Nurbäk Batulla «Altın bitlek 2018» nominantı ← kire kaytirga

Duslar, şatlıklı xäbär!

Sälätle Nurbäk Batulla «Älif» spektakle kısalarında «Iñ yaxşı biyuçe nominatsiyase»ndä «Altın bitlek» («Zolotaya maska 2018») Räsäy milli teatral premiyase nominantı buldı.

Isegezgä töşeräbez, 20-nçe sentyabr könne G.Kamal teatrınıñ keçe säxnäsendä «Älif»neñ premerası bulıp uzgan ide. Spektaklneñ ideya awtorı, rejisserı Tufan Imametdinow, xoreografı Marsel Nuriew, biyuçe – Nurbäk Batulla, kompozitor – Elmir Nizamow. 

Älege premiyane tapşıru tantanası 2018-nçe elnıñ 15-aprel könendä Mäskäü kalası Zur teatrınıñ yaña säxnäsendä uzaçak.
Dram teatrnıñ ekspertlar sowetı barlıgı 555 spektakl, muzıkal teatrnıkılar isä Mäskäü, Sankt-Peterburg häm Räsäyneñ distälägän teatrlarınnan 277 spektakl karap näticä yasagannar.

«Altın bitlek» RF-neñ teatr wäkilläre soyuzı tarafınnan 1993-nçe eldan aktiw eşçänlek alıp bara. Teatr sängateneñ törle ölkälärenä karagan yunäleşlär buença iñ-iñnär bilgelänä.  

Festiwal RF-neñ teatr wäkilläre soyuzı, RF-neñ mädäniyat ministrlıgı yardäme belän uzdırıla.

Sälät weteranı Nurbäk Batulla:

«Sälät belän yakınrak min 1999-nçı elda «Sälät-Rauşan» smenasında tanıştım. «Efäk kanat» proektı näticäsendä isä Bolgariyadä bulıp kayttım. «Bikafest» festiwalendä Yoldız Miñnullina belän berlektä üzemne alıp baruçı rolendä dä sınap karaganım buldı. Älbättä, Sälät moxite minem talantımnı açıp cibärergä zur etärgeç buldı. Iñ istä kalgan smenam ul – 2003-nçe elda «Sälät-Bilär» festiwale. Sälät aktiwistlarına telägem şul: kıyu bulıgız, bernärsädän dä kurıkmagız. Şulay gına sez uñışka ireşä alaçaksız».

Uñışlar teläp kalabız siña, Nurbäk! ALGA! Bez sineñ belän gorurlanabız.