Tatarstanda Xalıkara «Sälät» yaşlär forumı açıldı ← kire kaytirga

Bilär cirlegendä X Xalıkara «Cälät» yaşlär uku-ukıtu forumınıñ berençe smenası – JUNIOR SKILLS BILER FORUM başlandı. Ul 23 iyungä kadär däwam itäçäk.

Berençe smenaga Tatarstannıñ barlık rayonnarınnan, Samara häm Leningrad ölkäläre, Udmurtiya, Başkortstan, Çuwaşiya, Mariy-El häm Mäskäüdän balalar häm yaşlär kilde. Biş kön däwamında Sälät moxitendä yal itü öçen Tatarstan cirlegenä meñnän artık keşe cıeldı.

«Sälätkä kilü teläge inde küptän bar ide. Ämma sport belän nıklap şögıllängäç, cäem gel sport cıennarında uza ide. Ä bıel, nihayat, Bilärgä baru mömkinlege tudı! Iñ oşaganı, älbättä, Sälät moxite. Törle sörännär öyränäbez, yarışlar bulsa, üz alanıbız öçen can atabız. «Bolgar-Tugan tel»neñ berençe smenasında futbol buença berençelekne algan idek inde, xäzer menä forumda da ciñärgä isäp! Äydamannar iskitkeç! Härçak kiñäş birälär, kiräk çakta yardäm itälär. 18 tulgaç, üzem dä äydaman bulırga xıyallanam», – di Samaradan kilgän sälkeş Ildar Gıyläcetdinow.

«Sälättä min berençe tapkır. Moñarçı kilmägänemä bik ükenäm. Çönki mondagı moxit tä, keşelär dä soklanu uyata! Uku-ukıtu programması bik oşıy: däreslär dä bar, ämma şul uk wakıtta mädäni çaralarga da, sport yarışlarına wakıt kala. Tirä-yundäge duslarıñnan nindider yañalık öyränü öçen şäp mömkinlek. Mäsälän, forumga kilgänçe üz alanımda ukuleleda uynarga öyrändem», – di smenaga Udmurtiyadän kilgän Alsu Kasıymowa.

Bilärgä kilügä, katnaşuçılar öçen forum territoriyase buença welkom-tur oeştırıldı. Kiç säxnä yanında JUNIOR SKILLS BILER FORUM-nıñ räsmi açılış tantanası ütte.

Smena katnaşuçıların «Sälät» yaşlär üzäge direktorı Aygöl Gabdraxmanowa sälamläde: «Bez Bilärgä – tugan cirebezgä kayttık. Bu cäy bezneke bulaçak! Üzebezne, äydaman häm başcitäklärne, oeştıru komitetın sälamlik. Alar sezneñ öçen bu forumnı el bue äzerläde».

Üz çıgışında ul Alekseewsk munitsipal rayonı administratsiyasenä, Tatarstannıñ yaşlär eşläre, fän häm mägarif ministrlıklarına häm forumnı oeştıruga öleşe kergän härkemgä räxmät süzlären citkerde.

Traditsiya buença Rossiya, Tatarstan, Sälät häm Forum älämnäre kütärelde.

Şulay uk bu kiçtä «Sälät» Forumınıñ Ilgiz Şäyxraziew häm Zärinä Wildanowa başkaruındagı «Ä sin äzerme?» dip atalgan ör-yaña cırı täkdim itelde.

Räsmi öleştän soñ smena katnaşuçıları «TAMASHOW» kiçke çarasında cıeldı.

Isegezgä töşeräbez, JUNIOR SKILLS BILER FORUM-nıñ töp ideyase – mäktäp ukuçılarına xäzerge zaman häm kiläçäk hönärlären üzläşterü öçen yaña mömkinleklär tudıru. Katnaşuçılar mobil robototexnika, awiamodelläşterü, elektronika, landşaft häm interer dizaynı, sketçing, räsem sängate, prototiplaştıru h.b. yunäleşlär belän tanışaçak.

Forumnıñ uku-ukıtu programması balanıñ şäxes bularak üseşenä etärgeç birä torgan, praktikaga yunälgän, uen, yarış, wakıyga formatındagı däreslärne üz eçenä ala. Forum kunakları häm spikerları arasında RF dizaynerlar berlege Witse-prezidentı, Rossiyaneñ atkazangan mädäniyat xezmätkäre, Olimpiya obektları awtorlarınıñ berse Yuriy Mençits (Mäskäü), arxitektor, urbanist, «Kazan yarminkäse» kürgäzmälär üzägeneñ üseş kontseptsiyasen eşläü konkursı ciñüçese Zölfiya Ilkaewa, rässam Ruslan Ibrahimow, kalligraf Ayzat Minhacew, Kazan däülät arxitektura-tözeleş uniwersitetınıñ «DAŞKA» balalar arxitektura-dizaynerlık mäktäbe ukıtuçıları, Mäskäü politexnika uniwersitetı häm Kazan milli tikşerenü texnik uniwersitetı–KAI wäkilläre h.b. bar.

Çara Tatarstan Respublikası Prezidentı Röstäm Miñnexanow yardäme belän ütä.

FOTOREPORTAJ: vk.cc/c36YqS