, bügenge köndä bez cäyge alannarga barırga teläk beldergän yözlägän gariza aldık. Misal öçen, xäzerge wakıtta «Sälät-Ruxiyat» alanına 100 urınlık smenaga 104 gariza kilep ireşte», – dip bilgeläde Sälät profille alannarına äzerläü üzägeneñ citäkçese Albina Kadirowa.
Häm bu bik äybät, çönki, bez, ilneñ törle poçmaklarınnan balalarnı berläşterep, laeklı kiläçäk buın tärbiyalärgä omtılabız. Üseş öçen üzeñ telägän yunäleşne portfolio-selet.ru saytında sayla!
Sälät Media-mäktäbe ukuçısı Alinä Sısoewa